YOSILAL MÉXICO. Li ta 4 yuʼun disiembre ta 2017, li ta s-estadoal Jalisco ta jun bikʼit lum ti Tuxpan de Bolaños sbie, jtsop krixchanoetik lik skontrainik li stestigotak Jeova ti jaʼik huicholetike. Laj yichʼik nutsel lokʼel 12 ermanoetik xchiʼuk 36 krixchanoetik ti naka to chkʼotik ta tsobajeletike. Li buchʼutik kontrainvanike ch-ilinik tajek ta skoj ti muʼyuk la tspasik li kʼusitik ta sventa li kʼin nopem xaʼiik spasel li j-huicholetike. Li kermanotaktike la skʼanbeik koltael ajvalil ta skoj ti chichʼik ilbajinele.

Li ajvaliletik ta Mexicoe chichʼik ta mukʼ li kʼusitik nopem xaʼiik spasel xchiʼuk kʼu yelan stalelik li j-huicholetike xchiʼuk ch-akʼbat spasik li kʼusi tskʼan stukike. Li ajvalil yuʼun li j-huicholetike, laj yal mantal ti xichʼik lokʼesel ta persa ta snaik li ermanoetike. Ta tsʼakale, la slokʼesik skotol li kʼusitik oy ta naetike xchiʼuk laj yichʼik batel li tiʼnaetike, li ventanae xchiʼuk li jol nae. Li kʼusi muʼyuk xichʼik batele, la sjipik komel ta skunetail karetera. Te iktaatik komel ta teʼtik li ermanoetike xchiʼuk albatik ti chmilatik mi chaʼsutik li ta jteklume.

Jun yajkʼopojel li Betel ta Méxicoe bat skʼel li buchʼutik laj yichʼik nutsel lokʼel ta slumalike sventa skolta ta mantal xchiʼuk tskʼel bu chvayik li ermanoetike. Li buchʼutik chkoltavanik ti jaʼik stestigotak Jeovae la xchiʼin sbaik ta loʼil xchiʼuk li direktor yuʼun ajvalil ta Jaliscoe. Li fiscal de derechos humanos, li fiscal regional xchiʼuk li director de atención a las víctimas del delito. Li ajvaliletik liʼe yakalik xa sabel skʼoplal.

Li Gamaliel Camarillo ti jaʼ yaj kʼopojel li stestigotak Jeova ta Mexicoe, xi chale: «Toj chopol chkilkutik li kʼusi chichʼ pasbel li kermanotakutike. Li stukike mu snaʼ saʼik kʼop li ta slumalike xchiʼuk tstsakik ta venta li kʼusi nopem xaʼiik spasel li ta slumalike, yichʼik ilbajinel ta skoj noʼox ti mu skʼan spasik li kʼusi tspas yan relijione xchiʼuk ti mu stakʼ spas chaʼiik ta skoj li sjol yoʼontonike. Jmalaojkutik ti oyuk xa noʼox kʼusi spasik li ajvaliletik tee sventa mu xa jechuk xichʼik pasbel».

Ta jpaskutik orasion ta stojolal li ermanoetik ti laj yichʼik pojbel snaik xchiʼuk skotol li kʼusitik oy yuʼunike. Jnaʼojkutik ta melel ti jaʼ tstunes Jeova li s-organisasion sventa skoltaoxuke (Isaías 32:2).

Contactos para la prensa:

Internacional: David Semonian, Oficina de Información, +1 845 524 3000

México: Gamaliel Camarillo, +52 555 133 3048