LI KʼUSITIK TSJAKʼ KEREM TSEBETIKE
¿Kʼusi xuʼ jpas mi mu skotoluk ora ta jchʼunbe smantal Diose?
Oy junantik yajtuneltak Diose tsnopik mi oy onoʼox van sbalil ti jchʼak jkʼakʼaliltik xchiʼuk ti xkakʼ kipaltik ta xchʼunbel li smantal Diose (Salmo 73:2, 3). Xuʼ van oy xa kʼusitik spasojik ti chopol chil Jeovae. Pe muʼyuk chalik ta jamal li smulike xchiʼuk lek xa noʼox tspas sbaik yileluk sventa mu xakʼik venta li yan yajtuneltak Diose.
Li mantal liʼe jaʼ sventa li buchʼutik jech xa nopem xaʼiik spasele, pe ti oy ta yoʼonton chjelike.
Li ta mantal liʼe ta jkʼeltik batel:
¿Kʼusi skʼan xal kʼalal oy buchʼu muʼyuk chchʼunbe smantal Dios skotol orae?
Taje te smakojbe skʼoplal ti chlik apas li kʼusitik chopol kʼalal te achiʼuk li buchʼutik maʼuk yajtuneltak Diose akʼo mi anaʼoj ti chopolik li kʼusitik taje. Pe kʼalal jaʼ te achiʼuk li yajtuneltak Diose, ta sjunul avoʼonton chapas yilel li kʼusi chal Diose. Kʼalal jech chapase, xkoʼolaj ti alapoj amaskarae, yuʼun mu snaʼik kʼu avelan ta melel.
«Kʼalal muʼyuk ta jchʼunbetik smantal Dios skotol orae, oy kʼusi ta jmukbetik li ermanoetike, pe oy kʼusi ta jmukbetik ek li yantike. Jech oxal, mu snaʼik kʼu kelantik ta melel» (Erin).
¿Mi anaʼoj xa liʼe? Kʼalal muʼyuk chachʼunbe smantal Diose, jaʼ skʼan xal xtok ti oy kʼusitik chapas ta mukul ti chopol chil Diose.
«Lik jkʼel pornografia kʼalal 14 toʼox jabilale. Muʼyuk chopol chkaʼi jba ti jech ta jkʼele. Pe kʼalal te jchiʼuk yantike, jpʼajoj tajek yilel» (Nolan).
Beiltasel ta Vivlia: «Mu me xuʼ xtun ta chaʼvoʼ yajval li jun mosoe, yuʼun tskontrain li june, jaʼ tskʼan li yane; o mas nopol chakʼ sba ta stojolal li june, pe jaʼ tspʼaj li yane» (Mateo 6:24).
¿Mi toj chopolun van ti muʼyuk ta jchʼunbe smantal Dios skotol orae?
Mu stakʼ xkaltik ti jeche. Yuʼun oy junantik krixchanoetike yolbaj mu skʼan xakʼ ta xkuxlejalik li kʼusi chal Vivliae. Pe li voʼot une, ¿mi yolbaj mu xakʼan xavakʼ ta akuxlejal li kʼusi chal Vivliae? Yikʼaluk van yan-o kʼusi chkʼot ta atojolal, jech kʼuchaʼal liʼe:
Mu xakʼan ti jelelot kʼuchaʼal li yan kerem tsebetike.
Jaʼ van mas chakʼupin li kʼusi tspas yan kerem tsebetike, jaʼ van muʼyuk chakʼupin li kʼusi tspas li ermanoetike.
Mu spas avuʼun chavaʼi skotol li kʼusi tskʼanbot Diose.
«Li buchʼutik mu skotoluk ora chchʼunbeik smantal Diose mas jun yoʼonton chaʼiik kʼalal chchiʼinik li buchʼutik maʼuk yajtunel Diose xchiʼuk kʼusiuk xa noʼox spasik sventa lekuk x-ilatike» (David).
Ti laj kaltik li srasonaltak taje maʼuk me skʼan xal ti xuʼ jech jpastike, pe chkakʼik venta ti kʼu yuʼun jech tspasik junantik akʼo mi maʼuk chopol krixchanoetike. ¿Kʼusi xuʼ xapas mi jaʼ jech kʼot ta atojolal taje?
¿Kʼuxi xuʼ jel li jkuxlejale?
1. Nopbo lek skʼoplal ti kʼu yelan li akuxlejal avie. Xi xajakʼbe abae: «¿Mi jun koʼonton chkaʼi jba ti vi yelan jkuxlejale? ¿Kʼusi xuʼ xkʼot ta jtojolal mi jech˗o ta jpase?».
Beiltasel ta Vivlia: «Li buchʼu pʼije tsta ta ilel li vokolile, [...] pe li buchʼutik chʼabal spʼijilike tukʼ chjelavik batel, vaʼun tsta˗o svokolik» (Proverbios 27:12).
2. Kʼano koltael. Loʼiltabo atot ameʼ o junuk avamigo ti tsots ta mantale. Muʼyuk me ch˗ilinik mi laj avalbee, yuʼun chakʼik venta ti chavakʼ avipal ta spasel li kʼusi leke.
Mi nop xa avaʼi ti mu skotoluk ora chachʼunbe smantal Diose, kʼano koltael; yuʼun xkoʼolaj ta jun poso ti skʼan xalokʼ tee
«Toj vokol laj kaʼi ti oyuk buchʼu xkalbe li kʼusi yakal ta jpase. Pe kʼalal kalojbe xa oxe, mas jun koʼonton laj kaʼi jba» (Nolan).
Beiltasel ta Vivlia: «Li buchʼu tsmuk smule muʼyuk kʼusi lek chkʼot ta stojolal, pe li buchʼu chal ta jamale xchiʼuk ti chikta spasele chichʼ kʼuxubinel» (Proverbios 28:13).
3. Xuʼ me xavil˗o avokol. Mi oy kʼusitik la apas ta mukul ti muʼyuk xavalbe li avutsʼ avalal o li ermanoetik ta tsobobbaile, xuʼ van mu xa xchʼunboxuk skotol li kʼusi chavalbee. Li atot ameʼe o li moletik ta tsobobbaile xuʼ van oy kʼusitik mu xakʼik apas kʼuk sjaliluk. Pe mu me xachibaj˗o mi jech kʼot ta atojolale, jaʼ lek akʼo persa ti sakuk atalelal ta skotole (Ebreos 13:18).
Beiltasel ta Vivlia: «Chikintao li tojobtasele xchiʼuk chʼamo li tukʼibtasel sventa xapʼijub batel ta mas jelavele» (Proverbios 19:20).
4. Teuk ta ajol ti skʼanojot li Diose. Ta skoj ti skʼanojot li Jeovae, oy ta yoʼonton skotol li kʼusitik chapase. Jaʼ yuʼun, snaʼoj mi muʼyuk chachʼunbe smantal skotol orae. Vaʼun, chopol tajek chaʼi. Pe oyot ta yoʼonton xchiʼuk tskoltaot ta spasel li kʼusi leke (1 Pedro 5:7).
Beiltasel ta Vivlia: «Li sat Jeovae skʼeloj sjunul li balumile, yuʼun tskʼan chakʼbe ta ilel stsatsal sventa skolta li buchʼu ta sjunul yoʼonton tukʼ chakʼ sba ta stojolale» (2 Kronikas 16:9).