¿Kʼuxi xuʼ xkamigointik li Diose?
Li kʼusi chal Vivliae
Mi chakʼan chavamigoin li Diose skʼan xavojtikin baʼyel xchiʼuk ti jaʼuk xapas li kʼusi lek chile, vaʼun chnopaj tal ta atojolal (Santiago 4:8). Xi chal li Vivliae: «Muʼyuk onoʼox bu nom oy ta jtojolaltik ta jujuntal» li Diose (Echos 17:27).
Kʼusi skʼan jpastik sventa xkamigointik li Diose
Kʼelo li Vivliae
Li kʼusi chal Vivliae: «Laj yakʼ ta naʼel Dios skotol li Tsʼibetike» (2 Timoteo 3:16).
Kʼusi skʼan xal: Jaʼ laj yakʼ ta naʼel Dios li kʼusi chal Vivliae. Jaʼ la stikʼbe ta snopben jtsʼibajometik ta Vivlia li kʼusi tsnop stuke. Te chal ta Vivlia ti kʼu yelan tskʼan akʼo xijkuxie xchiʼuk chalbutik kʼu yelan stalelal, jech kʼuchaʼal ti skʼanojutike, ti tukʼe xchiʼuk ti kʼuxutik ta yoʼontone (Eksodo 34:6; Deuteronomio 32:4).
Li kʼusi xuʼ xapase: Kʼelo skotol kʼakʼal li Vivliae (Josue 1:8). Nopbo skʼoplal li kʼusi la akʼele xchiʼuk xiuk xajakʼbe abae: «¿Kʼusi chakʼ jchan ta sventa Dios liʼe?» (Salmo 77:12).
Jech kʼuchaʼal liʼe, mi la akʼel kʼusi chal li Jeremias 29:11, xiuk xanope: «¿Kʼusi tskʼan li Diose: mi jaʼ ti xkil lekilale o mi jaʼ ti xkil jvokole? ¿Mi jaʼ tskʼan ti jtoj jmule o mi jaʼ ti oy kʼusi lek jta ta tsʼakale?».
Kʼelo li kʼusitik spasoje
Li kʼusi chal Vivliae: «Li stalelaltak [Dios] mu xvinaje jamal xvinaj kʼalal laj yichʼ pasel tal li balumile, yuʼun te xvinaj ta skoj li kʼusitik pasbile» (Romanos 1:20).
Kʼusi skʼan xal: Kʼalal chkiltik junuk kʼupil sba kuadroe te chkiltik kʼu yelan stalelal li buchʼu la sbone, jech xtok kʼalal ta jkʼeltik kʼu yelan pasbil jun makinae te chkakʼtik venta kʼu yelan stalelal li buchʼu la spase. Jaʼ jech ek, xkilbetik lek stalelal Dios li ta spasbentake. Jech kʼuchaʼal li jchinabtike, ta skoj ti toj labal sba kʼu yelan spasoje jamal xvinaj ti toj pʼij li Diose. Jamal xvinaj xtok ti toj tsots sjuʼel kʼalal ta jkʼeltik li kʼanaletike xchiʼuk li yip kʼakʼale (Salmo 104:24; Isaias 40:26).
Li kʼusi xuʼ xapase: Chʼakbo yorail sventa xakʼel li kʼusitik pasbile xchiʼuk ti oyuk kʼusi xakʼ achane. Xiuk xanope: «¿Kʼusi chakʼ jchan ta sventa Dios li kʼusitik spasojane?». a Melel onoʼox chaʼa, mu onoʼox xkojtikin lek Dios mi jaʼ noʼox ta jkʼeltik li kʼusitik spasoje, jaʼ yuʼun laj yakʼbutik li Vivliae.
Tunesbo li sbi Diose
Li kʼusi chal Vivliae: «Ta jchabi ta skoj ti xojtikin li jbie. Ta staun ta kʼoponel, vaʼun ta jtakʼbe» (Salmo 91:14, 15).
Kʼusi skʼan xal: Li Jeova ti jaʼ jech sbi li Diose oy tajek ta yoʼonton li buchʼutik x-ojtikinbat li sbie xchiʼuk ti tsots skʼoplal ch-ilbate b (Salmo 83:18; Malakias 3:16). Xi chakʼ sba ta ojtikinel stuk li ta Vivliae, xi chal kʼusi sbie: «Voʼon Jeovaun, taje jaʼ jbi» (Isaias 42:8).
