Bayal mil ta tul ants winiketik la yulaʼtayik te Feria Internacional yuʼun 2014 ta Ruán (mukʼul lum te ay ta norte yuʼun Francia) sok la yilik te bitʼil la yichʼ akʼel ta ilel te bin yilel-a te Biblia ta namey, ta kʼajkʼal ini sok ta pajel chaʼbej.

La yichʼ akʼel ta ilel ta video te bitʼil la yichʼ tsʼibayel te Biblia ta namey kʼinale. Te machʼatik la yilik te video la snopik ta swenta te Biblia te ya xjuʼ ya skoltayotik ta jkuxlejaltik, te jamal la yalbey skʼoplal ta swenta te bintik kʼot ta pasel ta nameye, sok te bayal bintik yalojbeyix skʼoplal-a te kʼalal mato snaʼojik-a te pʼijil winiketike soknix te bayal yichʼojix pukele.

Soknix la yichʼ akʼel ta ilel te bitʼil maba yichʼoj lajinel te Biblia ta kʼajkʼal ini, sok te bitʼil bayal pasbilix imprimir soknix te kʼasesbilix ta computadora ta swenta bayal millón ta tul ants winiketik. Te machʼatik ulaʼtaywanike la yichʼik akʼbeyel jpajkuk te Traducción del Nuevo Mundo, jun versión te pasbil yuʼunik te stestigotak te Jehová ta kʼaxemto ta 120 kʼopiletik.

Te machʼatik ulaʼtaywanike la yalbeyik bayal wokol te stestigotak te Jehová te bitʼil la yakʼik ta ilel te Biblia ta stojol te ants winiketike. Jtul ants te ya x-aʼtej ta tojol te ajwalil, kʼot ta feria sok jtsojb jchʼieletik jich la yal ini: «Te Biblia jaʼ jun majtʼanil te mukʼ skʼoplal ta stojol te ants winiketik. Maba lajem skʼoplal. Ta jujun buelta te ya jkʼopone ya jtabey schajpajibal tey-a te kʼopetik kuʼune».

Jtul ants te ayix 60 yaʼbilale chamnax la yil te bitʼil ya xjuʼ ta tael te Biblia te maba tojbile sok jich la yalxan: «Ya skʼan te jpisiltikuk ya jkʼopontike, melel ya xtuun kuʼuntik».