Ti kʼu yelan chichʼ kontrainel li stestigotak Jeova li ta Rusiae kʼotem xa kʼalal ta Crimea. Li ajvalil ta Rusiae spojojbe li kʼusitik oy yuʼun stestigotak Jeovae xchiʼuk yaloj ti tskʼan tslajesbe˗o skʼoplal li relijione akʼo mi lek kʼusitik tspasik. Ti kʼuxi lokʼ li mantal ta avril ta 2017, li polisiaetike ta anil noʼox ochik ti bu tsobol li stestigotak Jeovae, taje jaʼ jech la spasik ta sjunul yosilal Rusia. Ta skoj taje, ep xa ermanoetik laj yichʼik tsakel batel xchiʼuk laj yichʼik tikʼel ta chukel. Li avie, jaʼ jech tspasbeik li stestigotak Jeova ta Crimeae.

Li ta 15 yuʼun noviembre ta 2018 li ta Dzhankoy ta yosilal Crimeae, te van chib sien polisiaetik xchiʼuk yan j˗abteletik ochik ta vaxakpʼej sna stestigotak Jeova kʼalal jaʼo jun yoʼonton te tsobol chchan Svivliaike. Taje jaʼ to sba velta ti jech kʼot ta pasele. Te van 35 ta voʼ polisiaetik ti lek chapal xchiʼuk stukʼik xchiʼuk ti smakoj satike, ochik ta persa li ta sna li Serguéi Filatov ti te tsobol vakvoʼ stestigotak Jeovae. Li ermanoetike xiʼik ta skoj ti toj tsots kʼusi pasbatike. La xchukik jun vinik ti 78 sjabilale, la xujik batel ta yibel na xchiʼuk la sjipik ta lum, vaʼun la xchukbik li skʼobe xchiʼuk tsots tajek la smajik. Ta skoj ti tsots tajek laj yichʼ majele, laj yikʼik batel ta anil ta ospital. Jech xtok, oy to chaʼvoʼ viniketik ti oy xa sjabilale muy tajek spresionik ta skoj ti xiʼike. Jaʼ yuʼun, anil xa laj yikʼik batel ta ospital ek. Ti bu och li polisiaetike te nakal jun tsebal ants ti xchiʼuk yole, pe ta skoj li kʼusi kʼot ta pasele, yal li yole.

Kʼalal laj xa ox xchajik ta kʼelel li nae, la stikʼbeik smul li Serguéi Filatov, yuʼun chalik ti jaʼ la stsakik ta venta kʼusi chal li artículo 282.2, parte 1, li ta código penal ta Rusiae, yuʼun la oy kʼusitik tspasik ta jun «organisasion ti toj xibal sbae» («organización extremista»). Li ta 5 yuʼun marso ta 2020, li nail chapanobbail ta Crimeae laj yal ti ch˗och vakib jabil ta chukel li Serguéi. Kʼalal jech laj yalike, ta anil noʼox bat stikʼik ta chukel.

Kʼalal laj xa ox xchajik ta kʼelel li naetik ta Dzhankoy ta 2018, li polisiaetike jech˗o ch˗ochik ta persa li ta sna stestigotak Jeovae, yuʼun tsnopik ti oy la kʼusitik toj xibal sba tspasike. Li bu mas achʼ to jech kʼot ta pasel ti ochik ta persa ta sna li stestigotak Jeovae, jaʼ ta 22 yuʼun mayo ta 2023. Te kʼotik lajunvoʼ polisiaetik, li voʼobike lek chapal xchiʼuk stukʼik, vaʼun ochik ta sna li stestigotak Jeova li ta Feodosiae. Sob xa tajek kʼotik, yuʼun kʼotik las 6:30. Li polisiaetike laj yalik ti akʼo sjip sbaik yalel ta lum li stestigotak Jeovae, vaʼun la xchajik ta kʼelel li nae. Jalijik mas ta oxib ora. Oy jun kermanotike la stsakik batel xchiʼuk laj yikʼik batel ta Sebastopol sventa oyuk kʼusi sjotsʼol jakʼbeik.

Ta skoj li kʼusi spasoj li polisiaetike, ep ta velta yichʼoj chapanel li ermanoetik xchiʼuk albilik ti kʼu sjalil ch˗ochik li ta chukele. Jaʼ yuʼun, li avie oy 9 ta voʼ stestigotak Jeova ti tikʼilik ta chukele xchiʼuk albilik ti te van vakib jabil xchiʼuk oʼlol ch˗ochike. Li smulik lae jaʼ la ta skoj ti oy kʼusi tspasik ta jun organisasion ti toj xibal sbae.

1. 17 yuʼun septiembre ta 2024

   Li avie, oy 9 ta voʼ stestigotak Jeova ti te tikʼajtik ta chukel ta Crimeae.

2. 22 yuʼun mayo ta 2023

   Li polisiaetike ochik ta persa ta sna jun stestigo Jeova li ta Feodosiae. Laj yichʼik batel selularetik, tavletaetik o yan kʼusitik xchiʼuk la xchukik batel jun stestigo Jeova.

3. 5 yuʼun agosto ta 2021

   Ochik ta vaxakpʼej sna stestigotak Jeova xchiʼuk la xchajik ta kʼelel. La xchukik batel li Alexánder Dubovenko xchiʼuk li Alexánder Litviniuk.

4. 1 yuʼun oktuvre ta 2020

   Li ta Sebastopole oy balunpʼej sna stestigotak Jeova ti la xchajbeik ta kʼelele. Li Ígor Shmidt laj yichʼ chukel batel xchiʼuk laj yichʼ albel ti chichʼ tikʼel ta chukel kʼuk sjalile.

5. 4 yuʼun junio ta 2019

   Li polisiaetike la xchajbeik ta kʼelel lajunchop sna stestigotak Jeova li ta Sebastopole. Ta tsʼakale, li Víktor Stashevski laj yichʼ tikʼbel smul ti oy kʼusi chchapan ta jun organisasion ti toj xibal sbae.

6. 20 yuʼun marso ta 2019

   Li polisiaetike ochik ta persa ta vaxakpʼej sna stestigotak Jeova li ta Alupka xchiʼuk ta Yalta. Li Artiom Guerasimov oy kʼusi laj yichʼ jakʼbel xchiʼuk tikʼbat smul ti oy la kʼusi chchapan ta jun organisasion ti toj xibal sbae.

7. 15 yuʼun noviembre ta 2018

   Te van chib sien polisiaetik xchiʼuk yan j˗abteletik ochik ta vaxakpʼej sna stestigotak Jeova ta Dzhankoy, ti te tsakal skʼoplal Serguéi Filatov.