Ta 14 yuʼun septiembre ta 2013, ayniwan 10,500 ta tul ants winiketik kʼotik ta graduación 135 ta Pʼijubtesel yuʼun sKʼop Dios ta Galaad yuʼun te Watchtower, te la yichʼ pasel ta snail pʼijubtesel yuʼun te stestigotak Jehová ta Patterson (Nueva York). Te eskuela ini, jaʼ ya schajpan te stestigotak Jehová te ayix bayal jaʼbil yakik ta scholel skʼop Dios yuʼun jich lek ya spasikxan te yaʼtelike.

Te Guy Pierce, te ochem ta Jtsojb Jwolwanejetik yuʼun te stestigotak Jehová, jaʼ la sjach te Programa. Te kʼopiletik la slokʼes ta Mateo 28:19, 20, te jun parte jich ya yal: «Bahanic, otsesahic ta jnopojel spisil te nacionetic,[...] ac’ticlambeya snopic te ya me sch’uhunic spasel spisil bintic la jpasex ta mandar».

Te hermano Pierce la yal ta swenta te kʼopiletik yuʼun te Jesuse teyto la stijbey talel yoʼtan-a te j-abatetik yuʼun Dios te jich yakikto ta spasel ta kʼajkʼal ini. Te jchʼuunjeletik yuʼun Cristo ya yakʼbeyik snop te machʼatik ya x-ochik ta jnopojele te yame schʼuunik spasel te mantalil la yakʼ jilel te Jesuse, te teynix ochem-euk-a te scholel te «lec yach’il c’op yu’un te cuentahinel yu’un Dios» (Mateo 24:14). Jich te yachʼil jnopojeletike ya x-ochik ta jcholkʼop sok ta jpʼijubteswanej yuʼun te Ajwalinel yuʼun Dios. Te hermano Pierce la yal ta swenta te aʼtelil ini, manchukme yak ta pʼolel te ants winiketik ta Balumilale, yak ta pʼolel-euk te lum yuʼun te Diose.

«Kʼaxemtoxan jich la yakʼik-a te bitʼil ya xjuʼ yuʼunik yakʼele.» Te Thomas Cheiky, te ochem ta Komite yuʼun Sucursal ta Estados Unidos, jaʼ la skʼases te discurso ini te lokʼem ta 2 Corintios 8:1-4. Manchukme kʼax ayik ta meʼbail te kongregasionetik ta macedonia ta sbabial siglo la skʼanik bayal wokol te yakuk x-aʼkʼotik ta skoltayel-euk te yermanotakik ta Jerusalén te ayik ta wokol-ae. Te machʼatik la yichʼik pʼijubtesel ta Galaad la yakʼik ta ilel-euk te slekil yoʼtanik soknix te bitʼil ya slokʼes sbaik ta yoʼtanike.

Jaʼ yuʼun, manchukme kʼax lek yoʼtanik te jchʼuunjeletik yuʼun Cristo ta Macedonia, maba la yijkʼitayik ta yakʼbeyel te bin ya xtuun yuʼunik te sfamiliaike sok maba la yijkʼitayik spasel te aʼtelil yuʼun te Diose. Te hermano Cheiky la yalbey te machʼatik la yichʼik pʼijubtesel te jichuk ya skʼayinbeyik stalel bitʼil te macedonioetik te ma junuknax bin bajtʼ ta yoʼtanik spasele.

«Lajix te pʼijubtesele». Te Samuel Herd, te jaʼnix jich ochem ta Jtsojb Jwolwanejetik, la yakʼbey smukʼul kʼinal yaʼiyik te machʼatik la yichʼik pʼijubtesel te manchuk ya schʼay ta yoʼtanik te bitʼil kʼaxik ta Pʼijubtesel ta Galaad. La scholbey skʼoplal te pajal kʼoem sok jun tʼujbil kʼayojil te ya xjuʼ ya jnaʼulantik ta sjunal kʼajkʼale, jaʼnix jich te bintik tʼujbil kʼax awuʼunik ta pʼijubtesel ini yame anaʼulanik sok yame smukʼubtesbeyex kʼinal awaʼiyik te jayeb kʼajkʼal kuxulexe.

