Ta jujun kʼajkʼal, bayal te machʼatik ochemik ta chukel ta mukʼul karseletik ta Estados Unidos ya stsʼibay sjunik ta oficinaetik yuʼun te stestigotak Jehová yuʼun ya skʼanik koltayel ta swenta skʼop Dios.

Ta swenta-abi te yajwal te kongregasionetik te nopol ayik tey-ae ya xbajtʼ skʼanik permiso yuʼun jich ya xjuʼ ya yulaʼtayik te ants winiketik-abi sok ya yakʼbeyik nojptesel yuʼun Biblia. Ya xbajtʼik ta yulaʼtayel karseletik, hospitales penitenciarios, snail te banti ya yichʼ tojobtesel chopol talelil (reformatorios) sok centros de rehabilitación.

Ta chaʼoxchajp karseletik ya yichʼ pasel tsoblejetik tey-a. Jich bitʼil te Discurso te lokʼem ta Biblia la yichʼ kʼasesel ta chaʼchajp yamakʼul karsel te kʼotik 32 ta tul ants winiketike.

Chajpnax-a te bintik lokʼem ta swenta ini. Ta jun karsel te ay ta lum Indiana ay jtul winik te och ta karsel te ma xjuʼ ya xlokʼixe ta skaj te la yaʼiy milaw, jaʼukmeto sjeltayejix te skuxlejal sok jaʼix jtul Testigo yuʼun Jehová te yichʼojix jaʼe.

Jtul Testigo yuʼun Jehová la yakʼbey nojptesel yuʼun Biblia jtul winik te ochem ta chukel ta mukʼul karsel yuʼun California, jich la yal ta swenta ini: «Ya jnaʼ ta lek te bin yilel stalel ta nailale, sok te bitʼil sjeltayej te skuxlejale. Ta melel, la skʼan te ya sjeltay ta jkʼaxel te stalele yuʼun ya xjuʼ ya yichʼ-a te jaʼe».

Bayal machʼatik schʼuunejik te bin smelelil ya yal te Bibliae, manchukme ya xjuʼ ya staik wokolil yuʼun. Ay chaʼoxtul te ay ochemik ta nailal ta jtsojb te bayal bintik chopol ya spasike, ta swenta-abi ay kʼejel yichʼojik akʼel o yichʼojik jeltayel ta yan lugar swenta maba ya yichʼik utsʼinel.

Te Biblia ay yuʼel ta sjeltayel kuxlejalil te chajpnax ya yilik-a te polisiaetik yuʼun te karsele. Soknix ay chaʼoxtul Testigoetik yuʼun Jehová te yichʼojik akʼbeyel majtʼanil o yichʼojik akʼbeyel sjunik (certificado) ta swenta te lekil aʼtelil ya spasik ta karseletik-abi.