LI KʼUSITIK TSJAKʼ KEREM TSEBETIKE
¿Kʼu yuʼun mu xakʼ jpas kʼusi xal koʼonton li jtot jmeʼe?
Li avamigotake chalboxuk ti chabatik ta jun kʼin li ta savado o domingo chtale. La ajakʼbe atot ameʼ mi xuʼ xabat, pe jpʼel laj yalboxuk ti moʼoje. Muʼyuk bu labal sba chavaʼi, yuʼun jech xa onoʼox laj yalboxuk li jkoje.
Jaʼ ta jkʼelbetik batel skʼoplal liʼe:
¿Kʼu yuʼun skotol ora chalbeikun ti moʼoje?
Mi skotol ora mu xakʼik atot ameʼ ti xapas li kʼusi chakʼane, xuʼ van xanop ti mu skʼanik ti xachʼay avoʼontone.
Jun tseb ti Marie sbie jaʼ jech laj yaʼi sba kʼalal lik stunes stelefonoe. Xi chale: «Li jtote chalbun kʼusi noʼox aplikasional xuʼ jyales, buchʼutik noʼox xuʼ jchiʼin ta loʼil xchiʼuk kʼutik noʼox sjalil. Pe jaʼuk li kamigotake xuʼ spasik li kʼusi xal yoʼontonike».
Nopo ta sventa liʼe: ¿Mi yuʼun solel mu x-akʼbat xchʼay yoʼonton li Marie o mi yuʼun van oy kʼusi tsvul-o yoʼonton li stote?
Kʼalal oy smantalil kʼu noʼox stsatsal xuʼ xijxanav ta karroe, jaʼ tskoltautik sventa mu jnuptantik aksidente. Jaʼ jech oy sbalil ek mi ta jchʼunbetik li kʼusitik chalbutik jtot jmeʼtike.
Paso liʼe: Nopo ti totilote xchiʼuk oy jun atseb o jun akerem ti jaʼ to laj avakʼbe stunes telefonoe. ¿Kʼusitik van chopol xuʼ snuptan? ¿Kʼusitik van mu xavakʼbe spas yoʼ xakoltae? ¿Kʼusi van chaval ti xalbot akerem o atseb ti mu xakʼan akʼo xchʼay yoʼontone?
«Xi mal xalbun li jtote: ‹Nopo ti voʼot totilote›. Kʼalal jech la jnope, ta laj kakʼ venta ti oy lek srasonal yuʼun ti kʼu yuʼun jech chalbun mantale. Ti oyuk kalabe, jaʼ jech chkalbeik mantal kʼuchaʼal chal jtote» (Tania).
¿Kʼusi stakʼ jpas yoʼ xakʼbeikun permisoe?
«Muʼyuk sbalil mi te xavochʼvune. Jech xtok, chakʼ avokol atuk xchiʼuk chakʼbe svokol li atot ameʼe. Mi chasaʼ kʼope, tsnopik ti muʼyuk achʼulele xchiʼuk mas to muʼyuk chakʼboxuk permiso» (Richard).
«Jutuk mu skotoluk veltae oy srasonal ti kʼu yuʼun chichʼ akʼel mantale. Maʼuk ti mu xakʼik jchʼay koʼonton li jtot jmeʼe, jaʼ noʼox tskʼanik ti lekuk li kʼusi ta jchʼay˗o koʼontone xchiʼuk ti mu jtikʼ jba ta vokole» (Ivy).
Beiltasel ta Vivlia: «Li bol krixchanoe tsbusan lokʼel skotol ti kʼusi oy ta yoʼontone, yan li buchʼu pʼije snaʼ spajes sba» (Proverbios 29:11).
«Muʼyuk la jchʼun li kʼusi laj yalbun jtot ti kʼu yelan skʼan jtunes li jtelefonoe. La jkʼel kʼuxi chkut sventa jtakbe batel mensaje li kamigotak akʼo mi nax xa ox akʼobale xchiʼuk la jyales aplikasionetik ti mu xakʼ jyales li jtote. Pe ta onoʼox xakʼ venta ta tsʼakal xchiʼuk mas to muʼyuk tspat yoʼonton ta jtojolal. Jaʼ yuʼun, muʼyuk lek mi ta mukul kʼusi ta jpastike» (Marie).
«Oyuk smalael avuʼun. Xuʼ van xjalij sventa xlik yakʼ apas atot ameʼ li kʼusi mu toʼox xakʼik xapase. Pe mi chakʼik venta ti chachʼun li mantaletik yalojike, xuʼ van xtijbat yoʼontonik sventa xlik yakʼboxuk mas permiso» (Melinda).
Beiltasel ta Vivlia: «Chʼunbo me smantal atot ameʼik ta kʼusiuk noʼox» (Kolosenses 3:20).
«Mi te xatʼotʼun o mi te xa-iʼun-oe, muʼyuk me chakʼik apas li kʼusi chakʼane» (Natalie).
«Li jun totile tskʼan ti xatojobuk snopele. Kʼalal ta jchiʼin ta loʼil jtot jmeʼe, chkalbeik ti ta jchʼun li kʼusi chalike, ti maʼuk ta jpas li kʼusi tskʼan koʼonton jtuke. Kʼalal jech ta jpase, mas chakʼbeikun permiso» (Joseph).
[Rekuadro ta pajina]