Li kʼusitik toyajtik stojol jech kʼuchaʼal jpʼejuk na o jkotuk karroe skʼan ti lekuk kʼelbile. Jaʼ jech skʼan lekuk kʼelbil ti kʼu yelan xkil jbatik xchiʼuk Dios eke. Mi avichʼoj xa ox voʼe, ¿kʼuxi xuʼ lekuk˗o xavil aba xchiʼuk li Diose?

Xuʼ xapas liʼe:

•  Chanilano˗o li Vivliae

•  Kʼopono˗o li Jeovae

•  Jechuk˗o xaval batel li kʼusi achʼunoje

•  Mu me xavikta aba li ta tsobajele

 Beiltasel ta Vivlia: «Jech˗o tsatin batel lek avuʼunik li lekil abtelale xchiʼuk ti xavojtikin batel mas li Diose» (Kolosenses 1:10).

 Kʼusi skʼan xal: Mi avichʼoj xa ox voʼe, skʼan jech˗o xachanilan Avivlia xchiʼuk ti xanopbe skʼoplale (Salmo 25:4;119:97).

 Li kʼusi xuʼ xkʼot ta pasele: Bakʼintike, xuʼ van mu xakʼan xachanunaj xchiʼuk xuʼ xkʼot ta nopel avuʼun ti mu xakʼupin chachanunaje.

 Li kʼusi xuʼ xapase: Sabo skʼoplal li kʼusitik mas chakʼupin xchanel ta Vivliae. Sventa mu xachʼajub ta xchanel li Vivliae, sabo lek yorail xchiʼuk nopo lek kʼusi chachanbe skʼoplal. Li kʼusi skʼan oyuk ta avoʼontone jaʼ ti xakʼan li Jeovae xchiʼuk li Skʼope. Mi jech chapase, chatabe sbalil xchiʼuk chakʼupin spasel (Salmo 16:11).

 Tojobtasel: Mi chakʼan chatabe lek sbalil kʼalal chachanunaje, saʼo ti bu tsʼijil noʼoxe xchiʼuk ti bu mu kʼusi xchʼay avoʼontone.

 ¿Kʼusi yan xuʼ skoltaot?

•   Chano:

   «¿Kʼuxi xuʼ skoltaun li Vivliae? Xchaʼvokʼal: Kʼupino xchanel li Vivliae».

   «¿Kʼusi xuʼ jpas mi toj ven xchʼay koʼontone?».

•   Kʼelo:

   Li kʼusi tsnopik yan kerem tsebetike: Xchanel Vivlia.

•   Yaleso:

   «Kʼu yelan xuʼ xichʼ kʼelel li Vivliae».

 Beiltasel ta Vivlia: «Mu me kʼusi xavul˗o avoʼontonik jsetʼuk, jaʼ lek albeik Dios ta orasion li kʼusi chavul˗o avoʼontonike, ta sjunul avoʼontonik xakʼanik vokol xchiʼuk tojik ta vokol kʼalal chapasik orasione» (Filipenses 4:6).

 Kʼusi skʼan xal: Kʼalal ta jchiʼintik ta loʼil Diose, xkoʼolaj kʼuchaʼal jun be ti xuʼ te xijtal xijbate. Yuʼun chachikintabe kʼusi chal Dios kʼalal chachanbe Skʼope xchiʼuk chachiʼin ta loʼil kʼalal chapas orasione. Xuʼ xakʼanbe li kʼusitik chtun avuʼune xchiʼuk xuʼ xatojbe ta vokol li kʼusitik lekik yakʼojbote.

 Li kʼusi xuʼ xkʼot ta pasele: Xuʼ van jaʼ noʼox chachaʼalilan li kʼusi chakʼan ta a˗orasione. Jech xtok, xuʼ van xlik anop mi ta onoʼox xchikinta a˗orasion li Jeovae o mi oyot ta yoʼonton (Salmo 10:1).

 Li kʼusi xuʼ xapase: Nopo ta sjunul kʼakʼal kʼusi chakʼan chavalbe li Jeovae. Mi mu xaxokob sventa junuk avoʼonton xakʼopon li Jeovae o mi mu xuʼ avuʼune, albo ta tsʼakal li kʼusi oy ta avoʼontone. Pe mu jaʼuk noʼox xakʼan li kʼusi chtun avuʼune, kʼano xtok li kʼusi chtun yuʼun yantike (Filipenses 2:4).

