¿MI OY VAN BUCHʼU LA SPAS?
Ti kʼu yelan chlichʼan xikʼ li mariposa blanca de la col
Kʼalal skʼan toʼox xlik viluk li pepenetike, baʼyel skʼan xkʼixnaik ta kʼakʼal li xchʼuxuvilike. Li mariposa blanca de la col sbie xuʼ noʼox xvil ta anil akʼo mi butʼul o mi limil, pe li yan pepenetike mu xuʼ jech spasik. ¿Kʼuxi chutik?
Nopbo skʼoplal liʼe: Kʼalal mu toʼox xlik vilikuk jutuk mu skotoluk li pepenetike, snupʼoj xikʼik kʼalal chkʼixna sbaik ta kʼakʼale xchiʼuk junantike tukʼ xlichʼanojik. Pe mu jechuk tspas li mariposa blanca de la col, yuʼun kʼalal chkʼixna sba ta kʼakʼale, jaʼ jech chlichʼan xikʼ kʼuchaʼal li letra «V». Li buchʼutik chchanbeik skʼoplale yakʼojik venta ti jaʼ jech mas tstabeik sbalil li xkʼixnal kʼakʼale, yuʼun jaʼ mas te chkʼot xkʼixnal kʼakʼal li ta xchʼuxuvil spatike. Vaʼun, chkʼixnajik ta anil sventa xlik vilikuk. Li jtsop pʼijil krixchanoetik ta Universidad de Exeter ta Inglaterrae la skʼelik mi xuʼ xchanbeik li pepen taje sventa oyuk kʼusi smeltsanik ti ta xkʼixnal kʼakʼal ch-abteje (paneles solares) xchiʼuk ti ta aniluk xkʼixnaje. Kʼalal jech la spasike, laj yakʼik venta ti j-oʼlol to chjelav ti kʼu yepal tstsobbe xkʼixnal li kʼakʼale.
Li buchʼutik chchanbeik skʼoplale laj yakʼik venta xtok ti chojobinaj li xikʼtake. Ta skoj ti la chanbeik ti kʼu yelan chlichʼan xikʼik kʼuchaʼal letra «V» li mariposa blanca de la col xchiʼuk ti chojobinaj ta kʼakʼal li xikʼtake, lik smeltsanik paneles solares ti lek ch-abtej xchiʼuk ti muʼyuk ole. Li jchanubtasvanej Richard ffrench-Constant ti te skʼoplal li ta jtsop buchʼutik la xchanbeik skʼoplal li mariposa blanca de la col laj yal ti jaʼ noʼox stukik lek meltsanbilik sventa lek stabeik sbalil li kʼakʼale.
¿Kʼusi chanop? Ti jaʼ jech chlichʼan xikʼ kʼuchaʼal letra «V» li mariposa blanca de la col sbie ¿mi ta jech noʼox kʼataj stuk o mi oy van buchʼu la spas?