¿Kʼu yelan li anjeletike?
Li kʼusi chal Vivliae
Li anjeletike tsots sjuʼel xchiʼuk ep kʼusi spas yuʼunik, mu jechuk kʼuchaʼal li krixchanoetike (2 Pedro 2:11). Te nakalik ti bu mas to toj toyol ti mu xvinaj ta kʼelele, ti vinajel tsbiiltas li Vivliae, pe maʼuk li vinajelbalumil ti xkil ta jsatike (1 Reyes 8:27; Juan 6:38). Taje jaʼ te oyik skotol li kuxlejaletik ti mu xkiltike. Jaʼ yuʼun, bateltike xi chichʼ albel skʼoplalike: kuxlejaletik ti mu xvinaj ta kʼelele (Echos 23:8, 9; 1 Pedro 3:19).
¿Buchʼu la spas li anjeletike?
Jaʼ li Diose. Yoʼ spase, la stunes Jesus ti «jaʼ baʼyel laj yichʼ pasel ta skotol li kʼusitike». Xi chal Vivlia ta sventa li yabtel Jesuse: «Jaʼ ta stojolal ti laj yichʼ pasel skotol li kʼusitik yantik ta vinajele, li kʼusitik ta sba balumile, li kʼusitik xvinaje, li kʼusitik mu xvinaje», taje te skʼoplal li anjeletike (Kolosenses 1:13-17). Muʼyuk chnupunik xchiʼuk muʼyuk chil yalab xnichʼnabik li anjeletike (Markos 12:25). Ta jujuntal pasatik yuʼun Dios, jaʼ yuʼun jaʼik «xnichʼnabtak li melel Diose» (Job 1:6, TNM).
Voʼne xa tajek laj yichʼik pasel li anjeletike, jaʼo kʼalal muʼyuk toʼox li balumile. Kʼalal la spas balumil li Diose, «xcuxet noʼox yoʼnton [likel] scotol» li anjeletike (Job 38:4-7).
¿Jayvoʼ anjeletik oy?
Li Vivliae muʼyuk chal jayvoʼ oy ta melel, pe chal ti toj epike. Jech kʼuchaʼal liʼe, li jtakbol Juane akʼbat yil yuʼun Dios ti ta smiyonal noʼox oy li anjeletike (Apokalipsis 5:11).
¿Mi oy sbiik ta jujuntal xchiʼuk mi jmoj li stalelalike?
Oy sbiik ta jujuntal. Li Vivliae chalbe sbi chaʼvoʼ anjeletik, jaʼ li Miguel xchiʼuk Gabriele (Daniel 12:1; Lukas 1:26) a. Li Vivliae chal xtok ti oy yan anjeletik laj yal ti oy sbiike, pe ti kʼusie, muʼyuk la skʼan laj yalik kʼusi ti sbiike (Génesis 32:29; Jueces 13:17, 18).
Jelajtik stalelal li jujun anjele xchiʼuk xuʼ snop stukik li kʼusi tskʼan tspasike. Xuʼ xchiʼin sbaik ta loʼil xchiʼuk xuʼ skʼupil kʼoptaik li Jeovae (Lukas 2:13, 14; 1 Korintios 13:1). Xuʼ stʼuj stukik mi jaʼ tspasik li kʼusi leke o mi jaʼ li kʼusi chopole. ¿Kʼuxi jnaʼojtik taje? Yuʼun oy junantik anjeletike jaʼ lek laj yaʼiik ti tspasik li kʼusi chopole xchiʼuk jaʼ laj yakʼ sbaik ta stojolal li Satanas sventa skontrainik li Diose (Mateo 25:41; 2 Pedro 2:4).
¿Mi oy van anjeletik ti mas tsots yabtelike?
Oy. Li bankilal anjel Miguele jaʼ li buchʼu mas tsots yabtel xchiʼuk ti mas ep sjuʼele (Judas 9; Apokalipsis 12:7). Li jchop anjeletik ti serafin sbiike tsots yabtel yichʼojik, yuʼun jaʼ te setelik ta yeloval li ta smukʼta chotleb Jeova sventa ajvalilale (Isaías 6: 2, 6). Li keruvinetike tsots yichʼoj yabtelik ek, yuʼun jaʼ tspasik li kʼusitik tsots skʼoplale. Jech kʼuchaʼal liʼe, kʼalal nutsatik lokʼel yuʼun Dios ta nichimaltik Eden li Adan xchiʼuk Evae, li keruvinetike jaʼ la xchabiik li yochebal nichimaltike (Génesis 3:23, 24).
¿Mi xuʼ skoltautik?
Xuʼ. Li Diose tstunes anjeletik sventa skolta li krixchanoetike. Jkʼeltik kʼuxi tspas.
Tstunes anjeletik sventa tsbeiltas yajtuneltak ta balumil ta spukel batel li lekil aʼyejetik ta sventa li Ajvalilal yuʼune (Apokalipsis 14:6, 7). Chkoltaatik li buchʼutik chcholik mantale xchiʼuk li buchʼutik chchikintaike (Echos 8:26, 27).
Li anjeletike chchabiik li stsobobbail yajtsʼaklom Kristo sventa sakuke, chchʼak lokʼel li buchʼutik chopol kʼusi tspasike (Mateo 13:49).
Li anjeletike tsbeiltasik xchiʼuk chchabiik li buchʼutik tukʼ yakʼoj sbaik ta stojolal Diose (Salmo 34:7; 91:10, 11; Evreos 1:7, 14).
