Li ta mantal liʼe, te chavakʼ venta kʼu yuʼun tsots skʼoplal xatsak ta venta li oxtos liʼe kʼalal skʼan to xatak batel mensajee:

•  ¿Buchʼu chatakbe batel mensaje?

•  ¿Kʼusi chatak batel?

•  ¿Kʼusi ora chatak batel?

 Jech xtok, chatabe skʼoplal liʼe:

•  Lekil tojobtaseletik

•  ¿Kʼusi van chapas li voʼote?

 Oy ep kerem tsebetike mu xa xkuxi chaʼiik mi muʼyuk tstakik mensajee, xuʼ van jech chvaʼi aba ek. K’alal chatak mensajee, xuʼ xachiʼin-o ta loʼil li buchʼutik oy ta akontaktoe, ja’ no’ox venta mi yakʼoj permiso li atot ameʼe.

 «Li jtote mu skʼan ti jchiʼinkutik ta loʼil keremetik xchiʼuk li jmuke. Mi ta jkʼoponkutike, skʼan jtuneskutik li jtelefonokutik te ta nae xchiʼuk ti oyuk buchʼu te kʼalal chikʼopojkutike» (Lenore).

 Li kʼusi skʼan xanaʼe: Mi buchʼuuk noʼox chavakʼbe anumeroe, xuʼ me xatikʼ aba ta kʼop.

 «Mi buchʼuuk noʼox chavakʼbe anumeroe, xuʼ me stakboxuk talel mensajeetik o fotoetik ti mu xakʼane» (Scott).

 «Mi oy buchʼu nopolik noʼox chatakbe abaik mensajee, xuʼ me xlik akʼan» (Steven).

 Xi chal li Vivliae: «Li buchʼu pʼije tsta ta ilel li vokolile, vaʼun tsnakʼ sba» (Proverbios 22:3). Mi la akʼel abae, muʼyuk me chakʼbot kʼux jolal.

 Li kʼusi snuptanojik junantike: «Oy to’ox jun kamigo ti jujulikel ta jtakbe jbakutik mensajee. Kamigo no’ox jbakutik kaloj. Pe jun kʼakʼale, laj yalbun ti skʼanojune. Te laj kakʼ venta ti jaʼ mas lek ti muʼyukuk jal la jchiʼin ta loʼile xchiʼuk ti muʼyukuk la jtakbe mensajeetike» (Melinda).

 Nopbo skʼoplal liʼe: ¿Mi jech-o yamigo sbaik xanaʼ kʼalal laj yaʼi ti lek xa ch-ilat yuʼun li kereme?

 Kʼusi xuʼ ox la spas: ¿Kʼusi la spas jechuk Melinda sventa mu xlik kʼanatuk yuʼun li kereme xchiʼuk ti jechuk-o yamigo sbaike?

 Lek van tajek chkaʼitik kʼalal chijtakbat talel mensajeetike xchiʼuk kʼun tajek chkaʼitik stakel ek. Pe xuʼ me ta anil noʼox yan-o kʼusi chakʼ ta aʼiel ek li kʼusi ta jtsʼibatik batele.

 Li kʼusi skʼan xanaʼe: Li kʼusitik chaval ta mensajee xuʼ me yan xa kʼusi chakʼ ta aʼiel.

 «Li ta mensajeetike mu xkiltik-o kʼu yelan chkaʼi jbatik o ti kʼu yelan jkʼopojeltike akʼo mi jtaktik batel karitaetik o lokʼoletik. Li kʼusi noʼoxe, xuʼ yan-o kʼusi xakʼ ta aʼiel» (Briana).

 «Xkojtikin tsebetik ti muʼyuk xa lek skʼoplalik ta skoj li mensajeetik ti tstakbeik batel li keremotike» (Laura).

 Xi chal li Vivliae: «Li buchʼu tukʼe tsnop lek baʼyel ta yoʼonton li kʼusi tstakʼe» (Proverbios 15:28). ¿Kʼusi chakʼ jchantik? Kʼalal skʼan to xatak batel mensajee, kʼelo lek li kʼusi chaval batele.

 Tsots skʼoplal ti lekuk xavakʼ ta ilel atalelal kʼalal chatak mensaje o kʼalal chatakbat talele. Taje jaʼ me tskoltaot sventa xanaʼ kʼusi chapas.

