Te kʼalal ya akʼan jpajk Biblia te pasbil ta braille yuʼun te stestigotak Jehová, ilawil nailuk teme ay mukʼ yawil awuʼun te banti ya awakʼe. Te Traducción del Nuevo Mundo te pasbil ta braille ay ta kʼopil inglés, español sok italiano ay yichʼoj 18 kʼalal ta 28 ta pajk libroetik te ya xjuʼ smak cheb metro (6 pies, 5 pulgadas) te yawile.

Jaʼnix jich ay yan bin-utʼil ya xjuʼ ta kʼoponel te Biblia te ma jaʼuk te ay ta spajkʼalpajkʼe. Ay makinaetik te ya xjuʼ ta tsʼibayel tey-a te braille sok kʼalal ya akʼan ya anaʼ stojol te bin la yichʼ tsʼibayele ya xjuʼ ya ale te kʼalal ya atijbey te botonetik te yichʼoj letraetik yuʼun braille. Te machʼatik ma xyilik kʼinale, jaʼnix jich ya xjuʼ ya snaʼik te bin ya yal te junetik kuʼuntik te kʼalal ya stuuntesik jun programa te ya xjuʼ ya skʼopon ta tulan te bin tsʼibaybil ta pantaya yuʼun te komputadorae.

Jaʼnix jich te stestigotak Jehová ay la spasik jun programa yuʼun komputadora te banti stukel ya skʼatpʼun ta braille ta yantik kʼopil te bin ya yichʼ tsʼibayele. Te bitʼil la yichʼ pasel te programa-abi, jaʼ te ya snaʼ bitʼil ya yichʼ tsʼibayel te jujun letraetik ta braille. Te kʼalal juʼix ta spasel-abi, spisil te bin ya yichʼ tsʼibayele ya xjuʼ skʼases ta braille. Ta swenta te bitʼil tsʼibaybil ya xjil ta braille, maba tulan ta kʼoponel ya yaʼiyik te machʼatik ma xyilik kʼinale. Ta swenta te programa-abi, ya xjuʼ ta tsʼibayel biluk kʼopil teme ay ta braille, tey ochem-euk-a te kʼopiletik te ya stuuntesik yantik letraetik te ma jnaʼbeytik sbae.

Ay kʼaxemix tal cien jaʼbil te stestigotak Jehová yakik ta spasel junetik te lokʼemik ta Biblia ta braille, ta ora ini yak ta pasel ta 19 ta chajp kʼopil. Jaʼ-abi maba ya yichʼ kʼanbeyel stojol, jaʼukmeto bayal ta tul ya yakʼ stakʼinik te jich yipal ya xlokʼ ta yoʼtanike.

Ta xcheʼyoxebal tal jaʼbile, te kʼalal ya yichʼ akʼel ta naʼel ta mukʼul tsoblej yuʼun te stestigotak Jehová te ya xlokʼ yachʼil junetike, tey ya yichʼ alel-a te ya xjuʼ ya skʼanik ta patil te junetik ta braille. Jaʼukmeto te yan tal jaʼbile, te Betel yuʼun Estados Unidos la sjojkʼoylan swenta ya snaʼ-a te bin mukʼul tsoblejil ya xbajtʼik te ants winiketik te ma xyilik kʼinal te yananix stsob sbaik sok-a te stestigotak Jehová sok te bin formato ya skʼanik te junetik (ta jun o ta makinaetik te ya xjuʼ ta tsʼibayel tey-a te braille o jun programa te ya xjuʼ ya skʼopon ta tulan te bin tsʼibaybil ta pantaya).

Te yachʼil junetik te lokʼ ta braille la yichʼ tikunel bael ta mukʼul tsoblejetik te banti kʼotik te machʼatik ma xyilik kʼinale, te jich pajal la yichʼik sjunik sok te yantike. Ta swenta te formatos electrónicos la yichʼ tikunel bael ta correo electrónico ta jujuntul te ants winiketik te kʼalal ay kʼaxemix jun semana-a te la yichʼ pasel te tsobleje.

Jtul testigo ants te ma xyil kʼinal jich la yal: «Jaʼ jun bendision la kil kʼalal pajal la kichʼtik sok te yantik te yachʼil junetik lokʼe. Ta Salmo 37:4, jamal ya yal te Jehová te ya yakʼbotik te bintik ya skʼan te koʼtantike. ¡Ta tsoblej ini jich la yakʼ ta ilel!». Ay yan Testigo te okʼe sok jich la yal: «Ta swenta ini ya yakʼ ta ilel te ay jkʼoplal ta yoʼtanike. Ya kalbey wokol yuʼun te Jehová te bitʼil bayal ya skanantayotike».