Te hermano Herd la yalxan te maʼyuk slajibal te bin ay ta yoʼtan te Jehovae. Yakʼojbey sbiil spisil te bayal ta billon ekʼetik te ay ta stoyolil chʼulchane, sok maba ya schʼay ta yoʼtan junuk. (Salmo 147:4). Jaʼnix jich maba ya schʼay ta yoʼtan te Jehová te bitʼil tulan aʼtejik te machʼatik la yichʼik pʼijubtesele. Te Jehová skʼejoj ta yoʼtan te bintik tʼujbil ay yuʼunik ta jujuntule, sok maʼyuk machʼa ya xjuʼ ya yelkʼan te kʼulejalil stsobojik ta chʼulchane (Mateo 6:20).

Te hermano Herd la yalxan, teme skʼejoj ta yoʼtan Dios spisil te bitʼil la spasik tulan te machʼatik la yichʼik pʼijubtesele, jich bitʼil te la yakʼik ta ilel te skʼuxul yoʼtanike, maba chopol teme ya snaʼik spisil te bintik tʼujbil la spasik ta Galaad. «Te kʼalal ay stseʼelil awoʼtanik yuʼun te kʼalal ya xjul ta awoʼtanik te bintik tʼujbil la apasik ta pʼijubtesel ini, la yalbey te hermano herd te machʼatik la yichʼik pʼijubtesele, mame schʼay ta awoʼtanik te jaʼ ta swenta te Jehovae sok albeyaik wokol yuʼun. Mame schʼay ta awoʼtanik te bintik leke, melel te utsilaletike ma schʼay ta oʼtanil.

«Akʼame yakʼbeyex awipik te smukʼul yuʼel te Jehovae». Te Sam Roberson, jpʼijubteswanej yuʼun sKʼop Dios, la yakʼbey lekil tsitsel te machʼatik la yichʼik pʼijubtesel te kʼalal ya sitintayik jujun wokolil te jaʼuk ya smukʼulin yoʼtanik te yuʼel te Jehovae, ma jaʼuk te ya smukʼulin yoʼtan sbaik ta stukelike. Ta Efesios 3: 20 ya yal ta swenta te Dios «cʼax hich ya xhuʼ yuʼun spasel ta jtojoltic a te bin ya jcʼambetic o te ya xtal ta coʼtantic». Te bitʼil ya skoltayotik te Diose kʼax mukʼ te ma xjuʼ ya xkʼot ta koʼtantike. Ma tikʼuk-a te ya kaltik ta stojol Jehová te «cʼax hich ya xhuʼ yuʼun spasel» ta spisil te bin ya xtal ta koʼtantike, melel te versiculo ini ya yal te kʼax jich ya xjuʼ yuʼun spasel-abi.

Te Jehová ya yakʼbey te smukʼul yuʼel ta spisil te machʼatik jchʼuunjeletik yuʼun te Cristoe. Ta yorail wokolil, te Jehová jich kʼoem te bitʼil «machʼa bayel yip», o «jtul guerra-winic» (Jeremías 20:11, XCD). Te hermano Roberson la yalbey ta jamal te machʼatik la yichʼik pʼijubtesel te jaʼ ya xkoltayotik yuʼun Jehová ta stsalel biluk wokolil te ya staike.

«Mame xa achʼayik te lek akʼoplalik yuʼun te aʼtelil ta swenta te Ajwalinel yuʼun te Diose». Te William Samuelson, yan jpʼijubteswanej yuʼun sKʼop Dios, la schol ta swenta te aʼtelil yuʼun te Ajwalinel yuʼun Dios, te ay cheb te bin lek la yichʼik albeyel skʼoplal te machʼatik la yichʼik pʼijubtesele. Ta sbabial la yakʼik ta ilel te lek skʼoplalik ta nailal sok te kʼalal yakik ta yichʼel pʼijubtesel-ae. Ta schebal, te bitʼil jaʼ j-aʼteletik yuʼun te ajwalil te kʼax mukʼ skʼoplal ta chʼulchan sok ta Balumilal, te Ajwalinel yuʼun Dios ya x-akʼbotik ichʼel ta mukʼ sok lek skʼoplalik.

