Ayix tal veintiocho jaʼbil te ay kʼaxem ta 11,000 ta tul testigoetik yuʼun Jehová yijkʼitayojik snaik yuʼun yakʼoj sbaik ta abatinel ta spasel mukʼul naetik ta 120 nasionetik. Ya x-aʼtejik sok spisil yoʼtanik sok maba ya skʼan stojolik ta swenta te bitʼil tulan ya x-aʼtejik sok te bintik ya snaʼik spasele, sok jkʼaxel yakʼoj sbaik ta spasel te aʼtelil-abi.

Ay bayal ta tul te jaʼnix stojoj te spasajeik yuʼun ya xbajtʼik ta koltaywanej. Ay chaʼoxtul te jaʼ ya xbajtʼik-a te kʼalal skuxoj yoʼtanik ta yaʼtelik-ae sok ay yantik te ya skʼanik permiso ta yaʼtelik, manchukme snaʼojik te jtebnax ya yichʼik tojel yuʼune.

Te machʼatik jich spasojik-abi, maʼyuk jtuluk te yichʼoj sujele, jaʼiknix sok spisil yoʼtan la sjap sbaik ta spasel ta swenta yakʼbeyelxan yip ta scholel te lek yachʼil kʼop yuʼun te Ajwalinele (Mateo 24:14). Te Testigoetike ay spasojik mukʼul naetik te banti ya yichʼ pasel imprimir Bibliaetik sok junetik te lokʼemik ta Biblia, jichnix bitʼil ofisinaetik sok yantikxan naetik. Jaʼnix jich ay spasojik sNail mukʼul Tsoblejetik te yichʼoj 10,000 naktijibaletik sok sNail Tsoblejetik te yichʼoj 300 naktijibaletike.

Maba komen ta pasel te naetik-abi. Te Betel te ay ta jujun nasion jaʼ ya yilik te bintik ya xtuun yuʼunik ta jujun kʼajkʼal te machʼatik ya spasik te aʼtelile. Ya yichʼik akʼbeyel te banti ya xwayike, te sweʼelike sok ya yichʼik sakʼbeyel te skʼuʼ spakʼike. Te Testigoetik te banti ya yichʼ pasel te nae jaʼnix jich sok sbujtsʼ yoʼtan ya xkoltaywanik ta aʼtel-euk.

Swenta ya yichʼ chajpanel sok te bitʼil ya yichʼ pasel te mukʼul aʼtelil ini, ta yaʼbilal 1985 jajch te programa yuʼun spasel naetik ta swolol Balumilal. Te machʼatik ya skʼan ya x-aʼtejik ta swenta-abi, ya skʼan te ayuk 19 yaʼbilal kʼalal ta 55 sok ayuk bin ya snaʼik spasel ta swenta te naetike. Te machʼatik ya x-aʼtejik ta spasel te naetik-abi ay ya xjalajik ta cheb semana, ta oxeb u sok ay ya xjalajik ta jun jaʼbil o kʼaxemxan-a.

Teme nujpunem te hermano te yak ta aʼtel ta swenta spasel te naetike, jaʼukmeto teme maʼyuk bin ya snaʼ spasel te yinam ta swenta te aʼtelile, ya yichʼ akʼbeyel snop aʼteliletik jich bitʼil ta schuktiklanel te bariyaetik te pasbil ta hierro, slapʼel asulejoetik, sjuxel o sbonel biluketik. Jaʼnix jich ya xjuʼ xkoltaywan ta spasel te weʼelil yuʼun te machʼatik ya x-aʼtejike o ta skusel te banti ayik ta nainele.

Te kʼalal ya sujtik bael ta snaik te machʼatik ya xkoltaywanik ta aʼtele, ay chaʼoxtul ya stsʼibay skartaik ta swenta yalel wokol. Ay jtul hermano sok yinam te jich la stsʼibayik: «Ya jkʼan ya kalbeyexkotik bayal wokol ta swenta te la awakʼ aʼtejonkotik ta Betel yuʼun Budapest. Te kermanotaktik ta Hungría kʼax lek yoʼtan la yakʼik ta ilel sok ya snaʼik yalel wokol. La yakʼbonkotik bayal mel-oʼtan te kʼalal lokʼonkotik tal tey-a te kʼalal kʼaxix jun u-ae, stalel te jich ya kaʼiy jbatike. Teme juʼ kuʼunkotike ya jkʼantik ya xchaʼsujtonkotik ta yorail primavera. Ta jujun u te banti kʼaxemonkotik ta aʼtele, jaʼik te kʼax yakʼojbotik stseʼelil koʼtankotike».