Ta yolil te selva yuʼun amazonas la yichʼ pasel jun sNail mukʼul Tsoblej yuʼun te stestigotak te Jehová te chajpnax ya yil-a te ants winiketike. Te banti la yichʼ pasele jaʼ ta norte yuʼun te mukʼul lum Manaos (Brasil), jsejp kʼinal te ay 52 hectáreas (128 acres) te joytaybil ta yaxal jaʼmaletik sok teʼtikil. Jun lugar te banti tʼujbiliknax sbonil te guacamayas, tucanes sok yantikxan teʼtikil mutetik te yanyantik ya xkʼayojinik te kʼalal luchulik ta skʼab te teʼetike, jich bitʼil te smukʼtikal steʼel nuez yuʼun Brasil, te cupuarana sok te angelim pedra. ¿Bin yuʼun te la yichʼ pasel tey-a te sNail mukʼul Tsobleje?

Te mukʼul lum Manaos yiloj sba sok 1,450 kilometro (900 millas) te banti ya xkʼot ta lokʼel te mukʼul jaʼ amazonas, sok jteb ma sta cheb millón ta tul ants winiketik te nainemik tey-ae. Te Yachʼil Snail mukʼul Tsoblej ini yame xjuʼ ya stsob sbaik 7,000 ta tul stestigotak te Jehová te ayik ta lum Manaos sok lumetik te nopol yiloj sba sok jichnix bitʼil lumetik te nopol nainemik ta mukʼul jaʼ amazona o yantik mukʼul jaʼetik. Te lum te kʼax namal aye jaʼ te São Gabriel da Cachoeira, te kʼaxem ta 800 kilometro (500 millas) te ay ta smalib kʼajkʼal yuʼun te Manaos. Ay chaʼoxtul stestigotak te Jehová te ya xbeenik oxeb kʼajkʼal ta kanoa teʼ yuʼun jich ya xkʼotik tey ta sNail te mukʼul Tsoblej ini.

Te spasel sNail mukʼul Tsoblej ta yolil te amazonas jaʼ jun aʼtelil te kʼax mukʼ skʼoplal te ma xchʼay ta koʼtantike. La skʼan ichʼel bael oxlajuneb yawil aʼtejibaletik (contenedores) yuʼun spasel na, kʼalalto ta puerto yuʼun te mukʼul lum yuʼun Santos (São Paulo) kʼaxik bael ta stiʼil stiʼil jaʼ jaʼto kʼalal te banti ya xkʼot ta lokʼel te mukʼul jaʼ amazonas, ta patil kʼotik ta banti yak ta pasel te aʼtelile.

Sok ini, ayix 27 sNail mukʼul Tsoblejetik yichʼojix pasel ta Brasil. Te aʼtelil ini la yichʼ akʼel ta stojol Jehová ta 4 yuʼun mayo yuʼun 2014 te banti kʼotik 1,956 ta tul ants winiketik. Ay bayalik ta tul te kʼax tseʼelnax yoʼtan la yaʼiy sbaik ta skaj te sbabial buelta la stsob sbaik ta jun sNail mukʼul Tsoblej.

Te machʼatik kʼotik tey-ae, ma jaʼuknax la yaʼiyik stojol te bintik kʼax skʼoplale, melel la yilik-euk te machʼatik la skʼasesik te discursoetike. ¿Bin yuʼun te bayal skʼoplal-abi? Melel te kʼalal ya yichʼ pasel-a te mukʼul tsoblejetik, ma spisiluk ya staik ta ilel te plataforma ni jaʼuk te machʼatik ya skʼasesik te dircursoetike. Ay jtul testigo yuʼun Jehová te jich la yale: «Ay bayalix jaʼbil te ya xboon ta mukʼul tsobleje, jaʼukmeto maʼyuk jtaoj ta ilel ta lek-a te dramae, jaʼnax ya jchʼam kaʼiy-a». Ta ora ini, jpisiltik ya jtatikix ta ilel te plataforma.