Te hermano Harold Corkern, jaʼ jkoltaywanej yuʼun te Jtsojb Jwolwanejetik te ya x-aʼtej ta Komite yuʼun Junetik, la yakʼ jun discurso te sbiilinej «Akʼa jtuuntestik spisil te bintik ya jnaʼtik spasele». Te hermanoetik te jichnax ya yakʼ yaʼtelik ta Warwick ya yichʼik ulaʼtayel yuʼun hermanoetik te ya skʼasesik discurso te ya xmukʼubtesbot yoʼtanik yuʼune..

Te sakil lona ini jaʼ ya xkoltayotik ta swenta te sikil kʼinal yuʼun jich ya xjuʼ ta pasel-a te aʼtelile. Te mukʼul na ini tey ya xjil-a te kosinae, weʼibal na, snail poxil sok snail sakʼojibal pakʼ

Ay chaʼoxtul te machʼatik ya yotsesik lus yakik ta schajpanel te kableetike. Kʼaxemix ta 12,000 metro kableetik yichʼojix tuuntesel ta wayibal naetik. Te aʼtelil yuʼun te schajpanel lus jaʼto kaj ta pasel-a te kʼalal la yichʼ manel te kʼinale sok jaʼto ya xlaj teme juʼ ta pasel te aʼtelile.

Jtul j-aʼtel yak ta slapʼel ta cinta especial te stiʼiltiʼilna te kʼalal mato xyakʼbey-a te impermeabilizante. Te stiʼiltiʼilna ta slajibal piso la yichʼ akʼbeyel polimetilmetacrilato (PMMA), jaʼ jun material te ay yaʼlel te ya xkujch yuʼun te jaʼe.

Jtul tatil sok yantsil nichʼan te ya snaʼik yotsesel lus yakik ta skʼasesel kable yuʼun jich ya x-och lus ta wayibal naetik.

J-aʼteletik te bayal swiʼnalik ya xweʼik ta weʼibal na te yak ta tuuntesel te jayeb kʼajkʼal ya xjalaj te aʼtelile. Ta jujun kʼajkʼal ya yichʼ pasel kʼaxem ta 2000 ta pajch weʼelil.

Jtsojb j-aʼteletik yakik ta yotsesel bariya te banti ya xkʼot ta yeʼtal te taller yuʼun mantenimiento.

Jaʼ te bin la stsʼibayik te alaletik ta swenta yalbeyel wokol te machʼatik ya x-aʼtejik ta spasel te nae. Ay bayal j-aʼteletik te maʼyuk bayal kʼajkʼal ya xkʼotik ta aʼtele. Ta jujun semana ayniwan quinientos ta tul ya xkʼotik ta aʼtel. Ta febrero, ayniwan kʼotik ta aʼtel 2,500 ta tul Testigoetik ta jujun kʼajkʼal ta Warwick.

Ayniwan 60% juʼix ta pasel te aʼtelile. Ta enero kʼalal ta abril juʼ ta pasel te bin yilel ya xjil te wayibal naetik soknix snail ofisinaetik sok te banti ya x-ayin te bintik ya xtuun yuʼunik te familia Betel. Ta u ini jaʼnix jich jajch ta tsʼaktiklanel te hormigón yuʼun te snail matenimiento sok spasel te be te snitoj sba ya xkʼot sok te wayibal naetike soknix ta slekubtesel te mukʼul pamal jaʼ Sterling Forest (Blue Lake).

Te bitʼil ya xchiknaj ta ilel kʼalal ta yeʼtal te torre yuʼun eskalera. La yichʼ lebeyel yajwal ta pasel te torre te yichʼoj joʼeb piso, te hormigón jaʼ la spasik te Testigoetike.

Jun kʼajkʼal ta yorail sik, jtsojb j-aʼteletik yakik ta yotsesel bariya ta sbabial piso. Ta enero sok marzo ko toib (meʼsik) ta Warwick te la sta 127 centimetro slamlejal. Bayal ta jtsojb j-aʼteletik la stuuntesik slokʼesojibal toib yuʼun ya xjuʼ ya x-aʼtejik-a. Jaʼnix jich la schajpanik jun lugar te banti xjuʼ ya skʼixnay sbaik te j-aʼteletike.

La yichʼ otsesel lamina ta sba na te pastiklanbilixe. Ta slajibal abril la yichʼix nupʼtiklanel sok pasel te sba wayibal naetik te schaʼjejchal ya smal koel jaʼe. Ta olil yuʼun junio yame xjuʼ ta pasel te sba te wayibal naetik B.

Te bin yilel ya xchiknaj ta ilel te wayibal naetik B kʼalalto ta stoyolil te grua torre

Chaʼoxtul jtsʼak tuboetik (fontaneros) yakik ta yilel te splanoil na. Swenta ya xjuʼ ta pasel spisil te aʼtelile, ay la spasikix sok akʼbilikix permiso kʼaxem ta 3,400 plano.

Ayik ta jun plataforma te ya xtoyotik moele, chaʼoxtul j-aʼteletik yakik ta yotsesel lona swenta ma stsʼiʼlaj te mukʼul naetike. Spisil te machʼatik ya stuuntesik te plataforma te ya xtoyawan moel sok te yichʼoj tijera soknix yantikxan makinaetik, ya yichʼik pʼijubtesel swenta maba ya x-ejchʼentesotik yuʼun. Ya yichʼik pʼijubtesel ta swenta te bin-utʼil ya skanantay sbaik sok te bintik swentail te señalización sok te makinaetik te ya smojtesik ijkatsile. Jaʼnix jich ya yichʼik pʼijubtesel ta skanantayel sbaik yuʼun ma xyalik sok te lekuk ya stuuntesik te spojtsil sniʼik.

Te bin yilel ya xchiknaj te wayibal naetik te ayik ta oeste. Ta slajibal abril juʼ ta pasel te mukʼul aʼtelil ta wayibal naetik A, B sok D spisil te bintik yichʼoj te naetike soknix te kableetik yuʼun lus te la yichʼ otsesel. Ta wayibal na C (ma xchiknaj ta foto ini) jajch spotsikix ta yeso, ta sbonel te pajkʼ sok ta slapʼel te azulejos.

Chaʼtul j-aʼteletik ayik ta jun plataforma te ya xtoyotik moel, yakik ta yakʼel jun pintura especial yuʼun ma tsʼilaj te pajkʼe. Te aʼtelil ini yaniwan xjalaj cheb u ta spasel jujun te wayibal naetike.

Chaʼoxtul albañil yakik ta spasel pajkʼ te yichʼoj tut tonetik. Ta jun parte yuʼun te mukʼul na ini teyme ya yotsesik-a te biluketik sok yantikxan te bintik ya xtuune.

La yichʼ leel jtul buzo (te machʼa ya x-aʼtej ta yutil jaʼ) yuʼun ya sjel te pokol balbula te yichʼoj te pamal jaʼe. Ta ora ini jaʼxanix ya yichʼ pʼeel jun boton, yuʼun jich ya xko te jaʼ swenta maba ya xnojik ta jaʼ teme ay tal tulan yikʼal jaʼale.