¿Bin ya spasik swenta ma schʼayik te lek skʼoplalike? Te hermano Samuelson la yakʼbey smukʼul kʼinal yaʼiyik te yakuk yalbeyik yutsil te Jehová sok te yakuk yichʼik ta mukʼ te yantike. Te Jesús jaʼnix jich la yichʼ ta mukʼ te machʼatik jokinot yuʼune, soknix te kʼalal la stsits sok te la stojobteslane. Jaʼnix jich, te jpuk-kʼop Pablo la yalbey yutsil te aʼtelil akʼbot yuʼun te Diose sok ma jaʼuk la sle te yutsil skʼoplale (Romanos 11:13). Teme jich ya spasik te machʼatik la yichʼik pʼijubtesele, kʼax lekxan skʼoplal ya yichʼik albeyel.

«Te yip te cawuhetic ay ta yehic». Te Michael Burnett, yan jpʼijubteswanej yuʼun sKʼop Dios ta Galaad, la yakʼ ta ilel teme ya jtuuntestik te bintik ya jnoptik ta tsoblejetik te kʼalal ya jcholtik te skʼop Diose yakotik ta spasel te albilkʼop te ay ta Apocalipsis 9:19. Soknix la yakʼik ta ilel chaʼoxtul te machʼatik la yichʼik pʼijubtesel te bin kʼax yuʼunik ta scholel te skʼop Diose. Ay jtul hermano la sjojkʼoybey jtul winik te ya x-aʼtej ta gasolinera: «¿Bin-ora jajch sok bin-ora laj te yorail te jyanlumetike?» (Lucas 21:24). Te kʼalal sujt yan buelta ta yilel te winike, la skoltay ta slebeyel sujtib te jojkʼoyele, la stuuntes te kapitulo 4 yuʼun te sjun Daniel sok te apéndice yuʼun te libro ¿Bin ya yakʼ ta nopel ta smelelil te Bibliae?

«La yichʼix yip te awoʼtanike». Te Adrián Fernandez, te jaʼnix Komite yuʼun Sucursal ta Estados Unidos, la snujpʼsitay chaʼtul te machʼatik la yichʼik pʼijubtesel te nujpunemike. Te hermano Helge Schumi la scholbey skʼoplal te bin ay ta Biblia ta swenta j-abatetik yuʼun Dios te la stoy sbaik kʼalal la yichʼik akʼbeyel mukʼ yaʼtelike, bayal skʼoplal te spisil-ora ya yakʼik ta ilel te pekʼel-oʼtanil te machʼatik ya yichʼik pʼijubtesel ta Galaad (2 Crónicas 26:16). Ta swenta te bin la yichʼix alele, te hermano Peter Canning mukʼ skʼoplal la yalbey te lekil tsitsel la yichʼ akʼel ta pʼijubtesel ta swenta te snopel yan kʼopil: «Mame xa atoy abaik, mame xa awichʼik ta mukʼ teme ay bin ma lekuk lokʼ ta alel awuʼunike». Te chantul la yichʼik nujpʼsitayel la yalik wokol ta swenta te bintik koltayotik yuʼun te pʼijubtesele: Akʼbot yipik ta spasel te yaʼtelik sok yip yoʼtanik (Hebreos 13:9).

«Haʼuc me tseʼel awoʼtanic yuʼun te tsʼihbabil ta chʼulchan te abihilique». (Lucas 10:20.) Te discurso te mukʼ skʼoplal ta programae jaʼ la skʼases te Geoffrey Jackson, te jaʼnix jich ochem ta Jtsojb Jwolwanejetik. Jich la yal ta swenta te ayix tal cheb jaʼbile, jteb ma spisiluk te machʼatik ya yichʼik pʼijubtesel ta Galaad maba ya yichʼikix tikunel ta jun territorio te banti maʼyuk machʼa scholoj skʼop Dios ta jkʼaxel tey-ae. ¿Binwan yaʼiyel ya skʼan ya yaʼiy sbaik?

