Li mulile jaʼ kʼalal oy kʼusi ta jpastike, kʼalal oy kʼusi chkaʼi ta koʼontontik o ta jnopbentik ti skontrainoj li smantaltak Diose (1 Juan 3:4; 5:17). Li Vivliae chal ti kʼalal ta jpas jmultike, xuʼ van jaʼ kʼalal oy kʼusi chopol ta jpastike, ti muʼyuk tukʼ ta sat Diose o ti muʼyuk ta jpastik li kʼusi leke (Santiago 4:17).

 Li ta voʼneal tsʼibetik ta Vivlia li jpʼel kʼop «mulil» xie, jelubtasbil kʼuchaʼal tselpʼuj li stiroe o ti mu sta li kʼusi tskʼan tstae. Jech kʼuchaʼal liʼe, li Vivliae chalbe skʼoplal jtsop soltaroetik li ta voʼneal Israel ti lek tajek xtojobik ta sjipel ton ta jimichʼe, yuʼun mu stselpʼuj yuʼunik jpʼejuk ton. Ti xichʼuk jelubtasel kʼalal «mu stselpʼuj» xie, xi chichʼ jelubtasele: muʼyuk tsaʼ smulik (Jueses 20:16). Jaʼ yuʼun chaʼa, ti ta jsaʼ jmultike jaʼ ti mu xchʼun kuʼuntik li stukʼil mantaltak Diose.

 Ta skoj ti jaʼ Jpasvanej li Diose, oy sderecho sventa xakʼbe mantaletik li krixchanoetike (Apokalipsis 4:11). Li voʼotik une jaʼ xa noʼox ta xkichʼtik chapanel ta skoj li kʼusitik ta jpastike (Romanos 14:12).

¿Mi oy van buchʼu muʼyuk tsaʼ smul?

 Moʼoj, yuʼun li Vivliae chal ti jaʼ «jpas mulil skotolike, mu stabeik li smukʼulal Diose» (Romanos 3:23; 1 Reyes 8:46; Eklesiastes 7:20; 1 Juan 1:8). ¿Kʼu chaʼal jech taje?

 Li ta slikebale, li Adan xchiʼuk Evae, mu toʼox xojtikinik kʼusi jaʼ li mulile, yuʼun tukʼ laj yichʼik pasel. Jaʼ slokʼol stuk la spas li Diose (Jenesis 1:27). Pe pasik ta jmulavil krixchanoetik kʼalal muʼyuk xa la xchʼunbeik smantal li Jpasvaneje (Jenesis 3:5, 6, 17-19). Li mulil xchiʼuk ti muʼyuk xa tukʼike jaʼ la sjelubtasbeik li yalab xnichʼnabike (Romanos 5:12). Li ajvalil Davide xi laj yale: «Oy onoʼox jmul kʼalal livokʼe» (Salmo 51:5).

¿Mi oy tsatsal muliletik xchiʼuk mi oy kʼunil muliletik?

 Oy. Jech kʼuchaʼal liʼe, li Vivliae chal ti jnaklejetik ta voʼneal Sodomae «toj chopolik xchiʼuk toj echʼ xa noʼox saʼ smulik», jech xtok chal ti «toj tsots li smulike» (Jenesis 13:13; 18:20). Jkʼeltik oxtos kʼusi chichʼ tsakel ta venta yoʼ xichʼ naʼel mi jaʼ tsatsal mulil o kʼunil mulil.

1.   ¿Mi tsatsal mulil o mi kʼunil mulil? Li Vivliae chal ti jaʼ tsatsal mulil li mulivajele, li yichʼel ta mukʼ santoetike, li elekʼe, li yakubele, li sloʼlael krixchanoetike, li milvaneje xchiʼuk li espiritismoe. Taje chal Dios ti akʼo mu jpastike (1 Korintios 6:9-11; Apokalipsis 21:8). Li Vivliae chal ti muliletik taje jelel xchiʼuk li muliletik ti mu yolbajuk ta jpastike o ti mu jechuk jnopojtike. Jech kʼuchaʼal liʼe, kʼalal oy kʼusi ta xkaltik o ta jpastik ti chopol-o chaʼi sba kuʼuntik yantike (Proverbios 12:18; Efesios 4:31, 32). Jech xtok, li Vivliae tstij koʼontontik ti parejouk xkiltik li muliletike, yuʼun taje xuʼ stij koʼontontik spasel tsatsal muliletik (Mateo 5:27, 28).

2.   ¿Mi yolbaj o mu yolbajuk? Junantik buchʼutik tspas smulike jaʼ ta skoj ti mu xojtikinbeik smantaltak li Diose (Echos 17:30; 1 Timoteo 1:13). Akʼo mi jech, li Vivliae chal ti jaʼ onoʼox muliletik eke, pe jelel xchiʼuk li buchʼu yolbaj xa ta spas smul ti muʼyuk chchʼunbe smantaltak li Diose (Numeros 15:30, 31). Li Vivliae ta xal ti buchʼu yolbaj xa ta spas smule «toj chopol kʼusi oy ta yoʼonton» (Jeremias 16:12).

3.   ¿Mi jkoj noʼox o jayibuk velta? Li Vivliae jamal chal ti jelel li buchʼu jkoj noʼox chpʼaj ta spasel mulile xchiʼuk li buchʼu oy jayibuk velta chchaʼpasilan jtosuk mulile (1 Juan 3:4-8). Li Diose chopol ta xil li buchʼu jech-o tspasilan smul kʼalal snaʼoj xa ox li kʼusi chal Diose (Ebreos 10:26, 27).

 Li buchʼutik spasoj tsots smulike xuʼ van chopol tajek chaʼi sbaik. Jech kʼuchaʼal li ajvalil David ti xi la stsʼibae: «Yuʼun kʼot xa kʼalal jol li jpaltailtake; xkoʼolaj kʼuchaʼal alal ikatsil ti mu xa xlik kuʼune» (Salmo 38:4). Akʼo mi jech, li Vivliae xi tspat koʼontontike: «Akʼo skomtsan sbe li buchʼu toj chopole xchiʼuk akʼo yikta kʼusi tsnop li jpaschoplejale; akʼo sutuk tal ta stojolal li Jeova ti jaʼ chkʼuxubinate, akʼo sutuk tal ta stojolal li Jdiostike, yuʼun muʼyuk spajeb ch-akʼvan ta perton» (Isaias 55:7).