Swenta ya yichʼ paselxan Bibliaetik ta lujo sok te tulan spate, te stestigotak Jehová la yotsesik yachʼil makinaetik yuʼun snupʼtiklanel junetik ta imprenta yuʼunik ta Japón, te ay ta mukʼul lum Ebina.

Te wokolil la yichʼ tael ta nailal ta swenta spasel te aʼtelil ini, jaʼ te bitʼil tuchʼ te lusetik ta swenta te tulan nijkʼel sok te tsunami (nijkʼel ta yutil mar) te kʼax ta 11 yuʼun marzo 2011.

Ta spisil-abi, jajch ta tsaktiklanel te makinaetik ta septiembre ta jaʼbilnix-abi, ma sta oxeb u te yachʼil makina yuʼun snupʼtiklanel junetik jajch ta aʼtel. Te bin nail la slokʼesike jaʼ te Traducción del Nuevo Mundo ta kʼopil chino.

Te makina yuʼun snupʼtiklanel junetik ini, te kʼalal ya x-och ta makina te june jaʼto te kʼalal ya xlokʼe, ya xbeen 400 metro (1,300 pies) te bitʼil pasbile, stukel ya x-aʼtej. Ta nail ya slapʼtiklan te lejchel junetik sok ya spas ta libroetik. Ta patil ya snupʼtiklan sok ya slats. Ta slajibal ya yotses ta kajaetik te yichʼ akʼbeyel sello yuʼun jich ya yichʼ akʼel ta plataforma te pasbil ta teʼe.

Swenta lek ya xlokʼ ta pasel te aʼtelile, la skʼan chajpanel ta lek te bintik ya skʼan pasele. Swenta ya yichʼ tikunel bael te makinaetike, la yichʼ akʼbeyel sello, la yichʼ potsel sok la yichʼ otsesel ta 34 kajaetik yuʼun makina (contenedores) te lokʼ bael ta Europa kʼalalto ta Japón.

Ay lajuntul te machʼatik yakik ta aʼtel ta sucursal yuʼun te stestigotak Jehová ta Estados Unidos bajtʼik kʼalal ta Japón ta spasel te aʼtelil ini. Ay chaʼoxtul te jalajik wakeb u tey-a swenta ya snojptesik ta stijel te makina te machʼatik ya x-aʼtejik ta sucursal yuʼun Japón sok te bitʼil ya skʼan ya skanantayel te makinae.

Te yachʼil makina yuʼun te snupʼtiklanel junetike, chajpnax la yilik-a te yajwal yantik empresa yuʼun snupʼtiklanel junetik sok te yantik imprenta ta Japón. Te 19 yuʼun marzo ta 2012, kʼaxem ta cien ta tul te machʼa swentainojik-abi te empresa la yulaʼtayik te sucursal sok chajpnax la yilik-a te yachʼil makinae.

Te kʼalal nopol ya xbajtʼikix-ae, ta jujuntul la yichʼik kʼebanbeyel pajkuk te Traducción del Nuevo Mundo te jaʼ slokʼesoj te yachʼil makina yuʼun te snupʼtiklanel junetike.

Ta ora ini te sucursal ta Japón yakix ta slokʼesel-euk te Biblia te tulan spat jichnix bitʼil ya spasik ta sucursal ta Estados Unidos sok Brasil ta swenta te stestigotak Jehová.

Te Testigoetik yuʼun Jehová soknix te yantik j-aʼteletik ta yan empresa te la spasik te aʼtelil ini, leknax la yaʼiy sbaik te junax aʼtejike. Ay jtul te machʼa ya x-aʼtej ta yan empresa jich la yal: «Jich ya kaʼiy te jfamilia jbatike».

Te kʼalal juʼix ta pasel-a te aʼtelile, ay yan j-aʼtel te jich la yale: «Te yan kaʼtele tulan ya xbajtʼ kaʼiy spasel, melel ma lamaluknax yoʼtan ya x-aʼtejik jich bitʼil ta Watchtower».