Ta jaʼbil 2014, te Jtsojb Jwolwanejetik yuʼun te stestigotak Jehová la schajpanik jun programa yuʼun scholel skʼop Dios ta lumetik te namal ayik ta norte yuʼun Europa sok Norteamérica (Hechos 1:8). Ta sjajchibal jaʼnax la yichʼ cholel skʼop Dios ta tut lumetik yuʼun Alaska (Estados Unidos), Laponia (Finlandia) sok Nunavut sok lumetik te ayik ta Noroeste (Canadá).

Te stestigotak Jehová ayix bayal jaʼbil te jich baemik ta scholel skʼop Dios ta lumetik ini te namal ayike. Jaʼukmeto ma bayaluk tiempo ya xjilik tey-a sok jaʼnax ya spukik jilel junetik te lokʼemik skʼoplal ta Bibliae.

Ta swenta te yachʼil programa ini, te beteletik te ya yilik te aʼtelil yuʼun te stestigotak Jehová ta lumetik te ayik ta norte te namal ayike, la yikʼtiklan te machʼatik spisil-ora ya scholik skʼop Dios (precursoretik) yuʼun ya xjilik oxebuk u ta lumetik te banti la yichʼ tsaele. Teme ay bayal te machʼatik ya skʼan ya snopik te Bibliae ya xjuʼ ya xjilik bayalxan tiempo te precursoretike sok ya xjuʼ ya spasik tsoblejetik tey-a.

Ta melel, kʼax wokol te kuxinel tey ta norte. Te chaʼtul precursoretik te la yichʼik tikunel ta Barrow (Alaska), ay jtul talem ta sur yuʼun California, te yane talem ta Georgia (Estados Unidos). Te sbabial yorail sik kʼax yuʼunik ta Barrow la stsʼikik te tulan sik te 38°C bajo cero (-38 °F). Manchukme jich kʼax ta stojolik-abi, mato ayuk bayal u te kʼalal kʼotik tey-ae la yulaʼtayikix 95% te naetik te ayik ta lum-abi sok ay chantul te machʼatik la yakʼbeyik snop te Biblia te teynix ay slumalik-ae. Ta spisil te machʼatik jajch snopik te Bibliae, ay jtul kerem te John sbiile, schebal sok te slekol jajchik ta snopel te Biblia sok te libro ¿Bin ya yakʼ ta nopel ta smelelil te Bibliae?, te John ya scholbey yaʼiy te yamigotak sok te sjoʼtak ta aʼtel te bintik yak ta snopele. Jaʼnix jich ya stuuntes te aplicación JW Library yuʼun ya skʼopon te foyeto Examinando las Escrituras diariamente ta selular.

Te bitʼil maʼyuk karretera kʼalal ta lum Rankin Inlet, ta lum yuʼun Nunavut (Canadá), jtul hermano sok yinam te ochemik ta precursor bajtʼik ta abion kʼalalto ta lum esquimal sok ay chaʼoxtul te machʼatik jajch yakʼbey snop te Bibliae. Te kʼalal laj yoʼtan ta yakʼbeyel yil te video ¿Bin ya yichʼ pasel ta tsoblejetik kuʼunkotik?, jtul winik la sjojkʼoy te bin-ora ya yichʼ pasel jun sNail Tsoblej tey ta lum-abi. Sok jich la yalxan: «Teme liʼto ayon-a te kʼalal ya yichʼ pasele, yame xboon ta tsoblejetik».

Te chaʼtul precursoretik te la yichʼik tikunel ta lum Savukoski (Finlandia), jich la yalik: «Bayal sik sok ya xko bayal toib (nieve)». Ta lum-abi, maʼyuk bayal ants winiketik, jaʼ kʼax bayalxan te jaʼmal chijetike (renos). Manchukme jich-abi, te precursoretik la yalik te leknax yorail kʼotik tey-ae. ¿Bin yuʼun? Jich la yalik: «Juʼem kuʼunkotik scholel ta lek te skʼop Diose. Spisil-ora ya slokʼesik te toib ta karretera te ya x-ikʼawan bael ta lumetik soknix te namal ayike, sok spisil-ora ilbil yuʼunik ta lek. Ta swenta te bayal sike te ants winiketike ma xlokʼ lek ta snaik».

Te bitʼil jpasojkotik tulan ta scholel skʼop Dios ta norte ta lumetik te namal ayike ay chaʼoxtul te chajpnax ya yilike. Te chaʼtul precursoretik la yulaʼtayik jtul ants te yichʼoj yaʼtel ta alcalde ta lum yuʼun Alaska, te antse ay bin lek skʼoplal la stsʼibay ta red social ta swenta te bitʼil kʼopoj sok te Testigoetike sok la yakʼ jun foto yuʼun te tratado, ¿Bin-a te Ajwalinel yuʼun te Diose?

Ta Haines (Alaska), chaʼtul precursoretik la spasik tsoblej ta jun biblioteca pública te banti kʼotik waxaktul ants winiketik. Te periodiko ta lum-abi la yal te ay chaʼtul winiketik te talemik ta Texas sok ta Carolina del Norte te yakik ta sjapbeyel nojptesel yuʼun Biblia te ants winiketik ta snaik. Te anuncio jich la yal ta slajibal: «Teme ya akʼan ya anaʼbeyikxan swentaile, ochanik ta jw.org».