Xi chal li Vivliae: «Pe te chkom-o sbatel osil li buchʼu tspas kʼusi tskʼan yoʼonton Diose» (1 Juan 2:17). Pe ¿kʼusi van tskʼan ta jpastik li Diose?

•   Li Diose tskʼan ti xkojtikintike xchiʼuk ti xkojtikinbetik li xnichʼone. Li Jesuse xi laj yalbe ta jun orasion li Diose: «Jaʼ skʼoplal kuxlejal sbatel osil liʼe: ti ta xojtikinikote, li jun noʼox melel Diosote xchiʼuk ti chojtikinik ek li buchʼu la atak tale, li Jesukristoe» (Juan 17:3). ¿Kʼusi smakoj ti chkojtikintik li melel Dios xchiʼuk li Jesuse? a Xuʼ xkojtikintik mi ta jchantik li Vivliae xchiʼuk mi chkakʼ ta jkuxlejaltik li kʼusitik ta jchantik tee. Li ta Vivliae te chal kʼusi tsnop li Jeovae, li jpasvanej kuʼuntike, yuʼun jaʼ li Dios ti yakʼoj jkuxlejaltike (Echos 17:24, 25). Li Vivlia xtoke, chalbe skʼoplal li xnichʼon Diose, li Jesuse, ti chanubtasvan ta sventa «li kuxlejal sbatel osile» (Juan 6:67-69).

•   Li Diose tskʼan ti oyuk xchʼunel koʼontontik ta sventa li matanal laj yakʼ Jesuse. Li Jesuse tal tunuk ta balumil xchiʼuk tal yakʼ xkuxlejal kʼuchaʼal pojelal ta stojolal li krixchanoetike (Mateo 20:28). Li matanal laj yakʼ Jesuse, jaʼ la sjam-o batel be sventa sta xkuxlejalik sbatel osil li krixchanoetik kʼalal mi pasem xa ox ta paraiso li balumile b (Salmo 37:29). Xi laj yal li Jesuse: «Skʼanoj tajek krixchanoetik li Diose, jaʼ yuʼun laj yakʼ li jun noʼox Xnichʼon sventa mu xichʼ lajesel li buchʼu chakʼ xchʼunel yoʼonton ta stojolale, moʼoj, yuʼun jaʼ sventa tsta-o xkuxlejal sbatel osil» (Juan 3:16). Kʼuchaʼal chkiltike, maʼuk noʼox skʼan jchʼuntik ta stojolal li Jesuse. Skʼan xkakʼtik ta ilel xchʼunel koʼontontik ta stojolal kʼalal chkakʼ ta jkuxlejaltik li kʼusi chchanubtasvane xchiʼuk ti jpastik li kʼusi tskʼan Stote (Mateo 7:21; Santiago 2:17).

•   Li Diose tskʼan ti lekuk xkil jbatik xchiʼuke. Tskʼan ti xijnopaj ta stojolale xchiʼuk ti xkamigointike (Santiago 2:23; 4:8). Li Diose kuxul-o sbatel osil xchiʼuk mu snaʼ xcham. Jaʼ yuʼun, tskʼan ti xkuxi sbatel osil li yamigotak eke. Li ta Vivliae chal ti Diose oy ta yoʼonton ti ‹xkuxiik› sbatel osil skotol li buchʼu oy ta yoʼonton chnopaj ta stojolale (Salmo 22:26).

 Xi xchʼunojik jlome: Chtavan mi lijkuxi sbatel osile.

 Li kʼusi melele: Li buchʼu yaloj ti chkuxi sbatel osil li krixchanoetike jaʼ li Diose, yuʼun skʼanojutik xchiʼuk tskʼan ti xijmuyubajutike (Santiago 1:17; 1 Juan 4:8). Li Diose snaʼoj ti sventa xijmuyubaj noʼoxe, skʼan oyuk kabteltik ti bu oyuk jbalil chkaʼi jbatik yuʼune (Eklesiastes 3:12). Li Diose chal ti buchʼu chkuxi ta sbatel osil li ta balumile, tsta yabtelik ti tskʼupinike, ti tstabeik sbalile xchiʼuk ti tstabeik sbalil li yutsʼ yalalike (Isaias 65:22, 23).

 Jech xtok, li buchʼutik chkuxiik sbatel osile chchanik yan kʼusitik achʼ ta sventa li Jpasvaneje xchiʼuk skotol li kʼusitik spasoje. Li Diose laj yakʼbe ta yoʼonton krixchanoetik ti tskʼan chkuxiik sbatel osile xchiʼuk ti xojtikin mase (Eklesiastes 3:10, 11). Jaʼ yuʼun chaʼa, li buchʼutik chkuxiik sbatel osile, toj ep kʼusitik xuʼ spasik xchiʼuk ep kʼusitik lekik xuʼ xchanik.