Jlik livro ti chalbe skʼoplal kʼalal chvokʼ neneʼetike xi chale:«Li leche chchonik sventa neneʼetike mi jsetʼuk onoʼox xkoʼolaj xchiʼuk li yaʼlel xchuʼ meʼiletike. Jun srasonal ti kʼu yuʼun toj lek li yaʼlel xchuʼ meʼiletike jaʼ ti chjelilaj batel sventa jaʼuk xakʼbe li kʼusi chtun yuʼun li uni neneʼe».

 Nopbo skʼoplal liʼe: Kʼalal chchuʼun li jun uni neneʼe, chjelilaj batel li yaʼlel xchuʼ smeʼe. Ta slikebale, oy mas svitaminail, proteínas, minerales xchiʼuk voʼ. Pe kʼalal chlaj xa bal yoʼonton ta chuʼunele, li yaʼlel chuʼile oy xa mas sgrasail sventa lek xnoj˗o yuni chʼut. Pe maʼuk noʼox, yuʼun li yaʼlel chuʼile chjelilaj batel kʼalal ch˗echʼ batel li kʼakʼaletike xchiʼuk kʼalal yantik chchʼi batel li neneʼe.

 Li yaʼlel xchuʼ meʼiletike chjelilaj batel xtok li ta jun kʼakʼale. Yuʼun li ta akʼobaltike, yan˗o kʼusitik yichʼoj, jech kʼuchaʼal li melatonina ti chkoltavan sventa x-och svayel li uni neneʼe. Pe jaʼuk li ta kʼakʼaltike, yan˗o kʼusi yichʼoj xtok ti jaʼ chkoltavan sventa vikʼiluk sat li neneʼe. Skotol taje jaʼ chkoltavan sventa oyuk noʼox lek yorail ti kʼu sjalil chvay li uni neneʼe xchiʼuk ti kʼu sjalil vikʼil sate.

 Kʼalal jaʼtik to chvokʼ sneneʼ li jun meʼile, li yaʼlel xchuʼe kʼonkʼontik skoloral xchiʼuk calostro sbi. Akʼo mi juteb noʼox xuchʼ li yuni neneʼe, toj ep tstabe sbalil. Yuʼun li calostroe toj ep svitaminailtak xchiʼuk oy kʼusitik yan yichʼoj tal ti jaʼ chkoltaat˗o li neneʼ sventa stsatsub xchiʼuk ti mu x˗ipaje. Jech xtok, jaʼ chkoltaat sventa lekuk x˗abtej li yuni chʼute.

 Li meʼile muʼyuk tsvul˗o yoʼonton mi oy lek yaʼlel xchuʼ akʼo mi vachetik xvokʼ li yole. Yuʼun li yaʼlel xchuʼe kʼunkʼun ch˗epaj batel ek sventa xnoj˗o lek xchʼut li yuni neneʼe.

 ¿Kʼusi chanop? Li yaʼlel xchuʼ meʼiletike, ¿mi ta jech noʼox kʼataj talel stuk o mi oy van buchʼu la spas?