Li smeʼ nail abtelal yuʼun stestigotak Jeovae yakal tskʼelbe skʼoplal li kʼusitik chkʼot ta pasel yuʼun jun achʼ chamel coronaviruse (COVID-19). Jech kʼuchaʼal chal li Vivliae, li chameletike jaʼ jun senyail ti ta slajebal xa kʼakʼal kuxulutike (Lukas 21:11). Kʼalal ch-ayan jun chamele, skʼan me oyuk kʼusitik chlik jpastik sventa jchabi jbatik xchiʼuk jchabitik li yantike (Proverbios 22:3).

Xuʼ van oy ta jakʼbe jbatik kʼu van yelan oy li ermanoetik ti bu pukem xa tajek li chamel taje. Ta skoj li achʼ chamel coronaviruse, jlom Beteletik xchiʼuk salonetik ta Corea del Sur, Italia, Japón xchiʼuk ta yan lumetike oy xa kʼusitik lik spasik talel. Li ta jlom Beteletike mu xa xuʼ buchʼu x-och. Ti butik laj xa yal mantal ajvalil ti mu stakʼ ep jtsob jbatike, laj yichʼ pajesel li asambleaetik ta sirkuitoe. Jlom tsobobbailetik xtoke sjelojik xa ti kʼu yelan ta xcholik mantale xchiʼuk ti kʼu yelan ta sjelubtasik li tsobajeletike. Akʼo mi ep kʼusitik chkʼotanuk ta pasel, li ermanoetike yakal ta stsatsubtas li xchʼunel yoʼontonike, ta xchan Svivliaik xchiʼuk ta spatbe sba yoʼontonik ta jujuntal (Judas 20, 21).

Kʼalal jech ta jnuptan jvokoltik kʼuchaʼal avie xuʼ me skoltautik li beiltaseletik ta Vivlia chtal ta olone.

• Mu xaxiʼ. Lek onoʼox ti oy ta koʼontontik snaʼel ti kʼu yelan chpʼol batel li chamele xchiʼuk ti jnaʼtik kʼuxi xuʼ jchabi jbatike. Pe mu me jecheʼuk noʼox xavakʼ aba ta sibtasel (Proverbios 14:15; Isaias 30:15).

• Chʼunbo smantal li j-abteletike. Li j-abteletik ta jujun lume chalik onoʼox kʼusitik xuʼ jpastik sventa jchabi jbatik. Jaʼ yuʼun, tsots skʼoplal ti jchʼuntike (Romanos 13:1).

• Poko akʼob xchiʼuk sakuk li kʼusitik oy avuʼune. Nopoltik noʼox me xapok akʼob ta xavon o ta junuk desinfectante ti yichʼoj alkole. Jech xtok, nopolik noʼox jkustik li kʼusitik mas ta jpiktik ta jnatik xchiʼuk ta salon sventa tsobobbaile. Li doktoretike chalik ti jaʼ lek mu jtsakbe jba jkʼobtik sventa mu xpuk batel li chamele. Li Organización Mundial de la Salud oy to kʼusitik yaloj sventa xuʼ jchabi jbatik ta sventa li coronaviruse.

• Akʼo iluk ti oy ta avoʼonton li yantike. Jkotoltik jnaʼojtik ti tsots skʼoplal skʼan xijbat li ta tsobajeletik xchiʼuk ti xijlokʼ ta cholmantale, pe mi iputike, jaʼ mas xlokʼ venta ti te noʼox xijkom ta jnatik sventa mu jelubtasbe jchameltik li yantike. Kʼalal jech ta jpastike, chkakʼtik ta ilel ti jkʼanojtik li kermanotaktik xchiʼuk li yantike, jech mu xkakʼbetik svokolik (Mateo 22:39).

• Chʼuno me li mantal chichʼ alel ta atsobobbaile. Ta junantik lume, xuʼ van toj persa chil Betel ti spajes to kʼuk sjalil li tsobajeletike, li asambleaetike xchiʼuk yan kʼusitik. Taje jaʼ xa jech kʼotem ta pasel li ta lumetik ti bu pukem xa tajek li coronaviruse, jech kʼuchaʼal ta junantik lum ta Italia, Corea del Sur xchiʼuk ta Japón. Mi jech skʼan pasele, li moletik ta tsobobbaile xuʼ skʼel kʼusi xuʼ spasik sventa te skʼel ta snaik ermanoetik li tsobajeletik ti pasbil gravare. Jech xtok, xuʼ xcholik mantal ta telefono, ta mensaje, ta korreo o ta karta.

Li ta vunetik chichʼ alel ta olone xuʼ te xata yan tojobtaseletik sventa xachabi aba li ta chameletike.

• «Cómo defenderse del contagio», ta revista ¡Despertad! numero 6 ta 2016, pajina 4 kʼalal ta 6.

• «Mejore su salud. ¿Cómo?», ta revista ¡Despertad! sventa junio ta 2015, pajina 2 kʼalal 7.

• «Clave 4: Proteja su salud», revista ¡Despertad! sventa marso ta 2011, pajina 7.