Li Diablo ti Satanas sbi xtoke jaʼ jun espiritu, jaʼ xkaltik, jaʼ jun kuxlejal ti mu xvinaje. Ta skoj taje, mu xvinaj ti bu nakale. Muʼyuk te oy ta infierno chakʼbe svokol li buchʼutik chopolik jech kʼuchaʼal xvinaj li ta lokʼole.

«Paskʼop ta vinajel»

 Ta voʼnee, xuʼ toʼox xtal xbat bu skʼan yoʼonton li Diabloe. Jech xtok, xuʼ toʼox xbat svaʼan sba ta yeloval Dios kʼuchaʼal li yan anjeletike (Job 1:6). Li Vivliae yaloj xa onoʼox ti ta xlik «paskʼop ta vinajel» xchiʼuk ti chichʼ jipel yalel tal ta balumil li Satanase (Apokalipsis 12:7-9). Li kʼusitik xcholet kʼotem ta pasel ti yaloj xa onoʼox li Vivliae, jamal chakʼ ta ilel ti echʼ xa li paskʼop taje. Li avie jaʼ xa noʼox ta balumil ti stakʼ kʼusitik spas li Diabloe.

 ¿Mi jaʼ skʼan xal ti oy bu jotukal lek nakal liʼ ta balumile? Kʼalal yalbe skʼoplal voʼneal jteklum Pergamo li Vivliae, xi chale: «Ti bu tspas mantal Satanase» xchiʼuk «ti bu nakal li Satanase» (Apokalipsis 2:13). Taje maʼuk skʼan xal ti jaʼ te nakal li Diabloe, xuʼ van jaʼ chalbe skʼoplal ti chopol tajek li kʼusitik tspasik li relijionetik ti jaʼ chichʼik-o ta mukʼ li Satanase. Muʼyuk bu jotukal lek nakal liʼ ta balumile. Li Vivliae chal ti jaʼ sventainoj skotol li mukʼtik lumetik ta balumile xchiʼuk ti jaʼ xa noʼox ta balumil ti stakʼ kʼusitik spase.