Li kʼusi xuʼ xapase: Albo sbi Jeova kʼalal chakʼopone.
Kʼopono li Jeovae
Li kʼusi chal Vivliae: «Li Jeovae nopol oy ta stojolal skotol li buchʼutik tskʼanbeik vokole» (Salmo 145:18).
Kʼusi skʼan xal: Li Jeovae chnopaj tal ta stojolal li buchʼutik chkʼoponat ti oy xchʼunel yoʼontonik ta stojolale. Kʼalal ta jpastik orasione jaʼ jech chkichʼtik ta mukʼ xchiʼuk jaʼ jech chkakʼtik ta ilel ti toj tsots skʼoplal chkiltike.
Li kʼusi xuʼ xapase: Nopeso aba ta spasel orasion (1 Tesalonisenses 5:17). Albo yaʼi kʼusi chavul-o avoʼonton xchiʼuk kʼu yelan chavaʼi aba (Salmo 62:8). c
Oyuk xchʼunel avoʼonton ta stojolal Dios
Li kʼusi chal Vivliae: «Muʼyuk lek chilutik Dios mi chʼabal xchʼunel koʼontontike» (Ebreos 11:6).
Kʼusi skʼan xal: Mi chakʼan chanopaj ta stojolal Diose, skʼan oyuk xchʼunel avoʼonton. Pe li Vivliae chal ti maʼuk noʼox skʼan jchʼuntik ti oy li Diose. Yuʼun skʼan jpat koʼontontik ta stojolal, ti jchʼuntik ti chkʼot ta pasel yuʼun li kʼusi yaloje xchiʼuk ti jchʼuntik ti stuk noʼox jaʼ toj lek li smantaltake. Mi ta jkʼan chkamigointik li Diose skʼan jpat koʼontontik ta stojolal.
Li kʼusi xuʼ xapase: Sventa oyuk lek xchʼunel koʼontontike skʼan xkojtikintik lek li Vivliae (Romanos 10:17). Mi la akʼel lek li kʼusi chale te chavakʼ venta ti xuʼ xapat avoʼonton ta stojolal li Diose xchiʼuk li ta tojobtaseletik chakʼbutike. Ta sjunul me yoʼonton tskoltaoxuk li stestigotak Jeova sventa xavojtikin lek li kʼusi chal Vivliae. d
Jaʼ xapas li kʼusi lek chil Diose
Li kʼusi chal Vivliae: «Liʼe jaʼ smelolal ti jkʼanojtik li Diose: ti jchʼunbetik li smantaltake» (1 Juan 5:3).
Kʼusi skʼan xal: Mi la avakʼ ta ilel ti akʼanoj li Jeovae xchiʼuk ti chavakʼbe yipal ta xchʼunbel li smantaltake ta me xnopaj tal ta atojolal.
Li kʼusi xuʼ xapase: Te chavakʼ batel venta kʼusi lek chil Dios o kʼusi chopol chil kʼalal chachan batel li Vivliae. Xiuk xanope: «¿Kʼusitik skʼan jel ta jkuxlejal sventa xmuyubajuk kuʼun li Diose?» (1 Tesalonisenses 4:1).
Chʼunbo li smantaltake sventa xavil ti skʼanojote
Li kʼusi chal Vivliae: «Pasik preva, vaʼun chavilik ti toj lek li Jeovae» (Salmo 34:8).
Kʼusi skʼan xal: Li Diose tskʼan ti xavakʼ venta atuk ti toj leke. Kʼalal chavakʼ venta ti skʼanojot tajeke mas to me chanopaj avaʼi ta stojolal.
Li kʼusi xuʼ xapase: Akʼo ta akuxlejal li kʼusi chachan batel ta Vivliae. Vaʼun chavakʼ venta ti mas to chlekub akuxlejale (Isaias 48:17, 18). Kʼelbo sloʼilal krixchanoetik ti jel xkuxlejalik koliyal ti koltaatik yuʼun li Diose, vaʼun mas xa xmuyubajik xchiʼuk li yutsʼ yalalike. e
Li kʼusitik xchʼunojik ti mu meleluke
Xi xchʼunojik jlome: Li Diose mu skʼan ti xkamigointike, yuʼun stuk xa noʼox toj tsots skʼoplal xchiʼuk toj tsots sjuʼel.
