Te libro te tulan skʼoplal ta yoʼtanik te stestigotak te Jehovae, jaʼ te Bibliae. Spisil-ora ya jtuuntestik ta snopel sok te kʼalal ya jnojptestik te ants winiketik ta swenta te lek yachʼil kʼop yuʼun te Ajwalinel yuʼun te Diose (Mateo 24:14). Ta melel ya stsʼiʼlaj ta oranax yuʼun te bitʼil bayal ya yichʼ tuuntesele. Jaʼ yuʼun la yichʼ pasel tulan te kʼalal la yichʼ chaʼilel te Traducción del Nuevo Mundo ta inglés ta yaʼbilal 2013 te manchuk ya stsʼiʼlaj ta oranax sok te tʼujbiluk ta ilele.

Te machʼatik yichʼoj yaʼtelik ta imprenta yuʼun te stestigotak te Jehová ta Estados unidos, la yalbeyik te machʼa ay ta swenta jun empresa te banti ya yichʼ nupʼtiklanel te libroetik te ya skʼanik junuk Biblia te manchuk ya tsʼiʼlaj ta oranaxe. Jich la yal te winike: «Te Biblia te ya akʼanike maʼyuk ya yichʼ pasel. Te bitʼil yichʼtiklanoj pasel te Bibliae jteb ma spisiluk jaʼnax ya xtuun ta schʼalil mesa o te banti ya yichʼ akʼel te libroetike, ma yichʼojuk pasel swenta ya xjalaj bayal tiempo».

Te Traducción del Nuevo Mundo te lokʼesbil ta snailaltoe ya xtojch ta oranax-a spate. Te Bibliaetik-abi ya xtojch ta oranax te banti kʼux kʼajkʼale o te banti ay sike. Swenta ya yichʼ pasel Bibliaetik te ya xjuʼ ta tuuntesel ta jujun kʼajkʼale sok ta bayuke, te machʼatik ya x-aʼtejik ta imprenta la yilik ta lek te bintik material ya stuuntesik ta swenta spat te Bibliae, jaʼnix jich te bin la stuuntesik ta spakʼel-ae soknix te bitʼil la snupʼtiklanik te pajinaetike. Te kʼalal la yilik spisil-abi, la spasik imprimir chaʼoxpajk Bibliaetik te banti jaʼ la yakʼbeyik spatin te yachʼil material yuʼun ya spasik ta prueba yan buelta. Ta patil la skʼanbeyik chaʼoxtul testigoetik yuʼun Jehová te akʼa stuuntesik bayal tiempo te Bibliae, jich bitʼil ta kʼixin kʼinal sok ta yantik lugar te banti ay bayal sike, jich bitʼil te Alaska.

Wakeb u ta patil te Testigoetik-abi la sutik tal te Bibliae. Te machʼatik ya x-aʼtejik ta imprenta la yilik ta lek te Bibliaetik-abi swenta la slekubtesikxan yuʼun la schaʼpasik imprimir Bibliaetik. Te jayeb la yichʼ pasele jaʼ 1,697 ta pajk. Ay chaʼoxpajk te maba jich nopbil te bitʼil la yichʼ pasel ta pruebae. Jich bitʼil, ay jpajk te sjunal ajkʼabal achʼ ta jaʼal sok ay yan te mul koel ta jaʼ te kʼalal kʼax tulan yikʼal jaʼale. Spisil te bitʼil la yichʼ pasel ta prueba te Bibliae sok te bitʼil maba nopbile, chiknaj ta ilel te binxan ya skʼan pasbeyele.

Te kʼalal yak ta pasel ta prueba-a te Bibliaetike, ta yaʼbilal 2011 la yichʼ manel mukʼul makinaetik te oranax ya spas imprimir te ya yichʼ tuuntesel ta imprenta te ay ta lum Ebina (Japón) sok ta Wallkill (Nueva York, EE. UU.). Te kʼalal jich la yichʼ pasele ma jaʼuknax ta skaj te ya yichʼ paselxan Bibliaetik yuʼun ya yichʼ tikunel bael te jayeb kʼanbile, jaʼ ta swenta te pajaluknax te bitʼil ya yichʼ pasel imprimir.

