Li injenieroetike yakal tspasik uni rovotetik sventa li bu mu xa xjelav yabtejebik li doktoretike, jaʼ yuʼun mu xa persauk ep xjatvanik. Ta skoj ti toj lek snaʼ xpux sba skʼobtak li pulpoe, jaʼ yakal chchanbeik yoʼ spasik jun achʼ abtejebal.

yoʼ mu xa mas epuk xjatvanik kʼalal tspasik operar li doktoretike

 Nopbo skʼoplal liʼe: Li jun pulpoe kʼusiuk noʼox xuʼ stsak, xuʼ xik xchiʼuk xuʼ xmichʼ, koliyal ti toj lek xpux sba xchiʼuk xuʼ xachʼanan li vaxakib skʼobtake. Xuʼ jech spas akʼo mi toj bikʼit o toj chukul ti bu oy li kʼusi tskʼan tstsake. Maʼuk noʼox xuʼ xpux skʼobtak ti bu jotukal skʼane, xuʼ stsin o stsatsubtas jkʼosuk skʼob mi persa jech tskʼan chaʼie.

 Li buchʼutik chchanbeik skʼoplale chalik ti toj ep chkoltavan ta spasel operasionetik ti jechuk xichʼ pasel junuk skʼob rovot ti mu toj teʼlukanuke xchiʼuk ti snaʼuk xpux sbae; vaʼun mu xa persauk ep butik chichʼ jatel jechuke. Ti oyuk abtejebaletik jech kʼuchaʼal taje, mu xa persauk ep chichʼik jatel li jchameletike.

 Kʼelo avil kʼu yelan chbakʼ skʼobtak li pulpoe.

 Avie yakal xa chichʼ pasel preva ta xchanel operasionetik jun skʼob rovot ti xkoʼolaj ch-abtej kʼuchaʼal skʼob pulpoe. Li rovot taje, 135 milimetro snatil, oy jun parte yuʼun ti ta xik muyel xchiʼuk tstsak li kʼusitik kʼunik ta yut jbekʼtaltike, yan li jun partee jaʼ tspas li operasione. Xi chal li doktor ta biorobotika Tommaso Ranzani, ti tskolta sba xchiʼuk li buchʼutik la spasik li skʼob rovot taje: «Chkalkutike, li kʼusi la jpaskutike jaʼ to noʼox slikeb, ta xichʼ pasel yantik ti mas lekike xchiʼuk ti mas ep kʼusitik xuʼ spase».

 ¿Kʼusi chanop? ¿Mi ta kʼunkʼun kʼataj talel o mi oy van buchʼu la spas li skʼobtak pulpoe?