Naʼbeyaxan ta lek skʼoplal te tsoblejetik. Lea jun sNail Tsoblej te nopol ya xjil awuʼun yuʼun ya xbaat.

Jich bitʼil te testigoonkotik yuʼun Jehová ya jtsob jbakotik ta yichʼel ta mukʼ te Dios cheb buelta ta jujun semana (Hebreos 10:24, 25). Ta tsoblejetik ini te banti ya xjuʼ ya xkʼot spisil te ants winiketike, tey ya jnoptik-a te bin ya yal te Biblia sok te bin utʼil ya xjuʼ ya jpas ta jkuxlejaltike.

Jteb ma spisiluk te tsoblejetik ini ya yichʼ pasel sok jojkʼoyeletik te banti ya xjuʼ ya yakʼbeyik sujtib te machʼatik ya xkʼotik tey-ae. Spisil te tsoblejetik ya yichʼ jachel sok jun kʼayojil sok skʼoponel Dios, jaʼnix jich te kʼalal ya xlaj ta pasele.

Ma puersauk te testigoat yuʼun Jehová yuʼun ya xjuʼ ya xkʼoat, machʼauk ya xjuʼ ya xkʼot. Maba tojbil te ochibale sok maʼyuk machʼa ya skʼanbat takʼin tey-a.