Oy epal krixchanoetike akʼo mi oy srelijionik, tsnopik ti chʼabal xa sbalil li mantaletik ta Vivlia ta sventa li chiʼinejbail ta vayel xchiʼuk li ta nupunele. Ta skoj ti jelem xa tal li kuxlejale junantik relijionetike jelel xa li kʼusi tsnopike xchiʼuk muʼyuk xa chchanubtasvanik jech kʼuchaʼal chchanubtasvanik ta voʼne ta sventa li kʼusi lek xchiʼuk ta sventa li kʼusi chopole. Vaʼun chaʼa, ¿mi muʼyuk xa van sbalil li mantaletik ta Vivliae? Oy, jkʼeltik echʼel ti kʼu chaʼal oy-o sbalile.

Sventa jnaʼtik li kʼusi lek xchiʼuk li kʼusi chopole, jtunel tajek kuʼuntik ti sbeiltasutik li Diose, yuʼun jech laj kichʼtik pasel, xi chal li Vivliae: «Mi jaʼuk xuʼ yuʼun tsbeiltas sba batel stuk li jun krixchano ti yakal chanave» (Jeremias 10:23). Melel onoʼox ti Jeovae * la spasutik sventa jnop jtuktik li kʼusi ta jkʼan ta jpastike, pe maʼuk la spasutik sventa voʼotik jtʼujtik li kʼusi lek xchiʼuk li kʼusi chopole, yuʼun li Diose tskʼan ti akʼo jpat koʼontontik ta stojolal kʼalal oy kʼusi ta jnop ta jpastike (Proverbios 3:5).

Li smantaltak Dios sventa talelale te oy ta Vivlia. Jkʼeltik batel chibuk srasonal ti kʼu yuʼun tsotsik skʼoplale.

• Jaʼ la spasutik li Diose (Salmo 100:3). Jaʼ snaʼoj lek li kʼusi xuʼ xakʼbutik jmuyubajeltike, ti lekuk noʼox li jbekʼtal jtakopaltike, li jnopbentike xchiʼuk ti kʼu yelan chkaʼi jbatike, pe snaʼoj xtok li kʼusi xuʼ xkʼot ta jtojolaltik mi muʼyuk laj jchʼunbetik li smantaltake (Galatas 6:7). Li Jeovae jaʼ tskʼan ti lekuk noʼox oyutike, jaʼ yuʼun li Vivliae xi ta xale: «Voʼon ta jchanubtasot sventa xatabe sbalil atuk, voʼon ta jbeiltasot batel ti bu beal skʼan xatam batele» (Isaias 48:17).

• Xuʼ sloʼlautik li koʼontontike. Epal krixchanoetike tsnopik ti sventa snaʼik li kʼusi lek xchiʼuk li kʼusi chopole, jaʼ noʼox tskʼan chchʼunbeik li kʼusi ch-albat yoʼontonike, jaʼ xkaltik, li kʼusi lek chaʼiik stukike xchiʼuk ti kʼu yelan chaʼi sba stukike. Pe li Vivliae xi chale: «Li koʼontontike jaʼ noʼox stuk ti toj echʼ xa noʼox xloʼlavane xchiʼuk ti toj xibal sbae» (Jeremias 17:9). Ti mi maʼuk chkakʼtik akʼo sbeiltas koʼontontik li spʼijilal Diose, xuʼ me oy kʼusi xlik jpastik ti ta jchaʼnaʼtik ta tsʼakale (Proverbios 28:26; Eklesiastes 10:2).

Moʼoj. Li Vivliae chalbutik ta jamal ta sventa li Diose xchiʼuk chchanubtasutik ti kʼu yelan skʼan li jkuxlejaltike (1 Korintios 6:9-11; Galatas 5:19-23). Li Diose tskʼan ti akʼo xichʼ ojtikinel li kʼusi melel taje (1 Timoteo 2:3, 4). Jech oxal, li jnitvanejetike skʼan xchanubtasvanik jech kʼuchaʼal chal ta Skʼop Diose (Tito 1:7-9).

Oy epal krixchanoetike muʼyuk oy ta yoʼontonik xchʼunel li mantaletik ta Vivliae, jech oxal tsaʼik jun relijion ti jaʼuk x-albatik ti jaʼuk spasik «li kʼusi lek chaʼi stukike» (2 Timoteo 4:3). Pe xi jamal chpʼijubtasvan li Vivliae: «Abol sbaik li buchʼutik chalik ti jaʼ lek li kʼusi chopole xchiʼuk ti chopol li kʼusi leke» (Isaias 5:20). Li Diose chchapan li jnitvanejetik ta relijion ta skoj ti muʼyuk lek chchanubtasik li krixchanoetik ta sventa li kʼusi lek xchiʼuk ta sventa li kʼusi chopole.

Moʼoj. Li buchʼutik tskʼan tspasik li kʼusi lek chil Diose, chchanbeik Jesus xchiʼuk chchʼunik li kʼusi laj yakʼ ta chanele. Li Jesuse la xchanubtas li yajchankʼoptak ti akʼo skʼanik, ti akʼo yichʼik ta mukʼ skotol li krixchanoetike xchiʼuk ti mu kʼusi chopol snopik ta stojolal li yantike (Mateo 5:43, 44; 7:1).

Li yajtsʼaklomtak Jesuse jech skʼan xkuxiik jech kʼuchaʼal chal smantaltak Diose. Jech xtok, skʼan teuk ta sjolik ti xuʼ van jelel kʼusi tsnop tspas li krixchanoetike (Mateo 10:14). Li Jesuse muʼyuk laj yalanbe yajchankʼoptak ti xuʼ stunesik politika o yan kʼusitik sventa xchʼunbeik smantaltak Dios li krixchanoetike (Juan 17:14, 16; 18:36).

Kʼalal chkakʼtik persa yakʼel ta jkuxlejaltik li smantaltak Diose, ta jtabetik sbalil li avie xchiʼuk li ta jelavele (Salmo 19:8, 11). Jaʼ junantik sbalil liʼe:

• Mas to me xamuyubaj (Proverbios 29:6).

• Lek chavil aba xchiʼuk li Diose (Proverbios 3:32).

• Tskoltaot Dios kʼalal oy kʼusi tsots chanuptane (Proverbios 11:8).

• Xuʼ xata akuxlejal sbatel osil liʼ ta balumile (Salmo 37:29).