LI KʼUSITIK TSJAKʼ KEREM TSEBETIKE
¿Kʼu yuʼun lek ti xijbatutik ta tsobajel ta salone?
Li stestigotak Jeovae tstsob sbaik chib velta ta xemana li ta Salon sventa Tsobobbaile. ¿Kʼusi tspasik te? ¿Mi chatabe van sbalil mi labat li ta tsobajeletike?
¿Kʼusitik van chichʼ pasel tey li ta salone?
Li ta Salon sventa Tsobobbaile te chakʼik chanubtaseletik ta Vivlia ti jtunel ta jkuxlejaltike xchiʼuk tskoltautik ta:
Yojtikinel Dios.
Yaʼibel smelolal li kʼusitik chkʼotanuk ta pasel avie.
Slekubtasel jtalelaltik.
Stael lekil amigoil.
¿Mi anaʼoj xa onoʼox? Ti buy tstsob sbaik li stestigotak Jeovae jaʼ mas chalbeik skʼoplal li Ajvalilal yuʼun Diose (Mateo 6:9, 10; 24:14; Lukas 4:43).
¿Mi lek van ti xabate?
Li kʼusitik chichʼ alel tee ta skoltaot. Li beiltaseletik ta Vivlia chichʼ alel te ta tsobajele ta skoltaot sventa xata apʼijil (Proverbios 4:5). Xchiʼuk ta skoltaot sventa lek xkʼot ta nopel avuʼun li kʼusitik chapase. Jech xtok, chichʼ takʼel li junantik sjakʼobiltak liʼe:
Liʼe jaʼ junantik sbi mantal ti chjelav li ta tsobajel ta savado o domingoe:
¿Kʼu yuʼun chkakʼ akʼo sbeiltasutik li Vivliae?
¿Bu xuʼ jtatik koltael li ta yorail vokolile?
¿Kʼusi xyaket tspas ta jtojolaltik li Ajvalilal yuʼun Diose?
«Ay ta jtsobajelkutik li jchiʼil ta chanvune, vaʼun jmoj lichotikutik xchiʼuk laj kakʼbekutik skʼel li jlivrokutike. Kʼalal laj li tsobajele, laj yal ti kʼupil la sba laj yil ti kʼu yelan laj yakʼ sloʼilike xchiʼuk laj yal ti chʼabal la jech ta stemploik li vunetik ta jtunestike» (Brenda).
¿Mi anaʼoj xa onoʼox? Ta moton li tsobajele xchiʼuk muʼyuk tskʼanik takʼin.
Tspat avoʼonton li krixchanoetik chavojtikin tee. Ti kʼu chaʼal ta jtsob jbatike, li Vivliae ta xalbe srasonal ti jaʼ sventa ta jpatbe jba koʼontontik ta jujuntale (Ebreos 10:24, 25). Ta skoj ti jaʼ noʼox tskʼan sba stukik li krixchanoetik avie, tspat tajek koʼontontik ti jaʼ ta jchiʼintik li buchʼutik skʼanojik Dios xchiʼuk ti oy ta yoʼontonik li yantike.
«Bakʼintike ta vul koʼonton xchiʼuk solel lubemun tajek ta skoj ti ep kʼusitik la jpase. Pe kʼalal chibat ta tsobajele, ta spatik koʼonton xchiʼuk ximuyubaj xa mi lisut tal ta jnae xchiʼuk xa oy kipal yaʼel sventa oyuk kʼusitik jpas li ta yan kʼakʼale» (Elisa).
¿Mi anaʼoj xa onoʼox? Ta spʼejel balumile oy mas ta 120 mil stsobobbailik stestigotak Jeova xchiʼuk oy mas ta 60 mil ti bu chichʼik ta mukʼ Jeovae. Jujun jabile te van 1,500 salonetik chichʼ meltsanel ta skoj ti yantik xij-epajutike. a
a Mi chakʼan chanaʼ bu ta jtsob jbakutike, ochan ta jpajinakutik ta Internet ti bu chal: «Li tsobajeletik yuʼun stestigotak Jeovae» xchiʼuk akʼbo klik ti bu chal: «Saʼo bu nopol noʼox xkom avuʼun»