Ta sábado 1 yuʼun marzo 2014 ay 823 ta jtul ants winiketik te la stsob sbaik ta sNail mukʼul Tsoblejetik yuʼun te stestigotak te Jehová ta lum Benín ta swenta te bin la yichʼ pasel ta Nigeria. Ta yaʼbilal 1999 kʼalal jajch ta pasel te sNail Tsoblejetik ta nasionetik te maʼyuk lek stakʼinike, te stestigotak te Jehová ay la spasikix oxmil ta chajp sNail Tsoblejetik ta Nigeria.

Ta tsoblej-abi la yichʼ akʼel ta ilel jtebuk te bitʼil jajch te aʼtelil ta swenta te sNail Tsoblejetik yuʼun te congregacionetik ta Nigeria ta yaʼbilal bael 1920. Ta sjajchibalto tal la yichʼ tuuntesel naetik sok la yichʼ majanel mukʼul naetik. Te sbabial sNail Tsoblej yuʼun stestigotak te Jehová te ay ta lum Ilesa yuʼun Nigeria la yichʼ pasel bael ta yaʼbilal 1935. Ta yaʼbilal 1938 ay 14 congregacionetik-a, jaʼukmeto ta yaʼbilal 1990 ayix 2,681 congregacionetik-a, bayal te congregacionetik-abi maba la staik te banti ya xjuʼ ya stsob sbaike. Ay baeltik te junax sNail Tsoblej la stuuntes wakeb congregacionetik. Ta yantik lugar toy yajtalul te machʼatik kʼotik ta tsobleje, jich ma x-ochikix-a te banti sNail Tsobleje. Ay tekʼajtik jilel ta fuera te ants winik te jaʼnax la schʼam yaʼiyik te skʼop Dios ta bentana. Jaʼukmeto aytonanix congregacionetik-a te yato stsob sbaik ta naetik sok ta eskuelaetik.

Ta yaʼbilal 1990 te Betel yuʼun te stestigotak te Jehová jajch yakʼ koltayel ta swenta spasel sNail Tsoblejetik te kʼalal kaj yakʼ ta majanel te Takʼin te tsobil ta swenta spasel sNail Tsoblejetik. Ta yaʼbilal 1997 te Jtsojb hermanoetik te ya yilik te Aʼtelil yuʼun spasel naetik ay skoltayojix 105 congregacionetik ta spasel o ta schaʼyachʼubtesel te sNail Tsoblejetike. Ta yaʼbilal 1997 kʼalal ta 1999 la yichʼ pasel oxlajuneb sNail Tsoblejetik te ayniwan jalaj ta pasel jukeb o joʼlajuneb kʼajkʼal.

Manchukme jich yak ta pasel-abi, mananix tikʼuk-a, melel bayal yak ta moel yajtalul te stestigotak te Jehová ta Nigeria. Ta abril yuʼun 1998 te Betel la yil te yatoniwan skʼan pasel 1,114 sNail Tsoblejetik ta spamal te nasione.

Te tsoblej mukʼ skʼoplal te la yichʼ pasel ta lum Benín, te hermano Don Trost, jaʼ jtul ta spisil te Comité yuʼun te Betel ta Nigeria, jich la yal: «¡Jaʼ jun aʼtelil te kʼax mukʼ ta pasele! Ay la jojkʼoybey jbatik: “¿Bin-utʼil ya juʼtestik ta pasel?”». Kʼalalto ta yaʼbilal 1999 te machʼatik yakʼojbeyik koltayel te congregacionetik ta spamal te nasione, jaʼ te Grupoetik yuʼun Spasel sNail Tsoblejetik te ayikniwan waktul o waxaktul. Yakik ta spasel naetik te oranax ta pasele, melel ayniwan la spasik juklanujeb sNail Tsoblejetik ta jujun u te slajibal schanlajunebal tal jaʼbile.

Te kʼalal laj yoʼtan ta yalbeyel te hermanoetik te bitʼil lek aʼtejemike, te hermano Trost la yalxan te aytonanix ya skʼanxan pasel-a te aʼtelile. Te kʼalal yak ta kʼaxel tal-a te 2013, toy 8,000 ta tul stestigotak te Jehová ta Niegeria. Jich la yal ini: «Swenta ayuk sNail Tsoblejetik ta pajel chaʼbeje, yato skʼan yichʼ pasel 100 sNail Tsoblejetik ta jujun jaʼbil». Ta yaʼbilal 2013 ay kʼaxem ta 5,700 congregacionetik ta Nigeria te ay 351,000 ta tul stestigotak Jehová tey-a.