Epal relijionetike jaʼ batem ta yoʼontonik skʼanel takʼin maʼuk ti tskoltaik ta mantal li krixchanoetike. ¿Mi oy avakʼoj venta? Junantike oy kʼusitik chchonik o tskʼanik takʼin kʼalal tskoltaik li yantike. Ep jnitvanejetik ta relijion toyol chichʼik tojel xchiʼuk ep kʼusitik x-ayan yuʼunik. Kalbetik skʼoplal junantik:

• Kʼalal la skʼelbeik skʼoplal li relijion katolikae, te laj yakʼik venta ti oy jun ovispo ti mas ta 13 jabil la slajesbe stakʼin li xchʼulnaike. Tetik van 150 ta velta muy ta avionetik ti toyajtik tajek stojole (jet) xchiʼuk tetik van chib sien ta velta xanav ta karoetik ti toyolik stojole (limusina). Jech xtok, la slajes mas ta chanib miyon dólar sventa smeltsan lek ti bu nakale.

• Li ta jun lum ta Africae, ta smilal noʼox krixchanoetik chbat xchikintaik kʼusi chal li jun j-almantale. Jeltos kʼusitik chchon li ta xchʼulnae, chchon aseiteetik ti chpoxtavan ta alele (aceite milagroso) xchiʼuk kʼuʼil pokʼiletik ti te xvinaj slokʼol li j-almantale. Jutuk mu skotoluk li buchʼutik te chkʼotike povreik noʼox, pe li stuke jkʼulej tajek.

• Li ta Chinae, oy chanpʼej vitsetik ti chʼul chilik li jbudistaetike, pe li chaʼpʼeje yaloj ajvaliletik ti te skʼoplal li ta pʼolmajel (bolsa de valores) ta skoj ti ep tspasik kanal takʼine. Li jnitvanej yuʼun li templo Shaolín ti lek ojtikinbile stikʼoj sba ta epal pʼolmajeletik, jaʼ yuʼun ojtikinbil kʼuchaʼal li «monje empresario».

• Li ta empresaetik ta Estados Unidose, oy xa kʼusi lik stunesik ti jkoltavanej ta mantal sbi yuʼunike (consultor espiritual). Jlik vun ti chalbe skʼoplal li jkoltavanejetik ta mantal taje, chal ti jaʼ tstunesik li kʼusi nopem xaʼiik spasel relijionetik sventa skoltaik li j-abteletik ta empresaetike.

¿Kʼu yelan chavil li relijionetik ti jaʼ noʼox oy ta yoʼontonik spasel kanal takʼine? ¿Mi oy ajakʼojbe aba kʼu yelan chil Dios li buchʼutik jech tspasike?

Li Diose muʼyuk lek chil ti skap sba li relijion xchiʼuk li spasel kanal takʼine. Li Vivliae chal ti ta voʼnee oy toʼox paleetik ti chalik ti jaʼ yajkʼopojelik li Diose xchiʼuk ti tojbilik kʼalal chchanubtasvanike. Pe taje, muʼyuk lek laj yil li Diose (Mikeas 3:11). Li Diose chopol tajek laj yil ti la spasik ta «xchʼen j-elekʼetik» ti bu ch-ichʼat ta mukʼe (Jeremias 7:11). Yuʼun te chchonolajik ta skoj ti mu x-echʼ yoʼontonik ta skʼanel takʼine.

Li Jesus eke ibal sba laj yil ti jaʼ noʼox tskʼanik takʼin li relijionetike. Li jnitvanejetik ta relijion ta skʼakʼalil Jesuse, chakʼik ti te xchonolajik ta templo ta Jerusalen li krixchanoetike, jaʼ noʼox venta mi x-akʼbatik takʼine. Li jchonolajeletik taje, jaʼ noʼox chutilanik li krixchanoetik ti te chkʼot yichʼik ta mukʼ li Diose. Kʼalal jech laj yil li Jesuse muʼyuk xiʼ, yuʼun la snuts lokʼel skotol li jchonolajeletike, xi laj yalanbee: «¡Mu xapasik ta chʼivit li sna Jtote!» (Juan 2:14-16).

Kʼalal la xchol mantal li Jesuse, laj yakʼ ta ilel ti koʼol kʼusi tsnop xchiʼuk li Diose (Juan 8:28, 29). Muʼyuk la skʼan stojol kʼalal chanubtasvan ta sventa Diose mi jaʼuk kʼalal laj yakʼ ta ilel skʼelobil juʼelale. Jech kʼuchaʼal kʼalal la smakʼlin li epal krixchanoetike, ti la xpoxta li buchʼutik ipike o ti la xchaʼkuxes li buchʼutik chamemike. Kʼalal la xchol mantal li Jesuse maʼuk sventa spas sba ta jkʼulej mi jaʼuk oy sna stuk (Lukas 9:58).

