¿Kʼu yelan stalel jun krixchano kʼalal tsvul yoʼontone *? Xuʼ van jaʼ chtal ta ajol ti ta xiʼe, ti muʼyuk noʼox yipal yuʼun sventa stots ta steme xchiʼuk ti spʼejel kʼakʼal ta sloʼilta li svokole.

Oy jlom krixchanoetike jech onoʼox tspas stalelalik kʼalal tsvul yoʼontonike. Pe li buchʼu xchanojbeik lek skʼoplale chalik ti jlom krixchanoetike, jelel ti kʼu yelan chakʼik ta ilel kʼalal tsvul yoʼontonike, jech kʼuchaʼal li viniketike. Xi chal jlik vune: «Li viniketike ta xuchʼik pox, tstunesik poxiletik o drogaetik sventa xchʼay ta yoʼontonik li vul oʼontone. Jech oxal, kʼalal oy jun krixchano ti chuchʼ poxe, xuʼ van jaʼ ta skoj ti tsvul yoʼontone xchiʼuk mu xa noʼox stakʼik kʼoponel xchiʼuk xkapet xa noʼox sjolik».

Melel onoʼox ti mu skotoluk viniketik ti jech tspasike, pe li vul oʼontone mas xa tajek tstsatsaj talel, yuʼun «toj echʼ noʼox xibal sba» xchiʼuk tsots vokolil li ta slajebal kʼakʼal oyutike (2 Timoteo 3:1). Mi jech avokole, ¿kʼu yelan xuʼ skoltaot li Vivliae?

Li ta Vivliae oy ep mantaletik ti xuʼ skoltautik sventa jtsaltik li vul oʼontone. Jkʼeltik bal oxibuk.

1. 1. «Mu me xavul avoʼontonik ta sventa li yokʼomale, yuʼun oy kʼusi chakʼ vul oʼonton xtok li ta yokʼomale. Yuʼun xuʼ noʼox ti kʼu yepal vokolil yichʼoj tal jujun kʼakʼale» (Mateo 6:34).

   Kʼusi skʼan xal: Jaʼ lek ti mu jvul tajek koʼontontik li kʼusi xuʼ xkʼot ta pasel okʼom chaʼeje. Ep ta velta kilojtik ti muʼyuk onoʼox chkʼot ta pasel li kʼusi jnopojtik ti chopol chkʼot ta pasele.

   Paso reva liʼe: Vuleso ta ajol mi oy jech kʼotem ta pasel ta voʼne ti chopol li kʼusi chkʼot ta pasel avaloje, pe ti muʼyuk xkʼot ta pasele. Vaʼun, xi xanope: «¿Mi melel van ti tstsatsaj li vokol ta jnuptane?».

2. 2. «Li jun vinik ti tskolta yamigo sventa xlekub li kʼusitik tspase xkoʼolaj kʼuchaʼal li tsatsal takʼin ti chichʼ juxbel ye ta tsatsal takʼine» (Proverbios 27:17).

   Kʼusi skʼan xal: Li krixchanoetik ti mas nopol oyik ta jtojolaltike xuʼ skoltautik sventa jtsaltik li vul oʼontone. Yuʼun xuʼ van xalbutik li kʼusitik kʼotem ta pasel ta xkuxlejalike, pe skʼan xkakʼ jbatik ta koltael.

   Paso reva liʼe: Saʼo buchʼu xuʼ skoltaot, xuʼ van junuk avamigo ti jech la snuptan kʼuchaʼal voʼote. Jakʼbo kʼusitik ti koltaat-oe xchiʼuk li kʼusitik muk xkoltaat-oe.

3. 3. «Akʼbeik me sbain skotol li kʼusi chavul-o avoʼontonike [o li avokolike], yuʼun oyoxuk ta yoʼonton» (1 Pedro 5:7, tsʼib ta yok vun).

   Kʼusi skʼan xal: Li Diose oy ta yoʼonton li buchʼutik tsvul yoʼontonike, chalbutik ti xkalbetik li kʼusi oy ta koʼontontike xchiʼuk li kʼusi ta jvul-o koʼontontike.

   Paso reva liʼe: Tsʼibao ta jlikuk vun li kʼusitik chavul-o avoʼontone, ta tsʼakale albo ta jujutos li Diose xchiʼuk kʼanbo koltael sventa xanaʼ kʼusi xuʼ xapas.

Li Vivliae maʼuk noʼox ta xakʼbutik mantaletik sventa jtsaltik li vul oʼontone, moʼoj, ta xalbutik xtok ti jutuk xa skʼan sventa xchʼay skʼoplal li kʼusitik chakʼ vokoliletike. Pe ¿kʼuxi taje?

Li Ajvalilal yuʼun Diose ta slajesbe skʼoplal skotol li kʼusitik chakʼ vul oʼontone (Apokalipsis 21:4). Jech xtok, kʼalal mi tspas xa ox mantal li Ajvalilal taje, muʼyuk xa chakʼ jvokoltik kʼalal chtal ta joltik li kʼusi toʼox ta jvul-o koʼontontike (Isaias 65:17).

Taje jaʼ jech ta spas ta jelavel «li Dios ti chakʼ jun oʼontonale» (Romanos 16:20). Kʼelo avil ti xi chalbutike: «Jnaʼoj lek li kʼusi ta jpas ta atojolalike, chkakʼboxuk jun oʼontonal, maʼuk vokolil, sventa oyuk kʼusi lek xataik ta jelavel xchiʼuk sventa oyuk spatobil avoʼontonik» (Jeremias 29:11).