 Li kʼusi skʼan xanaʼe: Mi muʼyuk chatukʼulan li kʼusi chapase, ta me xavakʼ ta ilel ti muʼyuk lek atalelale xchiʼuk mu me xnopajik ta atojolal li yantike.

 «Ta anil no’ox xuʼ xchʼay xkaʼitik ti lekuk xkakʼ ta ilel jtalelaltike. Oy jtakoj mensajeetik kʼalal jaʼo yakal chiveʼkutike o kʼalal oy buchʼu ta jchiʼin ta loʼile» (Allison).

 «Mi chatsʼiba mensaje kʼalal jaʼo chatsʼot akarroe, toj xibal me sba. Yuʼun xuʼ me xanuptan avokol mi chʼay avoʼontone» (Anne).

 Xi chal li Vivliae: «Akʼbil yorail skotol, [...] oy yorail chijtsʼiji xchiʼuk oy yorail chijkʼopoj» (Eklesiastes 3:1, 7). Jech xtok, oy yorail ti jchantik junuk mensaje o ti jtaktik batele.

¿Buchʼu chatakbe batel mensaje?

•  ;-) Chʼunbo smantal li atot ameʼe (Kolosenses 3:20).

•  ;-) Mu buchʼuuk noʼox xavakʼbe li anumeroe. Mi ta slekil avoʼonton chaval ti muʼyuk chavakʼ anumero o li yan kʼusitik tsjakʼboxuke, jaʼ me tskoltaot kʼalal mi la ata avaʼleje.

•  ;-) Kʼalal chatakbe batel mensaje junuk tseb o junuk kereme, mu xavakʼ ta aʼiel ti lek chavile. Yuʼun mi mechuk oy ta avoʼontone, jaʼ noʼox chayayijesvan xchiʼuk chavakʼbe svokol yantik.

 «Li jtot jmeʼe yakʼojik venta ti lek ta jtunes jselular jech kʼuchaʼal lek chilike. Jaʼ yuʼun, spatoj yoʼontonik ta jtojolal, muʼyuk ti jujulikel tskʼelik li buchʼutik te ta jkontaktoe» (Briana).

¿Kʼusi chatak batel?

•  ;-) Kʼalal skʼan to xatak batel junuk mensajee, xi xajakʼbe abae: «¿Mi mas lek ti ta mensaje xkal batele?». Yuʼun jaʼ van mas lek ti xakʼopon echʼel ta telefono o ti xavalbe kʼalal te achiʼuke.

•  ;-) Mu xatak ta mensaje li kʼusi mu x-al avuʼun kʼalal te akʼelojbe sat li buchʼu chakʼan chakʼopone. Xi chal Sarah ti 23 sjabilale: «Mi mu x-albe avuʼun ta satilale, jaʼ lek mu xatakbe batel ta mensaje».

 «Mi oy buchʼu tstakbot talel junuk lokʼol ti chopole, albo atot ameʼ. Jaʼ me sventa alekilal xchiʼuk jech tspat yoʼontonik ta atojolal» (Sirvan).

¿Kʼusi ora chatak batel?

•  ;-) Kʼelo lek ti bakʼin chatunes li aselulare. Xi chal jun tseb ti Olivia sbie: «Muʼyuk te jtuchoj-o jselular kʼalal chbat veʼkune, kʼalal ta jchan Jvivliae o kʼalal ta jpas jtareae. Kʼalal chibat ta tsobajele, ta jtupʼ li jselulare. Jaʼ jech muʼyuk ta jkʼel jujulikel».

•  ;-) Tsako ta venta li yantike (Filipenses 2:4). Kʼalal yakal chachiʼin ta loʼil junuk krixchanoe, mu xakʼel o mu xatak batel mensajeetik.

 «Oy kʼusitik kaloj ti muʼyuk ta jpase, jech kʼuchaʼal liʼe: muʼyuk ta jtak mensaje kʼalal te jchiʼuk kamigotake, jaʼ to mi solel tsots skʼoplale. Jech xtok, muʼyuk chkakʼbe jnumero li buchʼutik mu xkojtikin leke» (Janelly).