Kʼalal chalbe skʼoplal Vivlia kʼuxi ta tael li melel relijione, xi tskoʼoltase: «Ta sventa yabtelik chavojtikinik. Yuʼun mi jaʼuk onoʼox bu chichʼ tsobel uva ta chʼix xchiʼuk mi jaʼuk bu chichʼ tsobel igo ta tomalchʼix, ¿mi mu jechuk?» (Mateo 7:16). Ta anil noʼox chkiltik mi jaʼ jpets uva o jpets chʼix. Jaʼ jech ek, ta anil noʼox chkiltik bu jaʼ li melel relijion xchiʼuk bu jaʼ li jecheʼ relijion kʼalal ta jkʼeltik li kʼusitik tspasike.

1.   Li melel relijione maʼuk chakʼ ta chanel ta sventa li kʼusi tsnop krixchanoetike, jaʼ chakʼ ta chanel li kʼusi chal Skʼop Diose, li Vivliae (Juan 4:24; 17:17). Te chakʼ ta chanel li kʼusi melel ta sventa li chʼulelale xchiʼuk li spatobil oʼontonal sventa li kuxlejal ta sbatel osil ta balumile (Salmo 37:29; Isaias 35:5, 6; Esekiel 18:4). Jech xtok, jamal chal li kʼusi mu lekuk chakʼik ta chanel li jecheʼ relijionetike (Mateo 15:9; 23:27, 28).

2.   Li melel relijione tskolta li krixchanoetik sventa xnopajik ta stojolal Dios xchiʼuk ti xojtikinbeik li sbi Jeovae (Salmo 83:18; Isaias 42:8; Juan 17:3, 6). Xchiʼuk chchanubtasutik ti tskʼan akʼo xkamigointik li Diose, yuʼun muʼyuk nom oy ta jtojolaltik xchiʼuk xuʼ xkojtikintik (Santiago 4:8).

3.   Li melel relijione chal ti Jesuse jaʼ takbil talel yuʼun Dios sventa spoj li krixchanoetike (Echos 4:10, 12). Chchʼunik li mantaletik laj yal komel Jesuse xchiʼuk chakʼ yipalik sventa xchanbeik stalelal (Juan 13:15; 15:14).

4.   Li melel relijione jaʼ mas chalbeik skʼoplal li Ajvalilal yuʼun Diose, maʼuk li ajvaliletik liʼ ta balumile, yuʼun jaʼ noʼox te tsta spatobil yoʼonton li krixchanoetike. Jaʼ yuʼun, li buchʼutik te skʼoplalik li ta melel relijione chalbeik yantik ta sventa li Ajvalilal yuʼun Diose (Mateo 10:7; 24:14).

5.   Li melel relijione chakʼik ta ilel melel kʼanelal (Juan 13:35). Chchanubtasvan sventa stsak ta venta skotol li krixchanoetike mu ventauk bu slumalik, stalel xkuxlejalik, skʼopik xchiʼuk ti kʼu yelan chʼiik tale (Echos 10:34, 35). Ta skoj ti skʼanojik skotol li krixchanoetike, muʼyuk chbatik ta paskʼop (Mikeas 4:3; 1 Juan 3:11, 12).

6.   Li melel relijione muʼyuk bu tstojik li jbeiltasvanejetike. Jech xtok, li jbeiltasvanejetike muʼyuk ti yan xa sba ti kʼu yelan tskʼanik biiltasele (Mateo 23:8-12; 1 Pedro 5:2, 3).

7.   Li melel relijione muʼyuk tstikʼ sbaik ta politika (Juan 17:16; 18:36). Akʼo mi jech, chichʼik ta mukʼ xchiʼuk chchʼunbeik smantal li ajvaliletike, yuʼun chchʼunik li mantal liʼe: «Tojbeik Sesar li kʼusitik jaʼ yuʼun Sesare, yan li kʼusitik jaʼ yuʼun Diose tojbeik Dios» (Markos 12:17; Romanos 13:1, 2).

8.   Li buchʼutik te skʼoplalik li ta melel relijione ta sjunul yoʼontonik chakʼ ta xkuxlejalik li beiltaseletik ta Vivliae, maʼuk ta skoj ti persa skʼan jech spasik o ti sujbil chaʼi sbaike (Efesios 5:3-5; 1 Juan 3:18). Maʼuk jun ikatsil chaʼiik ti chtunik ta stojolal li Dios ti xmuyubaje, yuʼun jaʼ jun matanal chaʼiik (1 Timoteo 1:11).

9.   Muʼyuk mas epik li buchʼutik ochemik li ta melel relijione (Mateo 7:13, 14). Jech xtok, chichʼik pʼajel, kʼexlaltasel xchiʼuk kontrainel ta skoj ti tspasik li kʼusi tskʼan yoʼonton Diose (Mateo 5:10-12).

«Te oyun li ta relijion ti bu mas lek chkaʼie»

 Mi jaʼ noʼox ta jtsaktik ta venta li kʼusi lek chkaʼitik kʼalal ta jtʼuj jrelijiontike, xibal me sba. Li Vivliae chal ti chkʼot skʼakʼalil ti krixchanoetike jaʼ tstsʼakliik batel li jnitvanejetik ta relijion ti jaʼ chalik li kʼusi lek chaʼiik stukike, maʼuk li kʼusi melele (2 Timoteo 4:3). Jaʼ yuʼun, li Vivliae tstij koʼontontik sventa mu xkiktatik li melel «relijion ti sak xchiʼuk ti muʼyuk ikʼ ta sat Jdiostik xchiʼuk Jtotike», akʼo mi muʼyuk lek chil li krixchanoetike (Santiago 1:27, tsʼib ta yok vun; Juan 15:18, 19).