Jech kʼuchaʼal chal Vivliae, li David ti jaʼ ajvalil ta Israele kuxi ta siglo 11 kʼalal muʼyuk toʼox talem Jesuse. Epal sien jabil ajvalilaj li snitilulaltake. Pe oy buchʼutik chalik ti jech noʼox la nopbil skʼoplal li Davide xchiʼuk ti muʼyuk la kuxi ta melele. ¿Mi ta melel kuxi li Davide?

Ta 1993, oy jtsop krixchanoetik ti jaʼ xchiʼiltak ta abtel li Avraham Biran ti chchanbe skʼoplal kʼusitik voʼne mukajtik ta lum (arqueólogo) la staik sjepelul ton ta Tel Dan, te ta snorteal Israel, xi tsʼibabil li ta sjepelul tone: «Sna David». Ta voʼneal semítico kʼop li sletrailtake, laj yichʼ tsʼibael ta siglo 19 kʼalal muʼyuk toʼox talem Jesuse. Yileluke jaʼ sjepelul jun monumento ti jaʼ la svaʼanik li j-arametike, jaʼ sventa stoy skʼoplalik ta skoj ti la stsalik ta paskʼop li j-israeletike.

Xi chal li kʼusi la stsʼibaik ta Bible History Daily: «Junantike la xchibal kʼoptaik mi jech tsʼibabil ta melel ti ‹sna David› xie [...]. Akʼo mi jech, jutuk mu skotoluk li buchʼutik chchanbeik skʼoplal Vivliae xchiʼuk li buchʼutik chchanbeik skʼoplal kʼusitik voʼne mukajtik ta lume laj yalik ti sjepelul ton laj yichʼ tael ta Tel Dane, jaʼ la li sbaʼyel prevail ti kuxi onoʼox ta melel li ajvalil David ti te chalbe skʼoplal ta Vivliae. Li kʼusi laj yichʼ taele jaʼ li kʼusi mas tsots skʼoplal yichʼoj albel skʼoplal li ta revista Biblical Archaeology Review».