Li Jesuse laj yalbe yajtsʼaklomtak ti maʼukuk me sventa spasik kanal takʼin li kʼusitik tspasik sventa mantale, yuʼun xi albatike: «Ta moton la-akʼbatik, jaʼ jech ta moton xavakʼik ek» (Mateo 10:8). Taje, jaʼ jech la spasik li baʼyel yajtsʼaklomtak Kristoe. Jkʼelbetik junantik skʼelobil:

• Li jtakbol Pedro ti la xchiʼin Jesus kʼalal la xchol mantale. Jun veltae, ch-akʼbat ox takʼin yuʼun jun vinik ti Simon sbi sventa x-akʼbat sjuʼele. Li Pedroe la spʼaj ta anil li kʼusi albate xchiʼuk xi jamal laj yalbe li Simone: «Batan ta chʼayel xchiʼuk li aplatae, yuʼun la anop ti stakʼ manel ta takʼin li matanal ti muʼyuk tojbil chakʼ Diose» (Echos 8:18-20).

• Li jtakbol Pablo ti ojtikinbil ta skoj ti la svulaʼan tsobobbailetike. Akʼo mi epal jabil la skolta tsobobbailetik, muʼyuk la skʼan stojol. Li Pablo xchiʼuk xchiʼiltake maʼuk jchonolajeletik ta buyuk noʼox ta sventa Skʼop Dios, jech kʼuchaʼal la spasik epal krixchanoetike (2 Korintios 2:17). Yuʼun xi onoʼox jamal laj yal li Pabloe: «Ta kʼakʼal akʼobal li-abtejkutik sventa mu xikʼotkutik kʼuchaʼal alal ikatsil ta atojolalik kʼalal la jcholbotkutik li lekil aʼyejetik ta sventa Diose» (1 Tesalonisenses 2:9).

Melel onoʼox ti tun yuʼunik takʼin li baʼyel yajtsʼaklomtak Kristo sventa xcholik li mantale xchiʼuk kʼalal la skoltaik li yantike. Pe muʼyuk la skʼan stojolik kʼalal jech la spasike. Li krixchanoetike xuʼ onoʼox xakʼik matanal takʼin mi jech oy ta yoʼontonike. Jaʼ la stsakik ta venta li beiltaseletik liʼe:

• 2 Korintios 8:12: «Yuʼun mi baʼyel oy ta koʼontontik li kʼusi chkakʼtike, lek chʼambil chkʼot li kʼusi oy kuʼuntike, maʼuk li kʼusi muʼyuk kuʼuntike».

  Kʼusi skʼan xal: Li kʼusi mas tsots skʼoplale jaʼ li kʼusi chtijbat yoʼonton yakʼel li jun krixchanoe, maʼuk ti kʼu yepal chakʼe.

• 2 Korintios 9:7: «Ta jujuntal akʼik ti kʼu yepal chlokʼ ta avoʼontonike, mu me xchibetuk avoʼonton xavakʼik o mu me sujbiluk chavaʼi abaik, yuʼun kʼanbil yuʼun Dios li buchʼu xkuxet noʼox yoʼonton chakʼe».

  Li kʼusi skʼan xale: Li Diose muʼyuk lek chil mi sujbil li jun krixchano sventa xakʼ matanale, yuʼun jaʼ lek chil mi chlokʼ ta yoʼonton stukike.

Li Vivliae jamal chal ti mu skotoluk relijion lek chil li Diose, mi jaʼuk ti kʼu yelan ch-ichʼat ta mukʼe (Mateo 7:21-23). Ta jun labal sba albil kʼop ta Vivliae tskoʼoltas ta jun jchonbail ants skotol li jecheʼ relijionetike. ¿Kʼu yuʼun? Yuʼun tsmojin sjolik xchiʼuk li ajvaliletik sventa x-akʼbatik takʼin xchiʼuk yan kʼusitike xchiʼuk chutilanik li krixchanoetik ta spʼejel balumile (Apokalipsis 17:1-3; 18:3). Li albil kʼop xtoke chal ti jutuk xa skʼan sventa xakʼbe kastigo skotol jecheʼ relijion li Diose (Apokalipsis 17:15-17; 18:7).

Yoʼ to ta jmalatik chkʼot ta pasel li albil kʼope, li Diose mu skʼan ti xloʼlaatik yuʼun jecheʼ relijion li krixchanoetike o ti snamajesatik ta stojolale (Mateo 24:11, 12). Li Diose tskʼanbe vokol li buchʼutik oy ta yoʼontonik mantal ti akʼo xichʼik ta mukʼ ti kʼu yelan tskʼane xchiʼuk ti xlokʼik talel li ta jecheʼ relijione (2 Korintios 6:16, 17).