Ep buchʼutik tsnopik ti yakal tsokesik balumil li krixchanoetike xchiʼuk li kʼusitik kuxajtik tee. Jaʼ yuʼun, ep buchʼutik ta svul-o yoʼontonik ta skoj taje. Jlom buchʼutik ta xchanbeik skʼoplal li vinajel balumil xchiʼuk li kʼusitik kuxajtike, chal ti kʼusitik spasoj li krixchanoetike yakal ta sokesbe-o skʼoplal li balumile, ta xchʼaybe stsʼunbal chonbolometik, tsʼiʼleletik xchiʼuk chakʼbe svokol li kʼusitik kuxajtike.

¿Mi ta van sok-o kuʼuntik li balumile? ¿O mi chkʼot van yorail ti jun koʼontontik chijkuxi xchiʼuk li yan kʼusitik oye?

Li buchʼutik chchanbeik skʼoplale xchʼunojik lek ti xuʼ la jmoj xijkuxi xchiʼuk li chonbolometik o yan kʼusitik pasbile. Jlom buchʼutik chchanbeik skʼoplale chalik xtok ti sventa oyuk sbalil li yabtelike, skʼan la oy kʼusitik xichʼ jelel xchiʼuk ti jmojuk noʼox yorail ta xichʼ pasele. Li jlom kʼusitik skʼan jelele, jaʼik liʼe:

• Skʼan la jchantik mas xchabiel li osiletike, li teʼtikaltike, li voʼe xchiʼuk li nabetike.

• Ti jeleluk kʼu yelan ta stsʼunolajike xchiʼuk ti jeleluk kʼusitik ta stunesik sventa x-ayan luse xchiʼuk yan kʼusitik.

• Skʼan xchanik sjelel ti kʼu yelan ta stsʼunik li kʼusitik ti lek xakʼ sate xchiʼuk ti kʼu yelan ta spukik li veʼliletike yoʼ mu x-ixtolaje. Xchiʼuk xtok, skʼan mas xnop li krixchanoetik sventa slajesik li itajetike ti jaʼ xiktaik jutuk li bekʼet o tibol xchiʼuk li choye.

• Ti xkaʼibetik smelolal ti maʼuk ta xlekub-o jkuxlejaltik ta skoj li kʼusitik x-ayan kuʼuntike.

¿Kʼusi chanop? ¿Mi xuʼ van jmoj x-abtejik xanaʼ li ajvaliletike, li empresaetike xchiʼuk li krixchanoetike? ¿O mi oy van kʼusi chmakatik, jech kʼuchaʼal li pichʼ oʼontonale xchiʼuk li saʼel kʼusi tskʼan stukike? ¿Mi spas van yuʼunik sbatel osil li kʼusi tskʼanike? (2 Timoteo 3:1-5).

Li Vivliae chal ti jbalumiltike ta xlekub ta melel. Chalbutik xtok ti organisasionetike muʼyuk ta spas yuʼunik manchuk mi oy ta yoʼontonik spasel. Jech xtok, chal kʼusi skʼan pasel sventa xlekub xchiʼuk kʼuxi ta pasel.

¿Kʼuchaʼal mu xlekub yuʼunik balumil li organisasionetike? Li Jeovae * jaʼ li buchʼu la spas li balumile xchiʼuk laj yalbe komel krixchanoetik ti akʼo xchabiike (Jenesis 1:28; 2:15). Jaʼ noʼox lek ta xbat xkuxlejalik mi laj yakʼ sbaik ta beiltasel xchiʼuk mi la xchʼunbeik li smantaltake (Proverbios 20:24). Pe ¿kʼusi kʼotem ta pasel? Maʼuk ta xchʼunbeik smantal li Jeovae, ta spʼajik xchiʼuk tspas sbaik ta mantal stukik (Eklesiastes 7:29). Kʼusuk noʼox spasik li krixchanoetike oy spajeb li yabtelike, jaʼ yuʼun mu xchabi yuʼunik li balumile (Proverbios 21:30; Jeremias 10:23).

Li kʼusi ta xichʼ jelele. Li Diose muʼyuk ta xakʼ ti akʼo sokesik-o balumil li krixchanoetike (Apokalipsis 11:18). Li stuke muʼyuk snopoj ti naka noʼox oy kʼusitik ta sjel li ta ajvaliletike xchiʼuk li ta krixchanoetik ti ep tajek sokesojik talel li balumile, li kʼusi ta spase jaʼ ti ta sjel ta jyalele (Apokalipsis 21:1). Jech oxal, li Jeovae xi chal li ta Vivliae: «¡Kʼelavil!, ta jpas ta achʼ skotol li kʼusitike» (Apokalipsis 21:5).

Kʼuxi chkʼot ta pasel. Li Jeovae jaʼ tsvaʼan ta ajvalil li Jesukristo li ta Ajvalilale. Ti jaʼ chkʼot ta jnitvaneje xchiʼuk ti jaʼ tsventain talel li balumile (Daniel 2:44; Mateo 6:10).

Li Ajvalilal yuʼun Diose ta xchanubtas li krixchanoetike sventa xchʼunbeik li smantaltak Diose. Kʼalal mi laj yakʼik venta ti jaʼ noʼox xuʼ spasvan ta mantal li Jpasvanej kuʼuntike xchiʼuk mi la xchʼamik li beiltasel chakʼe, xuʼ me jun yoʼonton xkuxiik xchiʼuk li yan kʼusitik pasbile (Isaias 11:9). Li Vivliae chakʼ ta ilel ti kʼalal mi tspas xa ox tal mantal li Ajvalilal yuʼun Diose, li krixchanoetike lek xa noʼox xkuxlejalik xchiʼuk muʼyuk ta sokesik li balumile. Li kʼusitik ta spas li Ajvalilal yuʼun Diose, jaʼ liʼe:

• Chakʼ oyuk jveʼel jkotoltik (Salmo 72:16).

• Tslekubtas li osil balumile, li voʼe xchiʼuk li yan kʼusitike (Isaias 35:1, 2 6, 7).

• Chakʼ ti junuk noʼox yoʼonton xnakiik li krixchanoetike xchiʼuk li chonbolometike (Isaias 11:6-8; Oseas 2:18).

• Tslajesbe skʼoplal li nikeletike, li nojelal ta voʼe xchiʼuk li yan kʼusitik chkʼotanuk ta pasele (Markos 4:37-41).

Ta melel, poʼot xa me spas li Ajvalilal yuʼun Dios li kʼusitik taje, mi chakʼan to chavaʼibe mas smelolale, kʼelo li mantal ti xi sbie: «¿Bakʼin chlik spas mantal liʼ ta balumile?».