Moʼoj. Li Vivliae muʼyuk chal ti xuʼ jkʼopontik li santoetike, jaʼ noʼox skʼan jkʼopontik stuk li Diose xchiʼuk ta sbi Jesus skʼan jpastik. Xi laj yalbe yajchankʼoptak li Jesuse: «Xi me yelan skʼan xapasik orasione: ‹Jtotik ta vinajel, akʼo yichʼ chʼultajesel li abie›» (Mateo 6:9). Li Jesuse muʼyuk laj yal ti xuʼ xkichʼtik ta mukʼ junuk santoe o junuk anjel o buchʼuuk noʼox ti maʼuk Diose.

 Xi laj yal xtok li Jesukristoe: «Voʼon li beune, voʼon li melelune xchiʼuk voʼon li kuxlejalune. Muʼyuk buchʼu xuʼ xtal ta stojolal li Totile, jaʼ noʼox ta jventa» (Juan 14:6). Li buchʼu oy yabtel sventa xkʼopoj ta jtojolaltike jaʼ noʼox li Jesukristoe (Ebreos 7:25).

¿Mi xuʼ jkʼopontik Dios xchiʼuk li santoetik xtoke?

 Li Jesuse xi laj yalbe Satanas kʼalal akʼat ta prevae: «Jaʼ noʼox skʼan xavichʼ ta mukʼ li Jeova Dios avuʼune xchiʼuk jaʼ noʼox stuk skʼan xapasbe xchʼul abtel» (Mateo 4:10). Kʼalal ta jkʼopontik Diose, jaʼ jech chkichʼtik ta mukʼ. Jaʼ yuʼun, li Jeovae tskʼan ti stuk noʼox xkichʼtik ta mukʼe (Isaias 48:11).

 Ti mi jaʼ laj kichʼtik ta mukʼ li santoetike, li anjeletik ti maʼuk li Diose chopol me ta xaʼi. Li ta slivroal Apokalipsis ta xal ti oy jun velta li jtakbol Juane la skejan sba ta stojolal jun anjel sventa xichʼ ta mukʼ, vaʼun xi albate: «¡Moʼoj! ¡Mu xapas jech! Yuʼun jchiʼil noʼox jbatik ta mosoil xchiʼuk li avermanotak ti akʼbil yabtelik sventa xalbeik skʼoplal li Jesuse. ¡Jaʼ ichʼo ta mukʼ li Diose!» (Apokalipsis 19:10).