Te kʼalal la yichʼik tikunel yuʼun Jesús te 70 ta tul jnopojeletik ta scholel te skʼop Diose, te kʼalal laj yoʼtanike, bayal stseʼelil yoʼtanik ta yalel te bitʼil juʼ yuʼunik slokʼesel chopol espirituetik ta swenta sbiil te Jesuse (Lucas 10:1, 17). Manchukme la yakʼ ta ilel stseʼelil yoʼtan-euk te Jesuse, jaʼukmeto jich la yal: «Pero ma me haʼuc tseʼel awoʼtanic yuʼun te acʼot ta acuentahic espírituhetic, haʼuc me tseʼel awoʼtanic yuʼun te tsʼihbabil ta chʼulchan te abihilique» (Lucas 10:20). Ta swenta-abi la yakʼbey snaʼ te jnopojeletik yuʼun te ma spisiluk-ora lek te bin ya staike. Jich yuʼun, ma jaʼuk ya skʼan ya xbajtʼ ta yoʼtanik te bintik lek ya staike, jaʼ ya skʼan ya yilik te junuk yoʼtanik ta stojol te Jehová yuʼun jich tsʼibaybil ta chʼulchan ya xkʼot te sbiilike.

«Te bin la yalbey Jesús te 70 ta jtul jnopojeletik yuʼune ay bin ya yakʼ jnoptik-euk» Te hermano Jackson, mukʼ skʼoplal la yalbey te manchuk jaʼuk ya xbajtʼ ta koʼtantik te bintik lek ya jtatik ta scholel te skʼop Diose, melel ma jaʼuk ya yakʼbotik sbujtsʼ koʼtantik sok ma jaʼuk ya yakʼ ta naʼel te jun koʼtantik ta stojol te Diose. Jaʼnax teme yuʼun-nix jun koʼtan jbatik sok-a te Jehovae sok teme ya jpastik tulan ta spasel te aʼtelil yuʼune, jaʼme ya yakʼbotik te smelelil sbujtsʼ-oʼtanil sok jich ya yilotik te Dios te jun koʼtantik ta stojole.

Te Jesús jaʼnix jich ay bintik la sta te chebajtesbot yoʼtan yuʼun te jichuke. Jich bitʼil ta jun buelta, bayal ta mil ants winiketik kaj ta tʼunel yuʼun te kʼalal la smakʼline (Juan 6:10-14, 22-24). Jaʼukmeto te kʼalal la yaʼiyik stojol jun nojptesel yuʼun te Jesuse, bayal ta tul te maba lek la yaʼiyik sok la yijkʼitayik stʼunel te Jesuse. Te tseʼel-oʼtanil yuʼun te bitʼil bayal ta tul la yichʼ tʼunel te Jesuse, oranax chʼay ta swenta te bayal sujtik baele (Juan 6:48-56, 60, 61, 66). Manchukme jich la spasik-abi, te jpuk-kʼopetike jun yoʼtan la yakʼ sbaik sok maba la yijkʼitayik te Jesuse. Ma jaʼuk bajtʼ ta yoʼtanik te bintik lek la staike, jaʼ bajtʼ ta yoʼtanik te jun yoʼtan ya yakʼ sbaik sok te lekuk ya x-ilotik yuʼun te Jehovae (Juan 6:67-69).

Slajibal. Te kʼalal la yichʼik akʼbeyel te sdiplomaik, ay jtul te machʼa la yichʼ pʼijubtesel te la skʼopon jun karta ta komon sitil ta swenta yalel wokol. Te hermano Pierce la yalbey skʼoplal te bin utʼil te balumilal maba ya yichʼ ta mukʼ te abatetik yuʼun te Diose, tey ochem skʼoplal-euk-a te machʼatik la yichʼik pʼijubtesel ta Galaad. (Hechos 4:13; 1 Corintios 1:27-31) Jaʼukmeto te Jehová lek ya yil te bitʼil la kakʼ jbatik ta stojole sok ya yakʼbotik te chʼul espiritu yuʼune. Maniwan chajpuknax ya yil-a te pʼijubtesel kichʼojtike, jaʼukmeto jich bitʼil la yal te hermano Pierce, te Jehová «chajpnax ya yil-a te jun koʼtantik ta stojole, te toj ya kakʼ jbatike sok te jaʼnax stukel ya kichʼtik ta mukʼe».