Mi nopem xavaʼi chatunes li Internete, ta onoʼox me xata ta ilel jtosuk pornografia (videoetik, lokʼoletik, musikaetik xchiʼuk kʼusitik tsʼibabil ti tstij oʼontonal sventa mulivajele). Xi chal Hayley ti 17 sjabilale: «Mu xa persauk xasaʼ, te chtal staot».

 Li buchʼutik jpʼel ta yoʼonton muʼyuk tskʼelik li pornografiae, xuʼ xtijbat yoʼontonik sventa skʼelik. Xi chal Greg ti 18 sjabilale: «Jpʼel ta koʼonton ti muʼyuk ta jkʼel li pornografiae, pe jun kʼakʼale la jkʼel. Mu xuʼ jpat koʼonton ta jtuktik noʼox».

 Avi li pornografiae buyuk xa noʼox ta tael. Ta skoj li sexteoe, epal kerem tsebetik ta spasik xchiʼuk ta spukik batel li pornografiae.

 Kʼusi chakʼ jchantik: Kʼalal tseb keremik toʼox li amukʼtot ayaya xchiʼuk atot ameʼe, mas toʼox jutuk bu ta tael li pornografiae, avie ta buyuk xa noʼox xvinaj. Jaʼ yuʼun chaʼa, ¿mi xpʼaj avuʼun? (Salmo 97:10).

 Xuʼ, xuʼ xapʼaj li pornografiae. Baʼyuk akʼo venta ti kʼu yuʼun chopol ti chakʼel li pornografiae. Jkʼeltik jun chibuk li kʼusi chalik ta sventa li pornografiae.

 Li kʼusi chalike: Li pornografiae muʼyuk kʼusi chopol tspasbot.

 Li kʼusi melele: Li skʼelel pornografiae xkoʼolaj ta sikʼolajel. Li sikʼolajele tsokes apulmon, yan li skʼelel pornografiae tsokes anopben. Li pornografiae tsokes tajek anopben ta sventa li chiʼinejbail ta vayele. Yuʼun li Diose la spas li chiʼinejbail ta vayel sventa mas to skʼan sbaik xchiʼuk sventa jmojuk˗o oyik li chaʼvoʼ krixchanoetik ti skʼanoj sbaike (Jenesis 2:​24). Li buchʼutik tskʼel pornografiae xuʼ xa lek chilik li kʼusi chopole. Jech kʼuchaʼal liʼe, junantik buchʼutik xchanojbeik skʼoplale chalik ti jutuk mu skotoluk li viniketik ti tskʼelik pornografiae muʼyuk xa toj chopol chilik li yilbajinel antsetike.

Taje jaʼik li buchʼutik pimubem xa tajek sjol yoʼontonik ti muʼyuk xa chopol chilik spasel li kʼusitik chopole.

 Li kʼusi chalike: Li skʼelel pornografiae jtunel avuʼun sventa xavaʼibe skʼoplal li chiʼinejbail ta vayele xchiʼuk ti xavojtikin li abekʼtale.

 Li kʼusi melele: Li skʼelel pornografiae mas to chapichʼ oʼontavan yuʼun. Kʼalal chavil li krixchanoetike, jaʼ xa noʼox chanopbe skʼoplal ta sventa li chiʼinejbail ta vayele. Oy buchʼu ti chchanbe skʼoplale chal ti buchʼu tskʼelik li pornografiae mu xa junuk yoʼonton chkomik manchuk mi jaʼ chchiʼinik ta vayel li snup xchiʼilike.

Li pornografiae, ¿mi mu jaʼuk tstij oʼontonal ta spasel li kʼusitik taje?

 Li kʼusi chalike: Li buchʼutik tspʼajik skʼelel li pornografiae, mu kʼusi snaʼik. Chalik ti mu stakʼ loʼiltael li chiʼinejbail ta vayele.

 Li kʼusi melele: Li krixchanoetik ti tspʼajik skʼelel li pornografiae lek kʼusi tsnopik ta sventa li chiʼinejbail ta vayele. Xchʼunojik lek ti jaʼ matanal yakʼojbe Dios li malalil xchiʼuk li ajnilale sventa masuk to skʼan sbaike xchiʼuk ti lekuk xil sbaike. Kʼalal ta xnupunike, mas jun yoʼontonik kʼalal chchiʼin sbaik ta vayele. Pe li buchʼu tskʼel pornografiae, muʼyuk jun yoʼontonik.

Jech kʼuchaʼal liʼe, li viniketik ti nupunemike xi jamal ch˗albatike: «Cuxetuc noʼox avoʼntonic o achiʼuc li avajnil onoʼox ta aqueremale. Cuxetuc noʼox avoʼnton o ti lec chascʼupinote» (Proverbios 5:​18, 19, Xchʼul Cʼop Jtotic Dios, ta skʼop Chenalhó).

 Mi meʼinem xa tajek ta avoʼonton skʼelel li pornografiae, ¿kʼusi xuʼ xapas? Oy kʼusitik te chata ti jaʼ xuʼ skoltaot yoʼ bu chal «Cómo rechazar la pornografía».

 Stsʼik me avuʼun li skʼelel pornografiae. Mi oy xa laj akʼele, x˗iktaj me avuʼun xtok. Te chavakʼ venta ti chatabe sbalil mi laj avakʼ persae.

 Jkʼeltik kʼusi kʼot ta stojolal Calvin ti lik skʼel pornografia kʼalal 13 toʼox sjabilale, xi chale: «Jnaʼoj ti chopol li pornografiae, pe mu xkom kuʼun skʼelel. Ta tsʼakale, chopol tajek chkaʼi jba yuʼun. Jun kʼakʼale, laj yil jtot ti ta jkʼel li pornografiae. Bal to ti laj yilune. Yuʼun ta onoʼox jkʼan ti oyuk buchʼu skoltaune».

 Li Calvine muʼyuk xa tskʼel li pornografiae, xi chale: «Toj chopol ti lik jkʼel li pornografiae, yuʼun te to oy ta jnopben li ibal sba lokʼoletike. Bakʼintike, oy to bu ta jnopbe skʼoplal kʼusitik van xuʼ jta ta kʼelel mi la jsaʼ li pornografiae. Pe jaʼ chlik jnopbe skʼoplal ti ximuyubaj noʼox yuʼun li kʼusitik lekik ta jpas ta stojolal Jeovae, ti sak noʼox jol koʼontone xchiʼuk ti oy kʼusi kʼupil sba ta jta ta mas jelavele».