Tana. Li Diose chchikintabe s˗orasion li krixchanoetik ti jech tskʼoponik jech kʼuchaʼal tskʼan yoʼontone. Li Vivliae chalbe skʼoplal krixchanoetik ti la skʼanbeik koltael li Diose. Mi la jkʼeltik li loʼiletik taje tstij koʼontontik sventa jpastik orasion, akʼo mi muʼyuk jech jpasojtik˗o.

•   «Kajval Jeova, Dios kuʼun, koltaun; koltaun ta skoj li tukʼil kʼanelal avuʼune» (Salmo 109:26).

•   «Li voʼone mu xpak kuʼun jkʼoplal xchiʼuk abol jba [...]. Voʼot li jkoltavanejot kuʼune xchiʼuk li jpojvanejot kuʼune; Dios kuʼun, mu me xajalij» (Salmo 40:17).

 Jamal xvinaj ti buchʼu la stsʼiba li versikuloetik liʼe, tsots lek xchʼunel yoʼonton ta stojolal Dios. Pe ¿a ti mi chʼabal mas xchʼunel koʼontontik une? Li Diose ta xchikintabe s˗orasion xtok li buchʼu ta sjunul yoʼonton tsaʼike. Li Vivliae chal ti chaʼi kʼalal xvokolet tskʼanik koltael li «buchʼutik muʼyuk xa te tsakal chaʼi li yoʼontonike» xchiʼuk «li buchʼutik chat yoʼontonike» (Salmo 34:18).

 Bateltike, ta jnoptik ti nom oy ta jtojolaltik li Diose xchiʼuk ti mu sventa˗o li kʼusi ta jnuptantike. Akʼo mi jech, li Vivliae xi chale: «Akʼo mi ta toyol to oy li Jeovae, chil talel li buchʼu bikʼit yakʼoj sbae, yan li jtoybae ta nom noʼox skʼeloj batel» (Salmo 138:6). Li Jesuse xi onoʼox laj yalbe li yajchankʼoptake: «Li voʼoxuke kʼalal to ta stsotsil ajolik chapbil skotol» (Mateo 10:30). Jaʼ yuʼun chaʼa, mi snaʼoj Dios taje, xuʼ me jpat koʼontontik ti chaʼibutik kʼalal ta jchapbetik li kʼusi ta jvul˗o koʼontontike (1 Pedro 5:7).