Li Vivliae jun noʼox velta chal li tatuajee, jaʼ li ta Levitiko 19:28, xi chale: «Mu me kʼusi xatsʼiba ta anukulilik». Taje jech laj yalbe mantal j˗israeletik li Diose, yuʼun mu skʼan ti stsʼiba ta snukulilik li sbi sdiosik o li slokʼol sdiosik jech kʼuchaʼal tspasik li jnaklejetik te ta spat xokonike (Deuteronomio 14:2). Akʼo mi muʼyuk xa ta jchʼuntik li mantaletik laj yakʼbe Dios li j˗israeletike, lek onoʼox me ti jnopbetik skʼoplale.

¿Mi lek ti xakʼ statuaje jun jchʼunolajele?

 Jkʼeltik batel junantik tekstoetik ti xuʼ skoltautike.

•   «Lekuk noʼox me smeltsan sba ta skʼuʼ spokʼik li antsetike [. . .] xchiʼuk akʼo me yichʼ spʼijilik» (1 Timoteo 2:9). Li beiltasel liʼe jtunel me yuʼun li viniketik eke. Li jchʼunolajele skʼan me mu sokbe yoʼonton yantik ta skoj ti kʼu yelan xvinaje.

•   Oy buchʼutik ti chakʼ statuajeike jaʼ sventa xichʼik ojtikinel, ti spas kʼusi xal yoʼontonike o ta skoj ti jaʼ sbekʼtal stukike. Pe li Vivliae xi chalbe mantal li jchʼunolajeletike: «Akʼo xavakʼik ta kuxul matanal li abekʼtalike, ti chʼuluke, ti akʼo xchʼam li Diose, ti jaʼ jun chʼul abtelal ti bu chatunesik ti kʼu yelan xatojobik ta snopele» (Romanos 12:1). Li buchʼutik xtojobik ta snopele xuʼ xkoltaatik sventa skʼelik lek kʼu yuʼun ti chakʼ statuajeike. Xuʼ van jaʼ ta skoj ti oy ta modae o tskʼan chakʼik ta ilel ti bu pandiya tikʼilike. Jech oxal, skʼan xi sjakʼbe sbaike: «¿Kʼusi van ta jpas mi echʼ ta moda li jtatuajee o ti mu xa jkʼan ta tsʼakale?». Mi la skʼel lek ti kʼu yuʼun chakʼ li statuajee, lek me kʼusi chkʼot ta nopel yuʼun (Proverbios 4:7).

•   «Li kʼusitik snopoj tspas li buchʼutik baxbolike jpʼel skʼoplal lek chkʼot ta pasel, pe jaʼuk li buchʼutik anil noʼox kʼusitik tsnop tspasike jpʼel skʼoplal ch˗ikʼatik batel ta povreal» (Proverbios 21:5). Bakʼintike, muʼyuk tsnopbeik lek skʼoplal li krixchanoetik kʼalal chakʼ statuajeike. Pe li buchʼutik jech tspasik taje xuʼ van tsots chil˗o svokolik, yuʼun xuʼ muʼyuk xa lek ch˗ilatik li yamigotakike o li xchiʼiltakik ta abtele. Jech xtok, mi laj yichʼ lokʼesel li tatuajee, toj toyol stojol xchiʼuk kʼux tajek. Akʼbil lek venta ti epal krixchanoetik xlaj to snaʼik ti laj yakʼ statuajeike, yuʼun ep buchʼutik ti jaʼ xa snegosioik ti tslokʼesik li tatuajee.