Li kʼusi melele: Melel onoʼox ti stuk noʼox toj tsots skʼoplal xchiʼuk toj tsots sjuʼel li Diose, akʼo mi jech tskʼan ti xkamigointike. Li ta Vivliae chalbe skʼoplal viniketik xchiʼuk antsetik ti toj lek laj yamigoin sbaik xchiʼuk li Diose (Echos 13:22; Santiago 2:23).
Xi xchʼunojik jlome: Mu stakʼ xkamigointik li Diose, yuʼun mu jnaʼtik kʼu yelan.
Li kʼusi melele: Melel onoʼox ti oy kʼusitik mu xkaʼibetik smelolal ta sventa li Diose, jech kʼuchaʼal ti jaʼ jun kuxlejal ti mu xkiltike. Akʼo mi jech, xuʼ xkamigointik. Jech, li Vivliae chal ti jaʼ to xuʼ jtatik kuxlejal sbatel osil mi xkojtikintik lek li Diose (Juan 17:3). Kʼun tajek ta aʼibel smelolal ti kʼu yelan chalbe skʼoplal Dios li Vivliae. Chalbe skʼoplal li smantaltake, ti kʼu yelan stalelale, ti kʼusi snopoj tspas ta sventa li krixchanoetik xchiʼuk ta sventa li Balumile (Isaias 45:18, 19; 1 Timoteo 2:4). Kʼuchaʼal laj xa kaltike, te chal kʼusi sbi xtok (Salmo 83:18). Jaʼ yuʼun chaʼa, maʼuk noʼox xuʼ xkojtikintik li Diose, yuʼun xuʼ xkamigointik xtok (Santiago 4:8).
a Mi chakʼan kʼelbe yan skʼelobiltak spʼijil Dios li ta spasbentake, kʼelo ti bu xi chale: «¿Mi oy van buchʼu la spas?».
b Ep buchʼutik xchʼunojik ti xi smelolal li biil Jeovae: «Jaʼ tspas akʼo kʼotuk ta pasel». Ti jamal xkaltike, xi oy ta yoʼonton chalbutik Dios kʼalal chalbutik kʼusi sbie: «Ta jpas li kʼusi oy ta koʼontone, li kʼusi jnopoj ta jpase. Chkʼot ta pasel kuʼun li kʼusi kaloje».
c Kʼelo li mantal ti xi sbie: «¿Contesta Dios nuestras oraciones?».
d Sventa xavaʼibe mas smelolale, kʼelo li video ¿Kʼu yelan chichʼ akʼel li chanubtasel ta Vivliae?
e Kʼelo li mantaletik ti xi sbie: «Jelbat-o xkuxlejalik yuʼun li Vivliae».
Xuʼ van chakʼupin skʼelel xtok liʼe
KʼUSITIK TSJAKʼIK TA SVENTA VIVLIA
¿Kʼusi oy ta yoʼonton Dios ta jtojolal?
Sventa xanaʼ kʼusi oy ta yoʼonton Dios ta atojolale, ¿mi oy van kʼuxi chalbot tal o chakʼbot tal junuk senyail? Kʼelo kʼusi chal li Vivliae.
LI JKʼEL˗OSIL TA TOYOLE
¿Mi xuʼ kuʼuntik slekubtasbel yoʼonton li Diose?
Li kʼusitik la spasik li Job, Lot xchiʼuk li Davide jaʼ chakʼ kiltik kʼusi tskʼanbutik li Diose, akʼo mi oy kʼusi chopol la spasik.
LI KʼUSI BAʼYEL SKʼAN JCHANTIK TA VIVLIAE
¿Mi oy sbi li Diose?
Li Diose chichʼ albel Kajvaltik, li Buchʼu skotol xuʼ yuʼune xchiʼuk Jpasvanej. Pe oy jun sbi ti vukmil ta velta xvinaj li ta Vivliae.
CHANUBTASELETIK TA VIVLIA TI TSOTS SKʼOPLALE
¿Mi xuʼ xkamigointik li Diose?
Epal krixchanoetik ta voʼne xa onoʼox oy ta yoʼonton chojtikinik li Jpasvanej yuʼunike. Li Vivliae xuʼ skoltaot sventa xakʼot ta yamigo li Diose. Li kʼusi baʼyel skʼan xanaʼ ta stojolal Diose jaʼ li sbie.
