¿Mi skʼan xkichʼtik ta mukʼ li lokʼoletike?

CHICHʼ TIJEL TA

Li kʼusi chal Vivliae

Moʼoj. Jun ensiklopedia katolikae, xi laj yal ta sventa li mantaletik laj yakʼbe j˗israeletik li Diose: «Li loʼiletik ta Vivliae jamal chakʼ ta ilel ti muʼyuk la stunesik lokʼoletik sventa xichʼik ta mukʼ li Diose» (New Catholic Encyclopedia). Jkʼelbetik batel skʼoplal junantik tekstoetik ta Vivlia.

Li ta Eksodo 20:4, 5 xi chale: «Mu me oyuk kʼusi xapasbe slokʼol mi jaʼuk kʼusi ti xkoʼolaj kʼuchaʼal li kʼusitik oy ta vinajele, li kʼusitik oy ta balumile o li kʼusitik oy ta voʼe. Mu me xanijan aba ta stojolalik xchiʼuk mu me buchʼu stijbot avoʼonton ti chatun ta stojolalike, yuʼun li Jeova Diosun avuʼune, jaʼ Diosun ti jtuk noʼox ta jkʼan ichʼel ta mukʼe». Jech kʼuchaʼal chal li Vivliae, li Diose stuk noʼox skʼan ichʼel ta mukʼ, yuʼun muʼyuk lek chil li krixchanoetik ti chichʼik ta mukʼ lokʼoletik, santoetik o yan kʼusitike.
Xi chal Dios li ta Isaias 42:8: «Mu xcacʼ bochʼo yan chichʼ li jlequilal cutsilale; mu xcacʼ jaʼ chcʼot ta stojolic quichʼel ta mucʼ li cʼusitic locʼtabilic noʼoxe» (Xch’ul C’op Jtotic Dios, ta skʼop Chenalhó). Jaʼ yuʼun, li Diose mu skʼan ti jtunestik lokʼoletik sventa xkichʼtik-o ta mukʼe. Kʼalal la spasik slokʼol jkot chʼiom tot vakax ta oro li j˗israeletike, li Diose laj yal ti «laj xa sokes sbaik» ta skoj li kʼusi la spasike (Eksodo 32:7-9, Xchʼul C’op Jtotic Dios, ta skʼop Chenalhó).
Li ta Echos 17:29 xi chale: «Jaʼ yuʼun mu stakʼ jnoptik ti koʼol kʼuchaʼal oro, plata o pasbil ta ton li Diose o ti pasbil noʼox ta skʼob krixchanoetik jech kʼuchaʼal xtal noʼox ta snopbenike». Kʼalal chichʼik ta mukʼ Dios li krixchanoetike, tstunesik lokʼoletik ti naka noʼox pasbil ta kʼabale. Pe jech kʼuchaʼal chal li Vivliae, li melel jchʼunolajeletike ta xchʼunel yoʼonton chanavik, maʼuk ta skoj li kʼusi xil ta satike (2 Korintios 5:7).
Li ta 1 Juan 5:21 xi chalbutik jun mantale: «Chʼako abaik lokʼel ta stojolal li santoetike». Jech kʼuchaʼal chal li mantaletik akʼbatik li j˗israeletik ta voʼnee xchiʼuk li tsobobbail ta baʼyel sigloe, chkakʼtik venta ti jaʼ jecheʼ chanubtasel ti skʼan jtunestik lokʼoletik o santoetik sventa xkichʼtik-o ta mukʼ li Diose.