Ta swolol Balumilal ay ants winiketik te ya skʼoponik te junetik te lokʼemik ta Biblia te ya slokʼesik te stestigotak te Jehovae. Bayal millón ta tul ya skʼoponik ta formato electrónico (computadora, celular sok yantikxan) te bintik ya jpukbeytik skʼoplale, jich bitʼil yakat ta spasel ta ora ini. Jaʼukmeto chajpnaxniwan ya awaʼiy-a te kʼalal ya anaʼ stojol te tulan aʼtelil yuʼun spasel imprimir te ya jpaskotike. Ta 2013 la jlokʼeskotik junetik te lokʼemik ta Biblia ta 700 kʼopiletik, te ya yichʼ pukel ta 239 nacionetik sok yantik lumetik.

Te kʼalal mato sta 1920 yantik empresa ya slokʼesik-a te junetik kuʼunkotike. Jaʼukmeto ta jaʼbil-abi, jajch jlokʼeskotik cheʼoxeb revistaetik sok folletoetik ta tut na te la yichʼ majanel te ay Brooklyn (Nueva York, Estados Unidos). Manchukme kʼax tut-a te kʼalal jajchotike, jaʼukmeto ta kʼajkʼal ini ayix 15 imprenta kuʼunkotik ta yantik lugaretik yuʼun África, América, Asia, Europa sok Oceanía.

Te libro te ya jpaskotik imprimir te bayal skʼoplale, jaʼ te Bibliae. Te sbabial Biblia te la jlokʼeskotike jaʼ te King James Version (Versión del Rey Jacobo), ta jaʼbil 1942. Jaʼukmeto kʼalalto tal ta 1961 jchajpnax versión yuʼun te Biblia ta junax volumen yakotik ta slokʼesel te Traducción del Nuevo Mundo de las Santas Escrituras ta inglés. Ta 2013 ay jlokʼesojkotikix kʼaxemto ta 184 millón ta pajk Biblia ta 121 kʼopiletik.

Jaʼukmeto te bin la yichʼix alele ma spisiluk ya yakʼ jnaʼtik. Te Bibliaetik te ya jlokʼeskotike ya jpaskotik ta lekil junetik. Ya yichʼ tuuntesel junetik te maba yichʼoj ácido, yuʼun jich maba ya xkʼanub te kʼalal ya xkʼax bael te kʼajkʼale. Jaʼnix jich te paginaetik yichʼoje lapʼtiklanbil ta lek. Ta swenta-abi jaʼ pajk Biblia te ma orauk ya xchʼiʼ te kʼalal ya yichʼ tuuntesele.

Jaʼnix jich ya jpaskotik imprimir junetik te ya xkoltayot te ants winiketik yuʼun ya xkʼot ta yoʼtanik te Bibliae. Kiltik cheʼoxebuk datos yuʼun te jaʼbil 2013.

• Te La Atalaya, jaʼ te revista te bayal skʼoplal te ya jlokʼeskotik ta spisil-orae. Ya yichʼ pasel imprimir ta kʼaxemto ta 210 kʼopiletik, jaʼ te revista te bayal ya yichʼ pukel ta swolol Balumilale. Te jujun número yuʼun te revista ini te yichʼoj 16 página ayniwan 45 millón ya yichʼ pasel imprimir.

• Te ¡Despertad!, jaʼ te revista te jaʼ sjoy te La Atalaya, jaʼ schebal lugar te bayal ya yichʼ pukel ta swolol Balumilal. Ya yichʼ lokʼesel ta 49 kʼopiletik. Te jujun número yuʼun te revista ini ayniwan 44 millón ya yichʼ pasel imprimir.

• ¿Bin ya yakʼ ta nopel ta smelelil te Bibliae? jaʼ jun te libro te kʼunax spat pasbile, yichʼoj 224 página te la yichʼ lokʼesel ta swenta skoltayel te ants winiketik ta snopel te bin ya yakʼ ta nopel te Bibliae. Kʼalalto tal ta 2005 ay yichʼojix pasel imprimir kʼaxemto ta 214 millón ta kʼaxem ta 240 kʼopiletik.

• Chʼama awaʼiy te bin ya yal te Diose, jaʼ te folleto te yichʼoj 32 página te la yichʼ lokʼesel ta swenta skoltayel te machʼatik ma snaʼik lek skʼoponel te june. Ya schol te bin ya yakʼ ta nopel te Biblia ta swenta tʼujbil lokʼombaetik sok ta chaʼoxpʼalnax kʼopiletik. Ay yichʼojix pasel imprimir kʼaxemto ta 42 millón ta kʼaxem ta 400 kʼopiletik.

Ma jaʼuknax-abi, melel ay bayal yantik libroetik, folletoetik sok tratadoetik ya jpaskotik imprimir ta swenta skoltayel te ants winiketik yuʼun ya stabeyik sujtib te jojkʼoyeletik te bayal skʼoplale, ta sitintayel te kʼopetik yuʼunike sok te bitʼil ya xjuʼ ya staik tseʼel-oʼtanil ta sfamiliaik. Ta jaʼbil 2012 te imprenta kuʼunkotike la spas imprimir kʼaxemto ta 1,300 millón revistaetik sok 80 millón ta pajk libroetik sok Bibliaetik.

Te naetik te banti ayik te imprenta kuʼunkotike ya sbiilin Betel te ya skʼan ya yal «sNa Dios». Te machʼatik ya xkʼotik ta yulaʼtayel ini chajpnax ya yilik-a te aʼtelil te ya yichʼ pasel ta swenta slokʼesel te junetike. Winiketik sok antsetik te maba ya skʼan stojolik ya yakʼ stiempoik sok yipik ta spasel te aʼtelil ini. Te kʼalal ya xkʼotik ta Betel, jteb ma spisiluk te ma snaʼik te bitʼil ya skʼan pasel imprimir te junetike. Jaʼukmeto ay jun programa te banti ya yichʼik nojptesel tey-ae, yuʼun jich ya snopik spasel te aʼtelile. Jaʼ yuʼun maba chajpnax ya kiltik te ay jchʼieletik te ayik ta 20 bael yaʼbilalik te ya snaʼik lek stijel makinaetik te oranax ya x-aʼtejik ta spasel imprimir 200,000 revistaetik te yichʼoj 16 página ta junax hora.

Te takʼin te ya yichʼ tuuntesel te swenta te aʼtelil te ya jpaskotik ta swolol Balumilale, ya xjuʼ ta pasel ta swenta te takʼin te ya yichʼ akʼel te jayeb ya xlokʼ ta koʼtantike. Te La Atalaya te lokʼ ta agosto yuʼun 1879 te jich naʼbil sba-a te bitʼil Zion’s Watch Tower (La Torre del Vigía de Sión), la yal ta jamal te jaʼ ya kichʼkotik koltayel yuʼun te Diose. Sok jich la yalxan: «[Te organización kuʼunkotike] maʼyuk bin-ora ya xbajtʼ yaʼiy kʼanbajel sok ta skʼanbeyel stakʼin te ants winiketike». Jaʼnix jnopojkotik ta kʼajkʼal ini.

¿Bin yuʼun te ya kakʼtik bayal tiempo, takʼin sok te ya jpastik tulan ta spasel te aʼtelil ini? Yuʼun jaʼ ya jkʼankotik te kʼalal ya akʼopon jpajkuk te bayal millón Bibliaetik sok junetik te ya jpaskotik imprimir o te bintik ya jpukbeykotik skʼoplal ta Internet, ya skoltayat yuʼun ya xnoptsajat ta stojol te Diose.