Jaʼxanix ya skʼan joʼlajuneb minuto yuʼun ya sta jukeb hora sakubel kʼinal, tey ta Tuxedo yuʼun Nueva York kʼax kʼepel ta lek kʼinal-a te kʼajkʼal-abi. Ay jtebuk toib ta sba te mukʼul pamal jaʼ, te ay ta tseʼel te mukʼul na te chaneb piso yichʼoj te banti ya x-och sok ya xlokʼ ants winiketik te slapoj skʼuʼ spakʼik ta swenta aʼtel. Ay chaʼoxtul te sabto lokʼik tal ta snaik o te banti jilemik ta nainele. Ay yantik te nopol talemike sok ay yantik te kʼax namal talemik ta estado yuʼun Nueva York, jich bitʼil Patterson, Wallkill sok Brooklyn te ayniwan 80 kilometro (50 millas) te snajtʼile.

Jteb ma spisilukik ma jaʼuk slumalik te Nueva York, bayuk talemik ta skʼinal Estados Unidos o kʼubultoxan-abi. Maʼyuk machʼa ya yichʼ tojel te jayebik ta tule. Ay chaʼoxtul te junchebnax semana talik ta koltaywanej, ay yantik te talemik ta wakeb u o ay yantikxan te talik bayal tiempo. Jaʼnix la stojik tal te spasajeike sok maba ya yichʼik tojel. Jaʼukmeto kʼax bujtsʼan kʼinal ya yaʼiyik ta swenta te bitʼil yakik ta koltaywanej ta aʼtel ini.

Te kʼajkʼal ini ay talemik 120 ta tul j-aʼteletik, jaʼukmeto te yantikxan u te ya xtale yame xtalikxan bayal ta tul. Maba ya sten sbaik te kʼalal ya x-ochik te banti snail weʼibale, ya xnakʼajik ta mesa te banti ya x-ochik lajuntule soknix ya skʼepik kapel yuchʼik. Te kʼalal jich yakik ta spasel-abi, ta cocina ya xlokʼ tal yikʼ bujtsʼan chʼilbil tomuk sok tocino. Ta jukeb hora sakubel kʼinal ya xjajch ta nopel jun texto yuʼun te Bibliae te ya yichʼ ilel ta televisionetik. Te kʼalal kʼaxix joʼlajuneb minuto-ae, ya yichʼ tal kʼasesel te weʼelile. Ma jaʼuknax ya yichʼ kʼasesel te tomut sok tocino, jaʼnix jich ya yichʼ akʼel pan sok avena. ¡Kʼax bujtsʼan te weʼelile!

Te kʼalal lajix ta kʼoponel-a te Diose, spisil ya xlokʼik bael yuʼun ya xjajch spasik te yaʼtelike. Te machʼatik ya x-aʼtejik ta spasel naetike tseʼelnax yoʼtanik ya xkʼopojik te kʼalal yakik ta slapel scascoik, scinturonik te banti ya skuchik spisil te yaʼtejibik sok slenteik soknix te schalekoik yuʼun biluk wokolil.

¿Bin yakik ta spasel liʼ ini? Yakik ta yachʼubtesel te banti ayin te yawil junetik International Paper Company, liʼto ya yichʼ ilel bael te bintik ya xjajch ta pasel ta swenta te yachʼil naetik yuʼun te banti ya yichʼ ilel te yaʼtel te stestigotak te Jehová. Jaʼ-abi, jaʼ te mukʼul naetik ya yichʼ pasel ta Warwick. Liʼ ta Tuxedo ya yichʼ pasel cuartoetik, oficinaetik, te banti ya yichʼ pasel aʼteliletik soknix te banti ya yichʼ kʼejel te aʼtejibaletike. Ta 12 yuʼun marzo ta 2013 te machʼatik mukʼ yaʼtelik te banti Tuxedo la yakʼik permiso yuʼun ya yichʼ pasel te aʼtelile.

¿Bin-utʼil ya yichʼik ilel te machʼatik ya xkʼotik ta koltaywanej ta aʼtele? Te hermano William te talem ta Nueva Jersy te yak ta jilel te banti ay te mukʼul naetik yuʼun te stestigotak te Jehová, jich la yal: «Te kʼalal ya xjulotike, te hermanoetik te akʼbil yaʼtelik ta maliywaneje, jaʼik ya yalbotik te banti ay te jkuartotike, sok te bin-utʼil ya xkʼootik ta yantik lugaretik, te bin-utʼil ya jtuuntestik te jllavetik... spisil te bintik ya jkʼan jnaʼtik stojole. Kʼax lek yoʼtanik. Te kʼalal ayotikix ta Tuxedo sok te kʼalal lajix koʼtantik te weʼ uchʼel ta sab-ae, ya xbajtʼ jnaʼbeytik sba te machʼa ya swolotik ta aʼtele sok jaʼ ya yalbotik te bintik ya jpastike».

¿Bin yilel te aʼtelil ya yichʼ pasel liʼ ini? Te hermana Yajaira sok te smamlal te talemik ta Puerto Rico, jaʼ ya spakʼik te bintik pasbil ta yeso. Jich la yal: «Ya xjachotik ta chaneb ora sok olil ta sakubel tal kʼinal. Ya jchajpan jilel te jkuartotike ya kuchʼtik jtebuk kapel ta patil ya kichʼtik ikʼel bael te banti ya xbootik ta aʼtele. Te kʼalal ya sujtotik talele, kʼax lujben ya xjulotik. Jaʼukmeto maʼyuk skʼoplal stukel-abi, melel ya jnaʼtik te tulan aʼtejotike. Jpisiltik te machʼatik liʼ ayotike spisil ora tseʼel koʼtantik».

Zach y Beth te talemik ta estado yuʼun Minnesota, jaʼik te machʼatik ya schajpanik te teʼtikil lum kʼinal ta Warwikc. Te kʼalal la yichʼik jojkʼoybeyel te bin yuʼun la sjap sbaik ta aʼtele, te hermana Beth jich la yal: «Maʼyuk bin kʼax lekxan-a te bitʼil yichʼel ta mukʼ te Jehovae. Jaʼ yuʼun spisil te bintik ya jnaʼtik spasele ya jkʼan ya jpastik ta swenta te aʼtelil yuʼun te Jehovae».