LI KʼUSITIK TSJAKʼ KEREM TSEBETIKE
¿Kʼusi xuʼ jpas mi lichʼajube?
Junantik krixchanoetike chopol tajek chaʼi sbaik kʼalal te bajal chkom ta snaik kʼalal yakal voʼ xchiʼuk ti muʼyuk kʼusi stakʼ spasike. Jun kerem ti Robert sbie xi chale: «Kʼalal jech chkʼot ta jtojolale, te chotol chikom xchiʼuk mu jnaʼ kʼusi ta jpas».
¿Mi oy jech avabinoj aba junuk velta? Mi jeche, jtunel me avuʼun li mantal liʼe.
Li kʼusi skʼan xanaʼe
Maʼuk me jaʼ tskoltaot li kʼusitik achʼ chlokʼanuke
Kʼalal te noʼox tikʼilot-o ta Internete, xuʼ van mu xavaʼi kʼu yelan ch-echʼ ora, pe muʼyuk xa van chtal ta ajol kʼusi xuʼ xapas xchiʼuk mas to chachʼajub. Xi chal Jeremy ti 21 sjabilale: «Jaʼ to chavile te xa tʼojol-o asat ta skʼelel Internet xchiʼuk muʼyuk kʼusi chanopbe skʼoplal».
Jun tseb ti Elena sbie jaʼ jech tsnop ek, xi chale: «Ep kʼusitik xuʼ xapas xchiʼuk li kʼusitik achʼ chlokʼanuk tale, pe muʼyuk xa chavakʼ venta li kʼusi chkʼot ta pasel ta apat axokone. Jaʼ yuʼun, kʼalal chatupʼ li kʼusi chachʼay-o avoʼontone, jech-o chʼajot o mas to chachʼajub».
Jaʼ tskoltaot ti kʼu yelan atalelale
Mi ep kʼusitik chapase, muʼyuk me chachʼajub, jaʼ noʼoxe skʼan ti xakʼupinuk li kʼusi chapase. Jech kʼuchaʼal liʼe, jun tseb li Karen sbie xi chale: «Akʼo mi ep tajek kʼusi ta jpas jujun kʼakʼal, chichʼajub tajek li ta eskuelae. Skʼan xakʼupin li kʼusi chapase sventa mu xachʼajub».
¿Mi anaʼoj liʼe? Jaʼo oy kʼusitik xapas kʼalal xokolote.
Li jpets teʼe lek chchʼi mi lek slumale. Jaʼ noʼox jech ek, mi lek chatunes akʼakʼale, lek kʼusitik tspas avuʼun.
Li kʼusi xuʼ xapase
Oyuk kʼusitik yan xlik apas. Saʼo mas avamigotak, oyuk kʼusi yan xlik apas sventa xachʼay avoʼonton xchiʼuk kʼelo kʼusitik xuʼ xasabe skʼoplal. Li buchʼutik ep kʼusi tspasike muʼyuk me chchʼajubik xchiʼuk muʼyuk chchʼajub yuʼunik li yantike.
Beiltasel ta Vivlia: «Kʼusiuk ti xuʼ spas li akʼobe akʼbo yipal spasel» (Eklesiastes 9:10).
«Jaʼtik to lik jchan li chino mandarín kʼope. Kʼalal ta jchanilan jujun kʼakʼale, chkakʼ venta ti lek chkaʼi stunesel li jnopbene. Ta jkʼupin kʼalal oy kʼusi chlik jpase, yuʼun jaʼ tskoltaun sventa oyuk kʼusi jnopbe skʼoplal xchiʼuk ti jtunes lek jkʼakʼale» (Melinda).
Akʼo ta avoʼonton li kʼusi chakʼan chatae. Mi jech chapase, chavakʼ ta avoʼonton spasel. Muʼyuk me chachʼajub-o spasel atarea mi chanopbe skʼoplal kʼuxi xuʼ skoltaot ta mas tsʼakale.
Beiltasel ta Vivlia: «Ti kʼusi mas to lek xuʼ spas li jun vinike jaʼ [...] ti skʼupin li kʼusi tsots laj yabtelane» (Eklesiastes 2:24).
«Kʼalal jutuk xa ox skʼan jpas graduare, 8 ora ta kʼakʼal chichanunaj sventa oyuk to kʼusi mas jchan. Pe chʼabal chichʼajub, yuʼun jaʼ ta jnopbe skʼoplal ti jaʼ xa te chlaj-o li jchanune. Taje jaʼ la skoltaun» (Hannah).
Teuk me ta ajol ti oy kʼusitik mu xuʼ xajele. Xuʼ onoʼox xachʼajub yuʼun li kʼusitik chakʼupin spasele. Jech kʼuchaʼal liʼe, li avamigotake xuʼ van chalboxuk ti oy kʼusitik xuʼ xapasike, pe ta tsʼakale chalboxuk ti muʼyuk xae, vaʼun muʼyuk xa kʼusi chapas. Mi jech kʼot ta pasele, mu chopoluk xavaʼi, jaʼ lek muyubajan noʼox.
Beiltasel ta Vivlia: «Li buchʼu xkuxet noʼox yoʼontone xmuyubaj noʼox skotol kʼakʼal» (Proverbios 15:15).
«Oy jun kamiga ti laj yalbun ti skʼan jkʼupinuk kʼalal jtuk oyune. Laj yalbun ti jkotoltik skʼan jchʼakbetik yorail sventa jchiʼintik li yantike xchiʼuk sventa jtuk oyutike» (Ivy).
Li jpets teʼe lek chchʼi mi lek slumale. Jaʼ noʼox jech ek, mi lek chatunes akʼakʼale, lek kʼusitik tspas avuʼun.
Xuʼ van chakʼupin skʼelel xtok liʼe
LI KʼUSITIK TSJAKʼ KEREM TSEBETIKE
¿Mi skʼan van jsaʼ yan kamigotak?
¿Mi chopol van ti tʼujbil noʼox kamigotaktike? Xuʼ van lek chavaʼi aba yuʼunik, pe yikʼaluk me mu skoltaoxuk. ¿Kʼu yuʼun?
DIVUJOETIK TA PISARRON
¿Mi mu xa xakuxi chavaʼi mi muʼyuk aselular o atavletae?
Kuxulutik ta jun balumil ti jaʼ batem ta yoʼontonik li selular o tavletae, pe mu xavakʼ ti jaʼ xbat ta avoʼonton eke. Li ta video liʼe jaʼ tskoltaot sventa xavakʼ venta mi jaʼ meʼinem ta avoʼonton. Jech xtok tskoltaot sventa mu xbat tajek ta avoʼonton
