Ya xchiknaj ta ilel te mukʼul pamal jaʼ Sterling Forest (Blue Lake) te kʼalal ya kiltik bael norte kʼalal ta suroeste. Ta sbabial, ya xchiknaj ta ilel te yakik ta aʼtel ta yeʼtal te wayibal naetik D. Ta banti nopol te mukʼul pamal jaʼ yakik ta schajpanel te concreto (hormigón) yuʼun te wayibal naetik C.

Ay chaʼoxtul j-aʼteletik yakik ta stsʼaktiklanel te baño te pastiklanbilix te ya yichʼ akʼel ta banti wayibal naetik. Te baño yichʼoj spisil te bitʼil ya yichʼ tsaktiklanele, te banti ya x-och ikʼ, te yawil atimal, spajkʼul, tuboetik sok te banti ya yichʼ otsesel lus. Te kuarto yuʼun te baño jaʼtome ya stsʼakaj ta pasel-a teme la yichʼ otsesel ta yutil te naetike.

Ay chaʼoxtul te machʼatik ya stsʼakik tuboetik (fontaneros) yakik ta aʼtel ta yeʼtal naetik. Te jayeb kʼajkʼal ya xjalaj ta pasel te aʼtelile, yame yichʼ tuuntesel te lugar ini yuʼun tey ya xweʼik 500 ta tul j-aʼteletik. Ta yantik lugar yuʼun te mukʼul na ini yame yichʼ jojchobtesel yuʼun ya xjuʼ ya xweʼikxan 300 ta tul. Te kʼalal nopol ya xlajix-a te aʼtelile, ta mukʼul na ini yame yichʼtiklan lokʼesel te bintik tuun tey-ae, yuʼun jich ya xtuun ta schajpanel karroetik.

Jtsojb j-aʼteletik yakik ta sjiʼel lekil lum ta sba te mukʼul naetik yuʼun ya stsʼunik jaʼmal nichimetik swenta maba ya stsʼiʼlaj bayal te bintik ay ta Balumilale sok ma slajin bayal te luse. Te jaʼmal nichimetik ini ya stsʼub te jaʼ ya xchʼay koele sok ya stsʼabuy lokʼel te bintik ya stsʼiʼlajteswan ta jaʼale.

Te mukʼul na ini, te lokʼem ta oxtsal, ya yichʼ pasel ta 42,000 metros cuadrados (450,000 pies cuadrados) sjamlejal. Ta lokʼomba ini ya xchiknaj chaʼoxtul j-aʼteletik yuʼun yan empresa te yakik ta yotsesel bariya pasbil ta acero yuʼun jich ya yakʼbeyik yiptajib te yoyal nae.

Ay chaʼoxtul j-aʼteletik yakik ta stuuntesel soplete te yichʼoj gas propano yuʼun ya slimik te tela asfáltica ta sba te nae. Yichʼojik schujkʼilik swenta ya xkoltayotik yuʼun teme ay chʼayik koele.

Yakik ta stsʼaktiklanel tuboetik te chajpanbilix sok sistemas de calefacción, ventilación sok aire acondicionado. Spisil te machʼatik yakik ta aʼtel ta Warwick ay 35 % antsetik.

Te lugar ini la yichʼ tael ta febrero yuʼun 2014, ya yichʼ tuuntesel ta swenta skʼejel biluketik sok yawil te prefabricación. Jaʼ ini ay 20,000 metros cuadrados (220,000 pies cuadrados) sjamlejal. Te bintik sakik ya xchiknaj ta ilele, jaʼ te baños prefabricados te chajpanbilix yuʼun ya yichʼ tikunel baele.

Ta noroeste ya xchiknaj te bitʼil yak ta jilel te wayibal naetik C. Tey ini ya xnainik 200 ta tul betelitaetik. Te smukʼul te jujun wayibal nae yichʼoj 35 sok 55 metros cuadrados (350 sok 600 pies cuadrados) sjamlejal. Teynix yichʼoj tut kosina, jun baño sok jun balcón.

