Ta Feria Internacional del Libro de Toronto, la yichʼ akʼel ta ilel libroetik te pasbilik imprimir soknix te ayik ta aparatoetik, jaʼ ini la yichʼ pasel ta Centro Metropolitano de Convenciones yuʼun te lume, te jajch ta 13 kʼalal ta 16 yuʼun noviembre 2014; kʼaxem ta 20,000 ta tul ants winiketik kʼotik tey-a.

Te machʼatik kʼotik tey-euk-ae, jaʼ te stestigotak Jehová te la yakʼik ta ilel sok aparatoetik te junetik yuʼunik te tʼujbiliknax ta ilele. La yakʼik ta ilel ta tabletaetik te bin-utʼil ta tuuntesel te pajina jw.org.

Ay jtul winik te akʼbil ta swenta yilel te bin la yichʼ pasele, jich la yal: «Te pajina awuʼunik ta Internet yachʼil te bintik ay tey-ae. Te chaʼoxtul machʼatik talemik ta swenta empresa te ya spasik libroetike, jaʼ lek te yakuk snopik te bin-utʼil ya awakʼik ta ilel te junetik awuʼunike». Bayal ta tul te machʼatik kʼotik tey-ae, la yalik te tʼujbilnax sok te ma wokoluk ta tuuntesel te pajina jw.org, melel ya yichʼ tael sujtib tey-a te jojkʼoyeletik te mukʼik skʼoplale. Jaʼnix jich la smulanik te bitʼil tey ta pajina ini ya staik koltayel ta swenta schajpanel te kʼopetik ya staike sok te bin ya smel yoʼtanik yuʼune.

Te Testigoetik te yakik ta yakʼel ta ilel te pajina jw.org, la yilik te jteb ma spisiluk te machʼatik kʼotik tey-ae, ma snaʼbeyik sba te pajina-abi. Jteb ma spisiluk la yichʼik bael junuk tarjeta yuʼun jw.org o te tratado ¿Banti ya jtabeytik sujtib te jojkʼoyeletik te tulanik skʼoplale? Sok bayal ta tul la yalik te ya xchaʼochik ta yilel te pajina-abi, ay yantik la skʼanik ulaʼtayel ta snaik.

Jich bitʼil viernes kʼot te skʼajkʼalel skʼinul alaletik tey ta feriae, te stestigotak Jehová la yakʼik ta ilel te videoetik yuʼun caricatura (lokʼombaetik ta pisarron) ta jw.org. Bayal ta tsojb jnopjunetik sok maestroetik la stejkʼan sbaik ta yilel.

Jtul winik te talem ta Chicago te ya x-aʼtej ta jun empresa te ya spas imprimir Bibliaetik la yutsil kʼoptay te Testigoetik ta swenta te kʼax lek pasbil te Traducción del Nuevo Mundo de las Santas Escrituras te yakʼojik ta ilel tey-ae. La skʼan junuk tarjeta yuʼun ya skʼopon te machʼatik ya spasik te Bibliae.

Te pajina kuʼuntik ta Internet ay kʼaxemix ta 700 ta chajp kʼopil tey-a. Te Machʼatik kʼotik ta feria la yilik ta waklajuneb ta chajp kʼopil: amárico, bengalí, chino, coreano, español, francés, griego, gujarati, hindi, inglés, portugués, sueco, tamil, tigriña, urdu sok vietnamita.

Jtul testigo yuʼun Jehová te yak ta yakʼel ta ilel te pajina jw.org ta feriae, la yil te jaʼ kʼax lekxan te ya yakʼbey yil te ants winiketik te pajinae, ma jaʼuk te yanax yalbeye. Jich la yal: «Ta swenta ini la kiltik te kʼax lek te jich la yichʼ pasele yuʼun ya jpukbeytikxan skʼoplal-a te pajina kuʼuntik ta Internet».