Li anjeletik xchiʼuk Jesuse poʼot xa spasik kʼop sventa slajesbeik skʼoplal li choplejal xchiʼuk vokolile (2 Tesalonisenses 1:6-8).
¿Mi oy van kaj-anjeltik ta jujuntal ti chchabiutike?
Li anjeletike tskʼelik ti lekuk oyik ta mantal li yajtuneltak Diose, pe taje maʼuk skʼan xal ti chakʼ jujun kaj-anjeltik Dios sventa tskʼelutik o chchabiutike b (Mateo 18:10). Li anjeletike muʼyuk tsmakik ta be li prevaetik o li kʼusi chopol xuʼ snuptanik li yajtuneltak Diose. Pe li Vivliae chal ti ep ta veltae, ‹chakʼ kiltik kʼuxi xuʼ xijkol›, jaʼ xkaltik, chakʼ jpʼijiltik xchiʼuk tskoltautik yoʼ xkuch kuʼuntik (1 Korintios 10:12, 13; Santiago 1: 2-5).
Li kʼusi mu jechuk tsnopik ta sventa li anjeletike
Xi xchʼunojik jlome: Lek skotol li anjeletike.
Li kʼusi melele: Li Vivliae chal ti oy ‹pukujetik ti toj chopolike› xchiʼuk ti oy «anjeletik ti la saʼ smulike» (Efesios 6:12; 2 Pedro 2:4). Jaʼik anjeletik ti la stoy sbaik ta stojolal Diose, jaʼ laj yakʼ sbaik ta stojolal li Satanase. Kʼalal jech la spasike, kʼatajik ta pukujetik.
Xi xchʼunojik jlome: Mu snaʼ xcham li anjeletike.
Li kʼusi melele: Chichʼik lajesel li chopol anjeletike xchiʼuk li Diabloe (Judas 6).
Xi xchʼunojik jlome: Chkʼataj ta jun anjel kʼalal oy buchʼu chchame.
Li kʼusi melele: Li anjeletike maʼuk krixchanoetik ti chaʼkuxiemike. Yan-o ti kʼu yelan pasbilike (Kolosenses 1: 16). Li buchʼutik chchaʼkuxiik ta vinajele muʼyuk xa bu chchamik-o (1 Korintios 15:53, 54). Jech xtok, mas to tsots skʼoplal yabtel ch-akʼbatik kʼuchaʼal li anjeletike (1 Korintios 6:3).
Xi xchʼunojik jlome: Jaʼ sventa chtunik ta stojolal krixchanoetik ti laj yichʼik pasel li anjeletike.
Li kʼusi melele: Li anjeletike jaʼ chchʼunbeik smantal li Diose, maʼuk li kʼusi chkaltik voʼotike (Salmo 103:20, 21). Li Jesuse snaʼoj taje, jaʼ yuʼun jaʼ la skʼanbe koltael li Stote, maʼuk li anjeletike (Mateo 26:53).
Xi xchʼunojik jlome: Xuʼ jpasbetik orasion li anjeletike.
Li kʼusi melele: Kʼalal oy buchʼu ta jpasbetik orasione, jaʼ te chkakʼtik ta ilel ti chkichʼtik ta mukʼe. Pe jaʼ noʼox xuʼ xkichʼtik ta mukʼ li Diose (Apokalipsis 19:10). Kʼalal ta jpastik orasione, jaʼ noʼox xuʼ jkʼopontik Dios xchiʼuk jaʼ kajkʼopojeltik li Jesuse (Juan 14:6).
a Junantik Vivliae tstunesik li jpʼel kʼop Lucifer li ta Isaías 14:12 xchiʼuk chalik ti jaʼ toʼox la jech sbi li anjel ti pas ta Satanas xchiʼuk ta Diabloe. Akʼo mi jech, li jpʼel kʼop laj yichʼ tunesel ta ebreoe jaʼ skʼan xal «ti chojobinaj noʼoxe». Li loʼil ta Vivliae chakʼ ta ilel ti jaʼ skʼoplal li snitilulal ajvalil ta Babiloniae ti chbikʼtajesbat skʼoplal yuʼun Dios ta skoj ti jtoybae (Isaías 14:4, 13-20). Jech oxal, kʼalal ‹xojobinaj noʼox› xie, jaʼ sventa snaʼle li snitilulal ajvalil ta Babiloniae.
b Junantike chalik ti kʼalal chal Vivlia ti lokʼ ta chukel li Pedroe, chakʼ la ta ilel ti oy kaj-anjeltik ta jujuntal ti chchabiutike (Echos 12: 6-16). Kʼalal ay skʼel jtakboletik li Pedroe, laj yalik ti «jaʼ yaj-anjel» ti ay kʼelatikuke. Jech van laj yalik ta skoj ti la snopik ti jaʼ jun anjel li buchʼu kʼot kʼoponatikuke, ti maʼuk stuk li Pedroe.
Xuʼ van chakʼupin skʼelel xtok liʼe
KʼUSITIK TSJAKʼIK TA SVENTA VIVLIA
¿Buchʼu jaʼ li bankilal anjel Miguele?
Oy yan sbi xtok ti yan-o van chavaʼi ta aʼiele.
LI JKʼEL˗OSIL TA TOYOLE
¿Mi oy van kaj-anjeltik ta jujuntal ti chchabiutike?
¿Mi xuʼ van jpat koʼontontik ti chchabiutik junuk o mas anjeletike?
KʼUSITIK TSJAKʼIK TA SVENTA VIVLIA
¿Mi oy ta melel li pukujetike?
¿Buchʼutik li pukujetike? ¿Bu likik tal?
