Li Vivliae yaloj xa onoʼox ti chlik tsatsal chameletik ta buyuk noʼox «li ta slajebal kʼakʼale» (Lukas 21:11). Maʼuk kastigo yuʼun Dios li tsatsal chameletike. Li Diose tstunes li Ajvalilal yuʼun sventa slajesbe skʼoplal li chameletike, jech kʼuchaʼal li tsatsal chamel ti chpuk ta spʼejel balumile.

•  ¿Mi yalojbe xa onoʼox skʼoplal Vivlia li tsatsal chameletike?

•  Li Diose, ¿mi oy stunesoj chamel sventa xakʼbe kastigo li krixchanoetike?

•  ¿Mi jaʼ kastigo yuʼun Dios li tsatsal chameletike?

•  ¿Mi chlaj van skʼoplal li tsatsal chameletike?

•  Tekstoetik ti chalbe skʼoplal li chameletike

 Li Vivliae muʼyuk laj yalbe skʼoplal jtosuk chamel o chameletik kʼuchaʼal li coronaviruse, li sidae o li gripe españolae, pe laj yalbe skʼoplal ti chtal tsatsal chameletik ta buyuk noʼoxe (Lukas 21:11; Apokalipsis 6:8). Li vokoliletik taje jaʼ senyail ti ta slajebal xa kʼakʼal kuxulutike xchiʼuk ti «poʼot xa xlaj skotol li kʼusitik oy ta balumile» (2 Timoteo 3:1; Mateo 24:3).

 Li Vivliae chal ti oy onoʼox la stunes chameletik sventa xakʼbe kastigo li krixchanoetike. Jun skʼelobile jaʼ ti junantik krixchanoetike tsakatik ta lepra (Numeros 12:1-16; 2 Reyes 5:20-27; 2 Kronikas 26:16-21). Pe li kʼusitik kʼot ta pasele maʼuk tsatsal chameletik ti puk batel ta stojolal krixchanoetik ti muʼyuk smulike. Yuʼun jaʼ noʼox laj yakʼbe kastigo li krixchanoetik ti la stoy sbaik ta stojolale.

 Maʼuk. Junantik krixchanoetike chalik ti ta la stunes tsatsal chameletik li Diose xchiʼuk yan chameletik sventa xakʼbe kastigo li krixchanoetike. Pe maʼuk jech chal li Vivliae. ¿Kʼu yuʼun jech chkaltik taje?

 Jech xtok, junantik krixchanoetik ti tukʼ laj yakʼ sbaik ta stojolal Dios ta voʼne xchiʼuk avie tsakatemik ta jtosuk chamel. Li ta 1 Timoteo 5:23, chal ti nopajtik noʼox ipaj li Timoteo ti tukʼ yakʼoj sba ta stojolal Diose. Pe li Vivliae muʼyuk chal ti jaʼ akʼbat kastigo yuʼun Dios ta skoj ti kapem ta stojolale. Jaʼ me jech li avi eke. Yuʼun tsnuptanik jeltos chameletik junantik yajtuneltak Dios ti tukʼ yakʼoj sbaike. Ep ta velta li krixchanoetik taje la xkuchik chamel ta skoj ti jaʼo te oyik ti bu oy chamele xchiʼuk ti muʼyuk smalaojik jeche (Eklesiastes 9:11).

 Li Vivliae chal ti muʼyuk to kʼotem yorail sventa xakʼbe kastigo chopol krixchanoetik li Diose. Li avie, jaʼ xa yorail chkoltavan li Diose, jaʼ xkaltik, yakal chikʼ talel krixchanoetik sventa xnopajik ta stojolal xchiʼuk ti sta skolelike (2 Korintios 6:2). Jtos ti kʼuxi tstak ta ikʼel li krixchanoetike jaʼ li cholmantal chichʼ pasel ta spʼejel balumile, yuʼun jaʼ chichʼ albel skʼoplal «li lekil aʼyejetik ta sventa li Ajvalilale» (Mateo 24:14).

 Tana. Li Vivliae jamal yaloj ti chkʼot yorail ti muʼyuk xa buchʼu ch-ipajike. Mi lik sventainutik li Ajvalilal yuʼun Diose, tslajesbe skʼoplal skotol li kʼusi kʼux ip chkaʼitike (Isaias 33:24; 35:5, 6). Jaʼ yuʼun, muʼyuk xa at-oʼonton, vokolil mi jaʼuk lajelal (Apokalipsis 21:4). Chchaʼkuxes li buchʼutik chamemike, vaʼun tskʼupin xkuxlejalik ta jun balumil ti pasem xa ox ta Paraisoe (Salmo 37:29; Echos 24:15).

 Apokalipsis 6:8: «Vaʼun, laj kil jkot sakvayan kaʼ; li buchʼu te kajal batele Lajelal sbi. Jech xtok, te nopol tijil talel ta spat li Mukinale. Akʼbat sventainik [...] skotol krixchanoetik ta balumil sventa smilik ta [...] vokolil [o ta tsatsal chamel]».

 Smelolal: Li profesia ta sventa li chanvoʼ jkajlejetik ta kaʼ chal ta Apokalipsise chakʼ ta ilel ti chtal tsatsal chameletik li ta jkʼakʼaliltike.