Ta sjajchibal julio yuʼun 2013, ay 28 ta tul stestigotak te Jehová ta Brasil bajtʼik ta municipio yuʼun São Félix do Xingu te banti ay skʼinalik te cayapós sok te yurunas. Moik bael ta mukʼul jaʼ Xingú ta jun barco te 15 metro snajtʼil (50 pies). Te mukʼul jaʼ ini jteb ma sta 2,000 kilómetro (1,300 millas) snatʼil, tey ya xbajtʼ ta norte sok ya xkʼot ta lokʼel te mukʼul jaʼ Amazonas.

Te bin swentaile, jaʼ te ya scholik te lek yachʼil kʼop yuʼun te Ajwalinel yuʼun te Dios ta stojol te machʼatik nainemik ta tut lumetik te ayik bael ta stiʼil te mukʼul jaʼe. Ta yoxebal kʼajkʼal kʼotik ta tut lum Kokraimoro, te banti leknax la yichʼik ilel yuʼun te ants winiketike. Te kʼalal la yichʼik ilel yuʼun jtul ants te jaʼ slumal tey-ae, jajch yakʼ ta ilel ta seña te bayal sbujtsʼ yoʼtane. Te jtojobteswanej te jokinbilik bael yuʼune jaʼ la schol te bin la kʼan la yal te antse: «¡Laʼik! ¡Ya jkʼan ya jnaʼbeyexkotik abaik ta apisilik!».

Te stestigotak te Jehová la skʼoponik spisil te ants winiketike: ay chaʼoxtul te la skʼoponik ta kʼopil portugués, ay yantik te la yakʼik ta ilel seña sok la stuuntesik te lokʼombaetik yichʼoj te junetik te lokʼemik ta Biblia te yakik ta spukele. Te ants winiketik te tey ay slumalik-ae, tseʼelnax yoʼtanik la yichʼik jilel te junetike. Te bin junil te la smulanikxane, jaʼ te folleto Chʼama awaʼiy te bin ya yal te Diose.

Te Gerson, jaʼ jtul precursor especial (te machʼa spisil-ora ya schol skʼop Dios) ta São Félix do Xingu, ya schol te kʼalal jtul winik la yichʼ jilel te libro Aʼyejetik te lokʼem ta Biblia: «Te kʼalal la yil te libroe, la stsak ta tulan sok schebal skʼab. Maba la skʼan la skoltay ajkʼuk».

Te stestigotak te Jehová, ayniwan 500 libroetik, folletoetik sok revistaetik la yijkʼitaybeyik te machʼatik tey-ay slumalik-ae, bayal la yalik wokol yuʼun. Ta Kawatire, tut lum te banti bayal la smulanik te bin ya yal te Biblia ta swenta te bitʼil nopol ya xkʼatpʼuj ta nichimal kʼinal te Balumilale. «Ta Nichimal Kʼinal, jich ya xkuxin te ants winiketik te bitʼil joʼotike» Jaʼ jich la yal te Tonjaikwa, jtul cayapó winik te lek yoʼtane.

Bayal machʼatik te ay slumalik ta São Félix do Xingu la yaʼiy stojol te bitʼil ya xbajtʼik ta scholel skʼop Dios te stestigotak te Jehová ta lumetik-abi. Te Simone jaʼ jtul jcholkʼop ants te la yal te ay machʼatik la skuyik te maba ya x-akʼotik ochel sok te sjoʼtak ta banti te lumetik-abi. Jaʼukmeto maʼyuk wokolil la jtakotik. «Kʼax lek ya yilik te kʼootike, xchi te Simone, sok la jkʼoponkotik spisil te ants winiketike».