Li Vivliae chal ti xi albat li Jesuse: «Voʼot Xnichʼonot li Diose» (Juan 1:49). Kʼalal Xnichʼon Dios xi li Vivliae, chakʼ ta aʼiel ti jaʼ Jpasvanej li Diose o ti jaʼ «li nioʼ sventa cuxlejale», ti jaʼ pasat ek li Jesuse (Salmo 36:9; Apokalipsis 4:11). Li Vivliae muʼyuk chal ti kʼotem ta totil li Dios jech kʼuchaʼal li viniketik ti chnichʼnajike.

 Li Vivlia xtoke chal ti jaʼik ‹xnichʼnab Dios› li anjeletike (Job 1:6, tsʼib ta yok vun, TNM). Jech xtok, chal ti jaʼ «xnichʼon Dios» li Adan ti jaʼ li baʼyel vinike (Lukas 3:38). Pe ta skoj ti jaʼ baʼyel pasat yuʼun Dios li Jesuse xchiʼuk ti muʼyuk buchʼu koltaat ta spasele, li Vivliae chal ti jaʼ li Xnichʼon Dios ti mas tsots skʼoplale.

•  ¿Mi te xa onoʼox oy ta vinajel Jesus kʼalal muʼyuk toʼox talem ta balumile?

•  ¿Kʼusi tspas toʼox Jesus kʼalal muʼyuk toʼox talem ta balumile?

 Te xa onoʼox oy, yuʼun kʼalal muʼyuk toʼox talem ta balumile, jaʼ xa onoʼox jun kuxlejal ti mu xvinaj ta kʼelele. Yuʼun «likemun tal ta vinajel» xi stuk li Jesuse (Juan 6:38; 8:23).

 Jaʼ baʼyel pasat yuʼun Dios li Jesus kʼalal muʼyuk toʼox kʼusi yan pasbile. Xi ch-albat skʼoplal ta Vivliae:

•   «Jaʼ baʼyel laj yichʼ pasel ta skotol li kʼusitike» (Kolosenses 1:15).

•   «Jaʼ li buchʼu baʼyel pasat yuʼun Diose» (Apokalipsis 3:14).

 Jaʼ skʼoplal Jesus kʼalal xi xa onoʼox yaloj li Vivliae: «Voʼone onoʼox sliquel tal stsʼunubal» (Miqueas 5:2; Mateo 2:4-6).

 Yichʼoj toʼox tsots yabtel. Jaʼ laj yalbe skʼoplal Jesus kʼalal xi la skʼan ta orasione: «Tot, toybun jkʼoplal [...] jech kʼuchaʼal toybil toʼox jkʼoplal ta axokon kʼalal skʼan toʼox xlik tal stsʼunbal li krixchanoetike» (Juan 17:5).

 La skolta Stot ta pasel skotol li kʼusitik oye. Koʼol abtej xchiʼuk Stot «kʼuchaʼal jun bankilal j-abtel» (Proverbios 8:30, TNM). Xi chal Vivlia ta sventa li Jesuse: «Jaʼ ta stojolal ti laj yichʼ pasel skotol li kʼusitik yantik ta vinajele, li kʼusitik ta sba balumile» (Kolosenses 1:16).

 Jaʼ ta stojolal Jesus ti la spas skotol kʼusitik oy li Diose, taje te tsakal skʼoplal li anjeletike xchiʼuk li vinajel balumile (Apokalipsis 5:11). Ti vaʼ yelan la skolta sbaik li Dios xchiʼuk Jesuse xkoʼolaj kʼuchaʼal jun arkitekto ti koʼol ch-abtej xchiʼuk jun jvaʼanej nae. Li arkitektoe jaʼ tspasbe li splanoal nae, yan li jvaʼanej nae jaʼ tsvaʼan.

 Abtej kʼuchaʼal li Kʼope. Kʼalal muʼyuk toʼox talem ta balumil li Jesuse, li Vivliae chal ti jaʼ «li Kʼope» (Juan 1:1). Taje jaʼ skʼan xal ti tunesat yuʼun Dios sventa sjelubtasbe mantaletik li anjeletike.

 Yaʼeluke, kʼot ta yajkʼopojel Dios xtok ta stojolal li krixchanoetike. Yikʼaluk van jaʼ tunesat Jesus kʼalal laj yalbe mantaletik li Adan xchiʼuk Eva te ta nichimaltik Edene (Génesis 2:16, 17). Jaʼ van skʼoplal Jesus xtok li anjel ti la sbeiltas j-israeletik ta takixokol balumile xchiʼuk ti laj yaʼibeik yechʼomal ye li j-israeletike (Éxodo 23:20-23). a