Ta domingo 5 yuʼun enero ta 2014, te Serge Gerardin ay bael ta jun autobús-a te kʼalal ayin jun accidente, yak ta bael ta jun mukʼul tsoblej yuʼun te stestigotak te Jehová te nopol ay ta París (Francia). Jich ya yal kaʼiytik: «Te carro la smaj sba ta stiʼil te smajkil te puente jich chʼay koel. Jawal-a kʼot, jich kaj ta tilel».

Te Serge jaʼ jwolwanej yuʼun jtupʼkʼajkʼetik sok ayix 40 jaʼbil te yak ta spasel te aʼtelil ini, oranax la snaʼ te bin ya skʼan ya spase. «Manchukme yan dirección yakonkotik ta bael-a, la jkʼambey te chofer te yakuk skojtan te autobús, jich lokʼon bael ta animal te banti yak ta tilel te carroe». Te Serge la yaʼiy stojol te ay machʼa yak aw te jich yak ta yalele: «¡Koltayawonik!». Jich ya yalxan te Serge «Jlapoj jtraje sok jcorbata sok maba kichʼoj-a te jmajkil te bitʼil ya x-aʼtejone. Jaʼukmeto te kʼalal la kaʼiy stojol te ay machʼa yak ta aw ta skʼanel koltayele, la jnaʼ stojol te ay machʼa ya xjuʼ ya jkoltaybey te skuxlejale».

Te kʼalal la sjoytay te carroe, te Serge la sta jtul pasajero te kʼax xiwene sok la skoltay. «La yalbon te ayto chaʼtul te machʼatik ayik ta carroe, xchi te Serge. Ay bayalix carroetik-a te scholoj sbaike, jaʼukmeto te ants winiketike maʼyuk bin juʼ yuʼunik spasel ta skaj te chajpto yak ta tilel-a te kʼajkʼe.»

Ay chaʼoxtul jtij camionetik te yichʼojik kʼoel stupʼjibal kʼajkʼ, te kʼalal la yichʼik albeyel yuʼun te Serge te bin ya spasike, la stuuntesik te stupʼjibal kʼajkʼe jich tupʼ jtsʼinuk te kʼajkʼe. Te jtij carroe tenel jilel ta yeʼtal te scarroe, jich yuʼun te Serge sok yantik ants winiketik la sjachik te carro sok la sjochik lokʼel te winik sok la yakʼik ta jun lugar te banti lek ya x-ayine.

«Ta yorail-abi chaʼjajch ta tilel te kʼajkʼe, xchi te Serge.» Te yan pasajeroe chukul jilel ta cinturón yuʼun seguridad. Jtul motociclista te slapoj bael kʼuʼul te pasbil ta nujkul sok te jaʼnix yaʼtel-euk te stupʼel kʼajkʼe, och ta koltaywanej. Te Serge la yal te nopol ya xtʼom ta kʼajkʼ te carroe, la snopik te ya stasik lokʼel te winike. Mato sta jun minuto-a te bitʼil la slokʼesike, tʼom ta kʼajkʼel te carroe.

Te kʼalal kʼotik te jtupʼkʼajkʼetike soknix te machʼatik ya xpoxtayik ejchene, jajch xpoxtayik te machʼatik ejchenajik ta carroe soknix la stupʼik te kʼajkʼe. Te Serge la xpoxtaybeyik te yejchene sok te banti kʼajkʼemik te skʼabe. Te kʼalal sujt moel ta autobús, ay chaʼoxtul winiketik la yalbeyik wokol yuʼun ta swenta te koltayel la yakʼe.

Te Serge bayal stseʼelil yoʼtan yuʼun te bitʼil koltaywane. Jich ya yal: «Jich la kaʼiy jba te yuʼunix jich ya skʼan-a te Jehová Dios te bin la jpase. Bayal stseʼelil koʼtan yuʼun te la jkoltay te ants winiketik-abi».