«Ya jkʼan te yakuk xbaat te banti ya yichʼ pasel grabar ta Colombia Nueva York, yuʼun ya xbajtʼ akʼajintay junuk te kʼayojiletik kuʼuntike sok swenta lek ya yichʼ pasel grabar. Mame ayuk machʼa xa awalbey yaʼiy.»

Ta slajibal jaʼbil bael yuʼun 1913 te William Mockridge la spas te aʼtelil te la yichʼ kʼanbeyel yuʼun te Charles Taze Russell. a Jaʼ te kʼayojil-abi sbiilinej «The Sweet By-and-By» («El día sin igual», la yichʼ pasel grabar ta discoetik te ya yichʼ tuuntesel ta yorail-abi. Ta patil, te William la snaʼ stojol te ya yichʼ tuuntesel te música te la spas grabar kʼalal ya xjajch ta ilel te «Foto-Drama de la creación», jaʼ te banti la yichʼ kʼasesel pelikulaetik sok lokʼombaetik te bontiklanbil ta sba cristal, te kʼalal yak ta akʼel ta ilel-abi, pajal ya yichʼ tijel sok te grabacionetik yuʼun discurso te lokʼemik ta Biblia sok cheʼoxebuk música. Te banti nail la yichʼ akʼel ta ilel te «Foto-Drama» jaʼ ta Nueva York ta enero yuʼun 1914.

Te grabación la spas te William ay jun ya xchiknaj ta aʼiyel tey-a te banti 50 disco la yichʼ tuuntesel te kʼalal la yakʼik ta ilel te «Foto-Drama» te ay ta inglés. Jteb ma spisiluk te música te la yichʼ tuuntesel ta «Foto-Drama» ma jaʼuk la spas te organización yuʼun te Machʼatik la snopik te Bibliae. Jaʼukmeto te organización-abi la skʼanbey bayal hermanoetik jich bitʼil te William te yakuk spasik kʼayojiletik. Ayix-a te musicae jaʼnax yuʼun te bin ya yal te kʼayojile la yichʼ lokʼesel tal ta sjunal kʼayojil Himnario de la Aurora del Milenio te ay ta inglés te jaʼ yuʼun te Machʼatik la snopik te Bibliae.

Ay bayal jaʼbil te stestigotak te Jehová la skʼajintayik kʼayojiletik te tsʼibaybil yuʼun yantik ants winiketik, jaʼukmeto te kʼalal maba pajal sok te bintik kʼoem ta yoʼtanik ta swenta te Bibliae, la sjelbeyik chaʼoxpʼal te kʼopiletik yuʼune.

Jich bitʼil ay jun kʼayojil te la yichʼ tuuntesel ta «Foto-Drama» te sbiilinej «Our King Is Marching On!» («¡Aquí está nuestro rey!», te ya xchiknaj ta sjunal kʼayojil ta Himnario de la Aurora del Milenio ta ay ta español), jaʼ jun kʼayojil te la yichʼ jelbeyel chaʼoxpʼal kʼopiletik yuʼun te kʼayojil sbiilinej «The Battle Hymn of the Republic» (Te kʼayojil ta swenta guerra yuʼun te República). Te bitʼil ya xjajch te kʼayojil-abi, jich ini: «Te jsite la yilbeyix yutsilal te bitʼil ya xtal te Kajwaltik». Jaʼukmeto te Machʼatik la snopik te Bibliae la sjelbeyik te kʼopiletik yichʼoj te jich la yalike: «Te jsite la yilix te liʼ ayix te Kajwaltike». Ta swenta te bitʼil la sjelbeyik te kʼopiletik yichʼoj te kʼayojil-abi, jich la yakʼik naʼel te bitʼil kʼoem ta yoʼtanik te maba ajkʼnax ya xtal te Jesuse, melel jaʼ ya yakʼ ta naʼel te ayix ta Ajwalil te Cristoe (Mateo 24:3).

Ta yaʼbilal 1996 la yichʼ lokʼesel te «Cantando y acompañándose con música en su corazón». Te yachʼil sjunal kʼayojil-abi, jaʼ la spasikix te stestigotak te Jehová swenta maba ya stuuntesikix te musicaetik yuʼun yantik ants winiketik sok yantik relijionetik. Ta jaʼbilnix-abi, te stestigotak te Jehová la schajpanik jun orquesta swenta ya spasbeyik grabar musica yuʼun te 119 kʼayojiletik te ay ta sjunal kʼayoje. Te grabacionetik-abi, la yichʼ tuuntesel ta congregacionetik swenta ya yichʼ kʼajintayel ta tsoblejetik, jaʼnix jich ay chaʼoxtul testigoetik yuʼun Jehová te la stij yaʼiyik ta snaik.

Ta 2009 te stestigotak te Jehová la slokʼesik yan sjunal kʼayojil te sbiilinej Cantemos a Jehová. Jaʼnix jich la spasik grabar coro sok orquesta ta bayal ta cien kʼopil. Ta 2013 jajch slokʼesik videoetik yuʼun música ta swenta alaletik. Ta spisil ay jun te sbiilinej Spisil-ora ya xjuʼ jkʼopon Dios. Ta jujun u ya yichʼ pasel descargar bayal millón kʼayojiletik ta jw.org.

Bayal ta tul ants winiketik yalojik wokol ta swenta te musicaetike. Ay jtul ants te jaʼ sbiil Julie, jich la stsʼibay ta swenta te sjunal kʼayojil Cantemos a Jehová: «¡Kʼax tʼujbilik te bin ya yal te yachʼil kʼayojiletike! Te kʼalal jtukel ayone, ya jtij kaʼiy te kʼayojiletik te banti ya yal te bin yaʼiyel ya kaʼiy jbae. Ta swenta-abi ya yakʼbon jnaʼ te bitʼil yak ta mukʼubel te schʼuunel koʼtan ta stojol te Jehovae. Kakʼoj ta koʼtan te ya kakʼbey Jehová te bintik lek ya xjuʼ jpas ta stojole!».

Te Heather, ay chaʼtul alaletik yuʼun, ay jtul te jukeb yaʼbilal sok baluneb yaʼbilal te yane, la stsʼibay ta swenta te video te sbiilinej Spisil-ora ya xjuʼ jkʼopon Dios te bayalaj tijbot yoʼtanik te alaletik yuʼune. Jich la yal: «Jaʼ tijbotik yoʼtan yuʼun ta skʼoponel te Diose, ma jaʼuknax te kʼalal ya xjajchik ta wayel o te kʼalal sjokinejonkotike, ya skʼoponik Dios ta bayuk sok biluk ora te ya skʼan yoʼtanike».