Li Vivliae muʼyuk chal kʼusi ora vokʼ li Jesuse xchiʼuk muʼyuk chal mi skʼan jpasbetik li skʼinal svokʼele. Xi chal jlik livro ti lek ojtikinbile: «Maʼuk smantal Dios ti skʼan pasel li Navidade xchiʼuk muʼyuk jech chal li ta Achʼ Testamentoe» (Cyclopedia of Biblical, Theological, and Ecclesiastical Literature, jaʼ yuʼun John McClintock xchiʼuk James Strong).

 Kʼalal ta jchanbetik skʼoplal li Navidade, te chkakʼtik venta ti jaʼ lik spasik li buchʼutik muʼyuk chichʼik ta mukʼ Diose. Li Vivliae jamal chal mi muʼyuk jech chkichʼtik ta mukʼ Dios kʼuchaʼal tskʼane, chopol chaʼi sba kuʼuntik (Eksodo 32:5-7).

1.   Skʼinal svokʼel Jesus. Li baʼyel yajtsʼaklomtak Kristoe muʼyuk la spasbeik li skumpleanyo Kristoe, yuʼun «xchʼunojik ti jaʼ la slikesik li buchʼutik muʼyuk chtunik ta stojolal Diose» (Las cosas nuestras de cada día).

2.   25 yuʼun disiembre. Muʼyuk sprevail mi jaʼo vokʼ Jesus li ta 25 yuʼun disiembree. Xaval yaʼele li jnitvanejetik ta relijione jaʼ la stʼujik li 25 yuʼun disiembre ti tsta sba xchiʼuk li kʼinetik tspasik ta invierno kʼalaluk mas nat li akʼobale (solsticio).

3.   Matanaletik, veʼlil xchiʼuk kʼin. «Li yan sba kʼin tspasik ta Navidade jaʼ te lik talel kʼalal tspasik kʼin li jromaetik ta oʼlol batel disiembre ti jaʼ skʼinal li Saturnoe. Te lik talel ti chveʼike, ti chakʼik matanale xchiʼuk ti tstsanik kantilae» (The Encyclopedia Americana). Jaʼ yuʼun, xi chal li Diccionario de historia de la Iglesia ta sventa taje: «Li kʼinetik tspasik xchiʼuk ti chakʼbe sba smotonike jaʼ te lik talel li ta skʼinal Saturno tspas jromaetike (17-24 yuʼun disiembre)». Jech xtok, li Encyclopædia Britannica chal ti kʼalal jaʼo tspasik li skʼinal Saturnoe, jaʼo chkux ta yabtelik.

4.   Slusal Navidad. Jech kʼuchaʼal laj yal li The Encyclopedia of Religion li jnaklejetik ta Europae tstsoyanik «lusetik ta snaik xchiʼuk ep ta tos yanal teʼetik ti mu xtakij ta anile» sventa spasbeik skʼinal li invierno kʼalaluk mas nat li akʼobale (solsticio) xchiʼuk sventa la mu kʼusi spasbatik yuʼun li pukujetike. Li Diccionario de historia de la Iglesia xi chale: «Sventa spasbeik skʼinal li kʼakʼale, chakʼik jtekʼ teʼ ta snaik xchiʼuk tsjokʼanbeik slusaltak li ta 1 yuʼun eneroe».

5.   Chnichimtasik ta acebo teʼ xchiʼuk muérdago. «Li jtsop paleetike (druidas) jaʼ mas chakʼbeik sjuʼel li teʼ muérdago, li yanal aceboe mas chichʼik ta mukʼ, yuʼun jaʼ la chikʼ sutel li kʼakʼale» (The Encyclopedia Americana).

6.   Árbol de Navidad. Xi chal li Encyclopædia Britannica: «Li yichʼel ta mukʼ teʼetik taje nopem xaʼiik jech spasel li jnaklejetik ta Europa ti muʼyuk chichʼik ta mukʼ Diose, ta mas tsʼakale jaʼ xa jech lik spasik ek li buchʼutik chichʼik ta mukʼ Dios ta alele». Jtos li kʼusi nopem xaʼiik spasel ti te lokʼem talel li ta kʼin taje jaʼ ti te «chakʼik li árbol de Navidad ta yochebal snaik o ta yut snaik sventa spasik li kʼin ta inviernoe».