Ta sjajchibal tal yaʼbilal 2012, te cheb imprenta jajchik ta spasel imprimir te Traducción del nuevo mundo te lokʼ ta yaʼbilal 1984 te ijkʼ sok tsajtsajtik te spate, jajch ta pasel ta yachʼil material te jaʼ jun plastiko poliuretano sbiile. Jaʼukmeto te spate kajik ta tsʼiʼlajel te kʼalal la yichʼik lapʼel sok te pajinaetik yuʼun te Bibliae. Melel te bin la yichʼ lapʼel-ae soknix te spat te la yichʼ tuuntesel ta makinaetike maʼyuk yichʼoj tuuntesel-a te kʼalal la yichʼ pasel ta prueba te spat te Bibliaetike. Manchukme la yichʼ pasel tulan yuʼun kʼan slekubtesik, jaʼukmeto lajnanix yichʼ komel-a te bitʼil yak ta pasel imprimir.

Ay jun empresa te ya spas jun material te la yichʼ tuntesele, la yal te yuʼun-nanix jich ya spas-a ta skaj te kʼune sok te wokol-laj ta lekubtesele. Manchukme jich-abi, te machʼatik swentainojik te imprenta mananix la skʼan slokʼesik Bibliaetik-a te tulanik spate. Yakʼojnanix ta yoʼtanik-a te ya slokʼesik Bibliaetik te kʼunik spate sok te maba ora ya stsʼiʼlaje. Chaneb u jalajik ta spasel prueba sok yantik slapʼjibal te pajinaetik sok te spojtsile. Jaʼto te kʼalal la staik te bitʼil lek jilix-ae. Jaʼ yuʼun chaʼjajchik ta pasel imprimir te Bibliaetike.

Ta yuilal septiembre yuʼun 2012, te machʼatik ya x-aʼtejik ta imprenta la yichʼik albeyel te manchuk ya spasikxan imprimir Bibliaetik sok te yakuk slajinik spukel te jayeb pasbilixe sok yakuk smaliyik te Traducción del Nuevo Mundo te la yichʼ chaʼilele. Te yachʼil Biblia-abi la yichʼ akʼel ta ilel ta 5 yuʼun octubre ta yaʼbilal 2013 ta tsoblej yuʼun jujun jaʼbil yuʼun organisasion te Watch Tower Bible and Tract Society of Pennsylvania.

Ta 9 yuʼun agosto ta 2013 te cheb imprenta la yichʼik tikunbeyel te archivos electrónicos ta swenta te Traducción del Nuevo Mundo te la yichʼ chaʼilele, ta yan kʼajkʼalnax jajch ta pasel imprimir te Bibliae. Te bin-ora lokʼ te sbabial Biblia te la yichʼ pasel imprimir ta spajkale jaʼ ta 15 yuʼun agosto. Te imprenta yuʼun Estados Unidos sok Japón aʼtejik jukeb semana ta kʼajkʼal ajkʼabal. Jaʼ jich la yichʼik akʼbeyel jujun sBibliaik te machʼatik kʼotik ta tsoblej yuʼun jujun jaʼbile.

Manchukme kʼax tʼujbil te yachʼil Bibliae sok te ma stsʼiʼlaj ta orae, ma jaʼuk bayal skʼoplal te bitʼil kʼax lekik te material la yichʼ tuuntesele, jaʼ bayalxan skʼoplal te bin ya yal te Biblia te ya yakʼ kolele. Jtul ants ta Estados Unidos te kʼalal yichʼojix-a te Bibliae jich la stsʼibay ta yan kʼajkʼal: «Ta swenta te la yichʼ chaʼilel ta lek te Bibliae ya xkʼotxan lek ta koʼtan».