 Tojobtasel: Mi chavakʼ venta ti jaʼ noʼox chachaʼalilan li kʼusi chakʼan ta a˗orasione, albo li Jeovae. Yuʼun tskʼan ti xavalbe skotol li kʼusi chavul˗o avoʼontone akʼo mi jaʼ chavul˗o avoʼonton ti kʼu yelan chapas orasione (1 Juan 5:14).

 ¿Kʼusi yan xuʼ skoltaot?

•   Chano:

   «¿Kʼu yuʼun tsots skʼoplal ti jpastik orasione?».

•   Yaleso:

   «¿Cómo puedo mejorar mis oraciones?».

 Beiltasel ta Vivlia: «Jechuk˗o me xakʼel aba atuk xchiʼuk kʼelo me lek li kʼusi chavakʼ ta chanele. [...] Mi jech chapase, ta me xakol xchiʼuk ta me xkolik ek li buchʼutik chchikintabote» (1 Timoteo 4:16).

 Kʼusi skʼan xal: Kʼalal chavalbe yantik li kʼusi achʼunoje, mas to tstsatsub li xchʼunel avoʼontone. Vaʼun, ta me xakol xchiʼuk chkol li buchʼutik chchikintabote.

 Li kʼusi xuʼ xkʼot ta pasele: Xuʼ van muʼyuk ta avoʼonton chaval li kʼusi achʼunoje o xuʼ van chaxiʼ, mas to mi teyot ta a˗eskuelae.

 Li kʼusi xuʼ xapase: Mu me xavakʼ kʼusi smakot, jech kʼuchaʼal li xiʼele. Xi laj yal li jtakbol Pabloe: «Akʼo mi maʼuk ta sjunul koʼonton ta jpas [o chkal li lekil aʼyejetike], oy onoʼox kʼusi kʼubanbilun» (1 Korintios 9:16, 17).

 Tojobtasel: Kʼanbo permiso atot ameʼ yoʼ xavamigoin junuk ermano ti lek xtojob ta cholmantal yoʼ skoltaot (Proverbios 27:17).

 ¿Kʼusi yan xuʼ skoltaot?

•   Chano:

   «¿Por qué temo hablar de mi fe?».

 Beiltasel ta Vivlia: «Skʼan me oyuk ta koʼonton jbatik ta jujuntal yoʼ jtijbe jba koʼontontik sventa jkʼan jbatik xchiʼuk jpastik li kʼusitik toj leke, jech xtok, mu me xkiktatik ti ta jtsob [jbatike]» (Ebreos 10:24, 25).

 Kʼusi skʼan xal: Li srasonal mas tsots skʼoplal ti chijbat ta tsobajeletike jaʼ sventa xkichʼtik ta mukʼ li Jeovae. Pe xuʼ te spatik avoʼonton li ermanoetik xchiʼuk xuʼ te xapatbe yoʼontonik ek kʼalal chabat xchiʼuk chavakʼ aloʼile (Romanos 1:11, 12).

 Li kʼusi xuʼ xkʼot ta pasele: Xuʼ van oy kʼusitik chchʼay˗o avoʼonton o yan kʼusitik chanop. Vaʼun, muʼyuk xa chachikinta li mantaletik ch˗echʼe. O xuʼ van muʼyuk xa chabat ta skotol tsobajeletik. Ta skoj ti ep atareae, xuʼ van muʼyuk xa yorail avuʼun sventa xabat ta tsobajeletik.

 Li kʼusi xuʼ xapase: Melel onoʼox ti skʼan xapas li atareae, pe chʼakbo yorail sventa xabat ta skotol tsobajeletik xchiʼuk ti xatabe sbalile. Tsʼet chikintao lek li mantal sventa xavakʼ aloʼile. Mi laj li tsobajele, kʼupil kʼoptao li buchʼu laj yakʼ sloʼil xchiʼuk li buchʼu jelav spartee.

 Tojobtasel: Chano baʼyel li kʼusi chichʼ chanel ta tsobajeletike. Yaleso li aplikasion JW Library® xchiʼuk netʼo ti bu chal: «Reuniones» sventa xavil li kʼusi chichʼ kʼelbel skʼoplale.

 ¿Kʼusi yan xuʼ skoltaot?

•   Chano:

   «¿Kʼu yuʼun lek ti xijbatutik ta tsobajel ta salone?».