Yak ta chajpanel te kʼinal te banti ya xpastaj te aʼtelile. Ta stiʼilix bael te fotoe ya xchiknaj ta ilel jun makina te ya swuy tonetik te ya xtuun swenta ya yichʼ pasel te aʼtelile. Te kʼalal juʼix ta pasel-a te aʼtelile laniwan yichʼix jokʼel te lum 260,000 metros cúbicos (340,000 yardas cúbicas). Ta jujun kʼajkʼal ayniwan ya stuuntesik 23 bolteoetik (dumper) ta skuchel te lume.

Yakik ta stsʼunel jaʼmal nichimetik ta sba te nae.

Ta suroeste ya xchiknaj ta ilel te skʼab mukʼul grúa te ay ta snail oficinaetik. Ta kʼexam ya xchiknaj te banti ya skojtan skarroik te j-ulaʼtaywanejetik, te jujun kʼajkʼal ya xnoj ta karroetik te jaʼ yuʼunik te machʼatik ya xkʼotik ta aʼtele. Ay chaʼoxtul te lajchayeb hora snajtʼil te banti talemik yuʼun jaʼnax ya x-aʼtejik ta oxeb o chaneb kʼajkʼal.

Te lugar te banti ya xweʼik jun cheb kʼajkʼale, nopol yakix ta juʼel te aʼtelile. Ta swenta telebisionetik (te mato akʼbil ta yawil) sok bosinaetik, te machʼatik ya x-aʼtejik tey-ae, yame xjuʼ ya yilik te yichʼel ta mukʼ Dios ta jujun sab sok yantikxan programaetik yuʼun skʼop Dios ta sucursal yuʼun Estados Unidos.

Yak ta akʼel concreto (hormigón) ta sbabial piso. Ta waʼel ay jtul machʼa yak ta aʼtel te yak ta stuuntesel jun makina te ya stupʼ te ikʼ yuʼun ma xwox moel te concreto yuʼun lek ya spakʼ sba-a.

Te banti ya xkʼax te kableetik yuʼun lus ta yolil te mukʼul na, sok mukul ya xjil ta yeʼtal lum.

Te sbabial piso nopol ya xjuʼix ta pasel. Ay la yichʼix tuuntesel 540 metros cúbicos (700 yardas cúbicas) yuʼun concreto (hormigón), jaʼ te aʼtelil te banti bayal yichʼoj tuuntesele. Te concreto la yichʼ chajpanel ta jun makina yuʼun mezcladora te ay te banti yak ta pasel te aʼtelile, soknix la yichʼ tuuntesel waxak-kojt kamion te ya swotsʼ te concreto sok cheb bomba yuʼun ya yichʼ moel ta sba te mukʼul naetike. Ta spisil ini la yichʼ pasel ta joʼebnax hora sok olil. Ta yolil te foto ya xchiknaj junuk te torre te banti ay eskaleraetike.

Ay chaʼoxtul j-aʼteletik yakik ta spasel jun muro ta sba te nae. Ta yolil bael te foto ya xchiknaj te bitʼil yak ta pasel te banti ya xjajch yoyal te wayibal naetik A.

Yak ta tuuntesel jun grúa yuʼun ya smojtesik ta yoxebal piso te baño te tsʼaktiklanbilixe. Bayal te bintik ya yichʼ tuuntesel ta Warwick tsʼaktiklanbilix. Ta swenta-abi maba nojel ta j-aʼteletik te banti yak ta pasel te aʼtelile. Jaʼnix jich ya xjuʼ ta pasel ta ora te aʼtelile.

Chaʼoxtul j-aʼteletik ta yan empresa yakik ta yotsesel pajkʼetik yuʼun concreto (hormigón) te tsʼaktiklanbilixe, maʼyuk bayal ya slajinbey yip te luse. Te concreto ini ma bayaluk aʼtel yichʼoj sok maba ya yichʼ bonel melel ayix sbonil. Te pajkʼetik ini ma wokoluk ta otsesel, sok ya yakʼ te ya xjuʼ ta pasel te aʼtelil ta yoraile.

Te bin ya xchiknaj ta ilel ta suroeste. Ta sbabial ya xchiknaj te bitʼil yak ta pasel ta lek te sba te wayibal naetik D. Ta spat ini tey ay-a te wayibal naetik C, te nopol ya xjuʼix ta pasele.